Ezequiel 43
43
Temploman Diospa kanchariynin huntaykusqanmanta
1Chaymantam chay runaqa intipa qespimunan lawpi punkuman pusaruwarqa. 2#Ez 10.3-4, 18-19; 11.22-23.Hinaptinmi rikurqani Israelpa yupaychasqan Tayta Diospa kanchariynin intipa qespimunan lawmanta hamuchkaqta. Qapariyninpas lloqllapa qapariynin hinaraqmi uyarikurqa, chaymi kanchariyninwan kay pachapas sumaqllataña achkirirqa.
3Chay visionpi rikusqayqa karqa Jerusalén llaqtata Tayta Dios tuñichinanpaq hamusqanta rikusqay hinaraqmi chaynataq Quebar mayupa patanpi qawasqay hinaraqmi. Chaymi pampaman kumuykurqani. 4Tayta Diospa kanchariyninmi chay temploman intipa qespimunan law punkunta yaykumurqa.
5Diospa Espiritunñataqmi hoqariruwaspan templopa uku law pationman aparuwarqa, hinaptinmi rikurqani chay temploman Tayta Diospa kanchariynin huntaykusqanta. 6Chay runam waqtaypi sayaykurqa, hinaptinmi templomanta Tayta Diospa rimapayamuwasqanta uyarirqani. 7Paymi kaynata nimuwarqa:
Runapa churin, kay sitioqa tiyanaypa kanan hinaspa chakiykunapa sarupakunan sitiom, kaypim Israelpa mirayninkunapa chawpinpi wiñaypaq yachasaq. Israelpa mirayninkunawan reyninkupas manañam chuya sutiytaqa penqayman churanqakuñachu, nitaqmi wañusqa reyninkutapas yupaychanqakuñachu.
8Manañataqmi palacionkupa punkuntapas temploypa punkunmanta huk perqallapa rakiykusqantaqa hatarichinqakuñachu. Paykunam millakusqay kaqkunata ruwaspanku chuya sutiyta penqayman churarqaku; chayraykum ñoqapas paykunapa contranpi piñakuspay wañurachirqani. 9Kunanyá qepanchawayninkuta saqespa wañusqa reyninku yupaychayta saqechunku, hinaptinmi paykunapa chawpinpi wiñaypaq kawsasaq.
10Chaynaqa, runapa churin, Israelpa mirayninkunaman kay templopa imaynam kasqanmanta, planonkunamanta hinaspa sayayninkunamanta willay, chaynapi mana allin ruwasqankumanta penqakunankupaq.
11Sichum tukuy mana allinkuna ruwasqankumanta penqarikuptinkuqa, imaynam kay templo ruwasqa kananta willay, willaytaq maypim tukuy imankuna tarikunanta, maypim yaykuna punkun hinaspa lloqsina punkun kananta, imaynam chay templo kananta hinaspa ruwayman churananku kamachikuykunatapas. Dibujaspayki kaykunata qawachiy chayman hina ruwanankupaq. Kamachikuykunatapas qellqaytaq ruwayman churanankupaq.
12Templomanta kamachikuyqa kaymi: Moqopa hawanpi tarikuq templopa muyuriqninmi Diosllapaqña sapaqchasqa kanqa.
Altarmanta
13Altarpa sayayninta tupuruptinkum kayna kasqa: Muyuriqninpim kasqa huk yarqa, parte metro masnin ukuyuq hinaspa parte metro anchoyuq; chay yarqapa muyuriqninpi patakninñataqmi kasqa iskay chunka pichqayuq centímetro. Chay altarpa tiyananñataqmi kayna kasqa:
14Yarqapa uku pampanmanta cimiento patankamam kasqa huk metro sayayniyuq, anchonñataqmi kasqa parten metro. Chay altarpa chawpinmi kasqa iskay metro sayayniyuq, anchonñataqmi kasqa parten metro. 15Altarpi ninapa kanan otaq sacrificio kañananku patakpa sayayninmi kasqa iskay metro, tawan esquinanpiñataqmi kasqa tawa waqrakuna.
16Chay ninapa kananpas tawan lawmi kasqa chay sayayniyuqkamalla, sapakamam kasqa soqta metroyuqkama. 17#Ex 27.1-2; 2 Cr 4.1.Chay altarpa iskay kaq patakninpas tawan lawninmi kasqa chay sayayniyuqkamalla, sapakamam kasqa qanchis metroyuqkama; muyuriqninpi patakñataqmi kasqa iskay chunka pichqayuq centímetro. Altarpa muyuriqninpi yarqam kasqa parten metro anchoyuq. Chay altarman seqaq gradasñataqmi intipa qespimunan lawman qawasqa.
18Chaymantam niwarqa:
Runapa churin, ñoqa Tayta Diosmi kaynata niki: Altar ruwananku tiempo chayaramuptinmi kay kamachikuyman hina ruwanqaku: Altarpa hawanpim lliw kañanapaq huk animalta ofrecewanqaku, hinaspam kay altarta yawarwan challanqaku.
19Leví casta Sadocpa mirayninmanta kaq sacerdotekunamanmi huk torillota qonki, wañuchispanku hucharayku ofrendata ofrecemuwanankupaq, paykunallam serviwanankupaqqa asuykamuwanqaku. Ñoqa Tayta Diosmi chaynata nini.
20Chaymantam yawarninta asniqta hapiykuspa altarpa tawan waqrankunaman llusinki; llusinkitaqmi iskay kaq patakninpa tawan esquinankunamanpas hinaspa muyuriqnin patanmanpas; chaynatam chay altarta llapa runakunapa huchanmanta chuyanchanki. 21Chay hucharayku sacrificiota hapiykuspaykim, templomanta hawaman hurqospa, chaypaq akllasqa sitiopi kañanki. 22Paqarinnintin punchawñataqmi, hucharayku ofrenda kananpaq huk sano allin chivatota ofrecemuwanki; llapa sacerdotekunañataqmi imaynam malta torillowan ruwasqankuta hina ruwaspanku altarta chuyanchanqaku.
23Chuyanchayta tukuruspaykim, sano malta torotawan sano carnerota ofrecemuwanki. 24Chay animalkunatam ñoqa Tayta Diosman ofrecemuwanki. Llapa sacerdotekunam kachiwan kachichaykuspanku lliw kañana sacrificiota ofrecemuwanqaku.
25Qanchis punchawnintinmi hucharayku ofrendapaq huk chivatota, malta torota hinaspa carnerota wañuchinki; chaykunaqa sanokamam kanqa.
26Qanchis punchawpunim llapa sacerdotekuna chay altarta runakunapa huchanmanta chuyanchanqaku, chaynapim ñoqallapaqña sapaqchanqaku.
27 #
Ex 29.35-37. Chay qanchisnintin punchawkuna tukuruptinmi, pusaq kaq punchawmanta qepaman llapa sacerdotekuna qallaykunqaku lliw kañana sacrificiokunatawan ñoqa Tayta Dioswan allinlla kasqaykichikmanta sacrificiokuna ofreceyta; hinaptinmi chaskisqaykichik. Ñoqa Tayta Diosmi chaynata nini.
Currently Selected:
Ezequiel 43: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
