Ezequiel 44
44
Intipa qespimunan lawpi punkumanta
1Chaymantam chay runaqa intipa qespimunan lawman qawaq punkuman huktawan kutichiwarqa, hinaptinmi chay punkuqa wichqarayachkasqa.
2Chaypim Tayta Dios kaynata niwarqa:
Kay punkuqa wichqasqam kanqa, amam kichanqakuchu. Kay punkuntaqa amam pipas yaykunqachu, chay punkunta Israelpa yupaychasqan Tayta Dios yaykusqanrayku. Chaynaqa, wichqasqam kanqa. 3Kamachikuqllam chay punkupa waqtanpiqa tiyanqa, sapaqchasqa mikuyta Tayta Diospa qayllanpi mikunanpaq. Yaykunqapas lloqsimunqapas corredorman yaykuna punkullantam, nispa.
Pikunallam templomanqa yaykunanmanta
4Chaymantam aparuwarqa norte lawpi punkuman, chay punkuqa kachkan templopa chimpanpim; hinaptinmi temploman Tayta Diospa kanchariynin huntaykusqanta rikurqani, chaymi pampakama kumuykurqani. 5Chaymantam Tayta Dios niwarqa:
Runapa churin, templopaq kamachikuykunamantawan reglamentokunamanta allinta yuyaymanaspa allinta uyariy. Sumaqtayá qawariy pikunam temploman yaykunanta hinaspa lloqsinantapas.
6Mana kasukuq Israel nacionta niy: Tayta Diosmi kaynata nin: Israelpa mirayninkuna, millakuypaq kaqkuna ruwayta saqeychik. 7Qamkunaqa mana qari kayninpi nitaq sonqonpipas señalasqa runakunata temployman pusaykuspam millakuypaqtaña ruwarunkichik. Millakuypaqtaqa ruwachkankichik wirata hinaspa yawarta ofrecewaspaykichikmi, pactoytapas manam kasukunkichikchu.
8Qamkunaqa ñoqapaq sapaqchasqay kaqkuna ruwanaykichikpaq kamachikuykunatapas manam kasukurqankichikchu aswanqa huklaw nacionniyuq runakunamanñam qoykurqankichik.
9Chayraykum ñoqa Tayta Dios kaynata nini: Santuarioymanqa manam sonqonpi hinaspa cuerponpi mana señalasqa huklaw llaqtayuq runaqa yaykunqachu, Israelpa mirayninkunawan yachaq huklaw llaqtayuqkunapas manam yaykunqakuchu.
10Millakuypaq idolokunataña qatispa Israelpa mirayninkuna ñoqamanta karunchakuruptinkum, llapa levitakunapas saqeruwarqaku, chayraykum huchankumanta castigasqa kanqaku.
11Llapa levitakunam temploypi servikunqaku punkukunata waqaychaspanku chaynataq templopi wakin ruwana kaqkunatapas ruwaspanku. Paykunam lliw kañanapaq animalkunatawan llaqtapa ofrecesqan animalkunatapas nakanqaku, chayllam kanqaku llapa runakunata servinankupaqpas. 12Ichaqa paykunam Israelpa mirayninkunata servispanku idolokunata yupaychachirqaku, chaynatam huchallichirqaku; chay huchankumantam paykunaqa castigasqa kanqaku. Ñoqa Tayta Diosmi chaynata nini.
13Paykunaqa manam sacerdotekuna hinaqa serviwanankupaq asuykamuwanqakuchu, nitaqmi ñoqapaq sapaqchasqa kaqkunamanpas asuykunqakuchu. Paykunaqa millakuypaq kaqkunata ruwaspanku penqaypi kasqankutam apanqaku.
14Paykunatam churasaq temployta nanachikunankupaq chaynataq temploypi imapas ruwana kaqkunata ruwanankupaqpas.
Sacerdotekunamanta
15Israelpa mirayninkuna ñoqamanta karunchakuruptinkupas Leví ayllumanta kaq Sadocpa mirayninkunam ichaqa temploypi servikurqaku, paykunallam serviwananpaqqa asuykamuwanqaku. Paykuna asuykamuwaspankum animalpa wirantawan yawarninta ofrecemuwanqaku. Ñoqa Tayta Diosmi chaynata nini. 16Paykunam temployman yaykuspanku serviwanankupaq altarniyman asuykunqaku, hinaspam chaypi ruwana kaqkunata ruwanqaku. 17Uku patiopa punkunta yaykuspam linomanta ruwasqa pachawan pachakunqaku. Templopa uku law pationpi otaq templopi kaspankuqa amam millwamanta ruwasqa pachawanqa churakunqakuchu. 18#Ex 28.39-43; Lv 16.4.Paykunaqa umankupim linomanta uma wankinata apanqaku, churakunqakutaqmi linomanta calzoncillokunawanpas, sudachikuq pachawanqa amam churakunqakuchu. 19#Lv 16.23.Paykunaqa hawa patiopi runakunapa kasqanman manaraq lloqsichkaspam templopi servinankupaq churakusqanku pachata hurqokuspanku huk pachawan churakunqaku, hinaspam chay pachakunataqa chaypaq sapaqchasqa cuartopi saqenqaku, chaynapi chay pachakunawan llapa runakunata ama chuyancharunanpaq.
20 #
Lv 21.5. Amam chukchankutapas kachiy-kachiytaqa rutukunqakuchu, nitaqmi hatu-hatun kanankamapas wiñachikunqakuchu. 21#Lv 10.9.Templopa uku law pationman yaykuspanqa amam mayqan sacerdotepas vinotaqa tomanqachu. 22#Lv 21.7, 13-14.Payqa amam viudawanpas nitaq qosanmanta rakikuruq warmiwanpas casarakunqachu, casarakunqaqa Israelmanta kaq manaraq qari reqsiq sipaswanmi, otaq hukkaqnin sacerdotepa viudanwanmi.
23 #
Lv 10.10. Sacerdotekunaqa runaykunatam yachachinanku imam chuya kasqanta chaynataq imam millakuypaq kasqantapas, reqsichinqakutaqmi allin kaqta chaynataq mana allin kaqtapas. 24Quejakuna kaptinpas paykunam juezkuna hina kamachikuyniykunaman hina allin arreglota ruwanqaku. Kamachikuyniykunata ruwayman churaspankum fiestaykunapaq qosqay yachachikuykunatapas kasukunqaku, samana punchawniykunatapas waqaychanqakum.
25 #
Lv 21.1-4. Wañusqapa ayanmanqa amam asuykunqakuchu, chaynapi ama qachachakurunankupaq. Asuykuspaqa asuykunqaku tayta-maman, qari churin otaq warmi churin, wawqen otaq manaraq qari reqsiq panin wañukuptillanmi. 26Llapcharuspanqa chuyanchakuspanmi qanchis punchawtaraq suyanan. 27Chaymantam temploman serviwananpaq kutiykuspan huchamanta sacrificiota ofrecewanqa. Ñoqa Tayta Diosmi chaynata nini.
28 #
Nm 18.20. Sacerdotekunapa herencianqa ñoqallam kasaq, Israel nacionpiqa amam ima herenciatapas chaskinqakuchu, ñoqallam kani paykunapa herencianqa. 29Paykunaqa Israel miraykunapa ofrecewasqanku kawsaykunatam mikunqaku, mikunqakutaqmi hucharayku chaynataq culparayku ofrecemuwasqanku animalpa aychantapas. Israelpa mirayninkunapa ñoqapaq sapaqchasqankupas paykunapaqmi kanqa. 30#Nm 18.8-19.Paykunapataqmi kanqa tarpukuynikichikpa punta kaq rurunkunapas chaynataq ofrendakunapas. Tantata ruwanaykichikpaq masa ruwasqaykichikmantapas allinnintam qonkichik. Chaynapim wasikichikta bendecisaq. 31#Lv 22.8.Sacerdotekunaqa amam mikunqakuchu kikillanmanta wañuruq animalkunataqa alton pawaq kaptinpas otaq ima animal kaptinpas; amataqmi mikunqakuchu purun animalkunapa puchuntapas.
Currently Selected:
Ezequiel 44: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
