Ezequiel 42
42
Templopa waqtanpi wasikunamanta
1Chaymantam chay runaqa norte lawpi kaq hawa patioman aparuwarqa, hinaspam norte lawpi cuartokunaman pusaykuwarqa, chay cuartokunaqa kasqa templopa qepanpi kaq hatun wasipa chimpanpim hinaspa qepa law patiopa waqtanpim. 2Chay norte lawpi llapallan cuartokunapa largonmi kasqa pichqa chunka metro, anchonñataqmi kasqa iskay chunka pichqayuq metro. 3Chay cuartokunapa huklawninmi qawasqa uku lawpi chunka metro anchoyuq patioman, huklawninñataqmi qawasqa hawa lawpi empedrasqa patioman. Chay cuartokunaqa kasqa kimsa pisoyuqkamam hinaspam chimpa-chimpa qawanakusqa. 4Chay qawanakuq cuartokunapa chawpintam huk callejón yaykusqa pichqa metro anchoyuq, largonñataqmi kasqa pichqa chunka metro. Chay cuartokunapa punkunmi norte lawman qawasqa. 5Iskaynin altoskunapi cuartokunaqa taksallam kasqa pampapi kaq cuartokunamantaqa, sapa piso ukuniqpi ruwasqa kasqanrayku. 6Chay cuartokunaqa kimsa pisoyuq kachkaspapas manam patiopi cuartokuna hina pilarniyuqchu kasqaku, chayraykum altospi kaq cuartokunaqa uku pampapi cuartokunamantaqa taksalla kasqa.
7Hawa law patiopa waqtanpi qatinaslla cuartokunapa chimpanpi perqaqa kasqa iskay chunka pichqayuq metro largoyuqmi. 8Chay cuartokunapa chimpanpi perqam kasqa iskay chunka pichqayuq metro largoyuq, chayqa hawa law patiomanmi qawasqa. Chay callejonpa largonmi kasqa pichqa chunka metro. 9Punta kaq pisopi cuartokunamanqa hawa law pationta otaq intipa qespimunan law pationtam yaykuna kasqa. 10Sur lawpipas kasqataqmi chayna cuartokunaqa. Chay cuartokunam kasqa templopa qepanpi kaq hatun wasipa chimpanpi chaynataq qepa law patiopa waqtanpi. 11Chay sur lawpi cuartokunapa anchonpas chaynataq sayayninpas kasqa norte lawpi kaq cuartokunapa hinallam. 12Chay cuartokunamanpas intipa qespimunan lawnintam huk callejón yaykusqa, chay callejonmi qallarisqa intipa qespimunan law perqapa ñawpaqninpi.
13Chay runam niwarqa:
Patiopa ñawpaqninpi norte lawpi chaynataq sur lawpi cuartokunaqa “chuyam”. Chaypim Tayta Diosman asuykuq sacerdotekuna Diospaq sapaqchasqa ofrendakunata mikunqaku; chaypitaqmi churanqaku Tayta Diospaq sapaqchasqa ofrendakunatapas, chaykunam: Hucha pampachana ofrenda, hucharayku ofrenda hinaspa kawsaykunamanta ofrenda. Chay cuartokunaqa Diosllapaqña sapaqchasqam. 14Sichum temploman sacerdotekuna yaykurunqaku hinaspaqa, servisqanku chuya pachata hurqokuspallam hawa patiomanqa lloqsinqaku, chay pachakunaqa Diosllapaqña sapaqchasqam. Runakunapa kasqanman lloqsinankupaqqa huk pachawanmi churakunqaku, nispa.
Templopa canchonninta tupusqanmanta
15Chay runam templopa uku lawninpi kaqkunata tupuyta tukuruspan, intipa qespimunan lawpi punkunta hurqoruwarqa, hinaspam templopa hawa law muyuriqninta tupurqa. 16Tupuna kaspita hapiykuspanmi intipa qespimunan lawta tupurqa, hinaptinmi chaypa sayaynin kasqa iskay pachak pichqa chunka metro. 17Chaymantam norte lawta tupurqa, chaymi sayaynin kasqa iskay pachak pichqa chunka metro. 18Sur lawtapas tupuruptinmi kasqa iskay pachak pichqa chunka metro. 19Intipa seqaykunan lawmanpas tupuruptinmi kasqa iskay pachak pichqa chunka metro. 20Tawan lawnintam tupururqa. Templopa kasqan allpapa muyuriqninpim huk muralla kasqa iskay pachak pichqa chunka metro largoyuq. Chay murallam rakisqa Diospaq sapaqchasqa kaqkunata hawapi kaqkunamanta.
Currently Selected:
Ezequiel 42: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
