Ezequiel 41
41
1Chay runam templopa ukuman pusaruwarqa. Chaypim pilarkunapa muyuriqninta tupurqa, hinaptinmi kimsa metroyuqkama kasqa. 2Temploman yaykuq punkupa anchonmi kasqa pichqa metro, hapiqnin perqakunapa anchonñataqmi kasqa iskay metro partenkama. Chaymantam templopa chawpi salanta tupururqa, hinaptinmi largon kasqa iskay chunka metro, anchonñataqmi kasqa chunka metro. 3Chaymantam uku law salanman pasaykuspan pilarninkunapa muyuriqninta tupurqa, hinaptinmi kasqa huk metroyuqkama; punkuñataqmi kasqa kimsa metro anchoyuq, hapiqnin perqakunañataqmi kasqa kimsa metro parten anchoyuqkama. 4Tupurqataqmi templopa uku law salantapas, chaymi tawan lawnin kasqa chunka metrokama. Hinaspanmi chay tupuq runa niwarqa:
Kay salaqa “Chuyay-chuyaywan” sutichasqam, nispan.
Templopa waqtanpi cuartokunamanta
5Chay runam templopa perqankunata tupurqa, hinaptinmi kimsa metro anchoyuq kasqa. Chay templopa muyuriqninpim cuartokuna kasqa, chay cuartokunam kasqa iskay metro sayayniyuqkama. 6Chay cuartokunaqa kasqa kimsa pisoyuqmi, sapa pisopim kasqa kimsa chunka cuartokuna. Sapa pisopaqmi templopa perqan menosyasqa, chaynapi chay cuartokunapa qerunkuna chay patakpi tiyaspan templopa perqanman mana yaykunanpaq. 7Templopa muyuriqninpi kaq cuartokunapa anchonqa sapa pisopim yapakusqa. Chay cuartokunamanmi, kimsa kaq pisokama gradas qespisqa, chayninta qespinankupaq otaq uraykamunankupaqpas. 8Chaymantam rikurqani templopas chaynataq muyuriqninpi cuartokunapas kimsa metro altoyuq patakpa hawanpi ruwasqa kasqanta. 9Cuartokunapa hawa perqanqa kasqa iskay metro parten anchoyuqmi. 10Templopa muyuriqninpi cuartokunatam sacerdotekunapa cuartonkunamanta chunka metro anchoyuq callejón rakinasqa. 11Chay callejonmantam iskay punku lloqsisqa, hukninmi norte lawman hukninñataqmi sur lawman. Chay cuartokunapa muyuriqninpim huk callejón kasqa iskay metro parten anchoyuq.
Intipa seqaykunan lawpi kaq wasimanta
12Intipa seqaykunan lawpi patioman qawaq wasim kasqa kimsa chunka pichqayuq metro anchoyuq, sayayninmi kasqa tawa chunka pichqayuq metro; perqankunañataqmi kasqa iskay metro parten anchoyuq.
Templopa sayayninmanta
13Chaymantam chay runaqa templopa largonta tupurqa, hinaptinmi kasqa pichqa chunka metro largoyuq. Patiopa anchontawan wasita chaynataq perqankunatapas tupuruptinmi kasqa pichqa chunka metro. 14Templopa ñawpaqnintawan intipa qespimunan lawpi patiota tupuruptinmi kasqa pichqa chunka metro. 15Chaymantam tupurqa templopa qepanpi kaq hatun wasita chaynataq kaylaw-waklaw perqakunatapas, hinaptinmi kasqa pichqa chunka metroyuqkama. Chay wasiqa intipa seqaykunan law patiomanmi qawasqa.
Templopi imakunapas tarikuqmanta
Templo ukupi kaq salakunawan corredorqa 16tableasqam kasqa. Punkupa patakninkunapas, rejillayuq ventanankunapas chaynataq templopa muyuriqninpi kimsa pisoyuq cuartokunapa balconninkunapas tableasqam kasqa, chaynaqa kasqa pampanmanta ventanankamam. Ventanankunapas tableasqam kasqa. 17Tupurqataqmi punkumanta qallaykuspa templo ukukamapas, muyuriqninpi perqakunatapas hawanta-ukuntam tupurqa. 18Chay tableasqa tablakunapim tallasqa kasqa querubinkunawan palmera sachapa dibujonkuna. Chay querubinkunaqa sapakamam kasqa iskay uyayuqkama. 19Huknin uyanmi kasqa runapa uyan kaqlla, hinaspam palmera sachapa dibujon lawman qawasqa; huknin uyanñataqmi kasqa leonpa uyan kaqlla, chaypas huklawninpi palmera sachapa dibujon lawmanmi qawasqa. Templopa lliw muyuriqninpim chayna kasqa. 20Pampamanta punkupa hawankamam kasqa chay querubinkunapa dibujonkuna tallasqa, chaynallataq palmera sachapa dibujonkunapas; chaynaqa kasqa santuariopa muyuriq perqankunapim. 21Temploman yaykuq punkupa pilarninkunam kasqa tawa waqtayuqkama.
Tablawan ruwasqa altarmanta
Chuyay-chuyaywan sutichasqa cuartopa chimpanpiñataqmi kasqa 22tablamanta ruwasqa altar, tawan lawninmi kasqa huk metrokama, altoman sayayninñataqmi kasqa huk metro parten. Chay altarpaqa esquinankunapas, pampanpas hinaspa waqtankunapas tablamantam kasqa. Hinaptinmi chay runa niwarqa:
Kayqa Tayta Diospa qayllanpi kaq mesam, nispa.
Templopa punkunkunamanta
23Templopas chaynataq “Chuyay-chuyaywan” sutichasqa cuartopas iskay lawman kichakuq punkuyuqmi kasqa. 24Sapa punkum kaylaw waklawman kichakusqa. 25Templopa punkunkunapim tallasqa kasqa querubinman rikchaq chaynataq palmeraman rikchakuq dibujokuna, chaynallataqmi kasqa perqankunapipas hinaspa corredorpipas. Hawa law punkupim kasqa tablamanta balconkuna. 26Corredorpa kaylaw-waklawninpim kasqa rejillayuq ventanakuna, chay ventanakunapipas palmeraman rikchakuq dibujonkunam tallasqa kasqa. Templopa waqtanpi kaq cuartochakunapas balconniyuqkamam kasqa.
Currently Selected:
Ezequiel 41: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
