Ezequiel 40
40
Musoq templota visionpi Ezequiel rikusqanmanta
1Chunka tawayuq watañam Jerusalén llaqta tuñichisqa kasqanmanta pasarurqa, ñoqaykuñataqmi iskay chunka pichqayuq wataña Babiloniapi preso kachkarqaniku. Chay watapa punta kaq killanpa chunka kaq punchawninpim Tayta Dios hapiykuwaspa chay llaqtaman aparuwarqa. 2#Ap 21.10.Tayta Diosmi visionpi Israel allpaman aparuwaspan hatun orqopa puntanman churaykuwarqa. Chaymanta sur lawman qawariptiymi huk llaqtaman rikchakuq kachkasqa. 3#Ap 11.1; 21.15.Chayman aparuwaptinmi bronceman rikchakuq runata rikururqani. Paymi llaqtapa punkunpi sayachkasqa, linomanta cordeltawan tupuna kaspita aptarisqa. 4Chay runam niwarqa:
Runapa churin, allinta uyariway, hinaspayki tukuy ima rikuchisqayta allinta qaway, tukuy kaykunata qawachinaypaqmi kaymanqa pusamusqa karqanki. Tukuy ima rikusqaykitam Israelpa mirayninkunaman willanki, nispa.
Intipa qespimunan lawpi templopa punkunmanta
5 # 1 R 6.1-38; 2 Cr 3.1-9. Templopa hawa lawninpim huk murallata rikurqani. Chay runapa hapisqan tupunanmi kasqa kimsa metro sayayniyuq. Chay murallata tupuruptinmi kasqa kimsa metro sayayniyuq hinaspa kimsa metro anchoyuq. 6Chaymantam pasarqa templopa intipa qespimunan lawninpi punkuman; gradasninta qespiruspanmi punkupa chakankunata tupurqa, hinaptinmi kimsa metro anchoyuq kasqa. 7Chay punkupa iskay lawninpi cuartokunam kasqa kimsa metro largoyuq hinaspa kimsa metro anchoyuq. Huknin cuartomanta huknin cuartokamam kasqa iskay metro parten. Corredorman yaykuna temploman qawaq punkuñataqmi kasqa kimsa metro anchoyuq. 8Uku lawman yaykuna corredortapas tupuptinmi kasqa kimsa metro anchoyuq. 9Chay corredorpa largonta tupuptinmi kasqa tawa metro sayayniyuq, templo lawman lloqsina punkupa iskay lawninpi pilarkunañataqmi huk metro anchoyuqkama kasqa. 10Intipa qespimunan lawpi tarikuq punkupa waqtankunapim kaylaw-waklawpi kasqa kimsa cuartochakuna chay sayayniyuqkamalla, chaykunapa waqtankunapi pilarkunapas chay sayayniyuqkamallam kasqa.
11Chaymantam yaykuna punkupa anchonta tupurqa, hinaptinmi kasqa pichqa metro anchoyuq, largonñataqmi kasqa soqta metro parten. 12Cuartokunapa ñawpaqninpim kasqa taksa perqakuna parte metro anchoyuqkama. Chay cuartochakunam kasqa tawan lawninman kimsa metroyuqkama. 13Chaymantam yaykuna corredorpa anchonta kaylaw kuchunmanta waklaw kuchunkama tupurqa, hinaptinmi kasqa chunka iskayniyuq metro parten. 14Chaymantam patioman yaykuq corredorta tupuruptin kasqa chunka metro. 15Chay corredorpa largonmi punkupa hawa lawninmanta corredorpa uku law kuchunkama kasqa iskay chunka pichqayuq metro. 16Punku waqaychaqkunapa cuartonkunawan pilarninkunam kasqa rejillasqa ventanayuqkama, chay corredorpas uku law muyuriqninpi ventanayuqkamam kasqa. Pilarninkunapim palmeraman rikchakuq dibujokuna kasqa.
Hawa lawpi patiomanta
17Chaymantam pusaruwarqa templopa hawa law pationman. Chay patioqa muyuriqnin kuchunpi empedrasqam kasqa. Chay patiopa muyuriqninpim kasqa kimsa chunka cuartochakuna. 18Chay empedrasqaqa ukuniqpi ruwasqam kasqa, hinaspam punkupa waqtanta muyusqa, anchonpas kasqa chay corredorpa anchon sayayniyuqmi. 19Chaymantam tupurqa uray lawpi punkupa ñawpaqninmanta qallaykuspa uku law patiopa chimpankama, hinaptinmi norte lawmanpas chaynataq intipa qespimunan lawmanpas kasqa pichqa chunka metro.
Norte lawpi punkumanta
20Chay runaqa tupurqataqmi norte lawman qawaq punkupa largontawan anchontapas. 21Chay punkupa kaylaw-waklaw waqtanpim kasqa kimsa cuartochakuna, pilarkuna hinaspa corredorninpas; sayayninmi kasqa iskay chunka pichqayuq metro largoyuq, anchonñataqmi kasqa chunka iskayniyuq metro parten. 22Corredorninpas, ventanankunapas chaynataq dibujasqa palmerankunapas kasqa intipa qespimunan lawman qawaq punkupa sayaynin sayayniyuqllam. Chayman seqanankupaqmi kasqa qanchis gradaskuna, chay gradaskunapa ñawpaqninpiñataqmi kasqa huk corredor. 23Uku law patiopim huk punku kasqa norte lawman qawaq chaynataq intipa qespimunan lawman qawaq. Hinaptinmi chay punkumanta huknin punkukama tupuruptin kasqa pichqa chunka metro.
Sur lawman qawaq punkumanta
24Chaymantam sur lawman aparuwarqa, chaypim kasqa huk punku sur lawman qawaq. Chay punkupa corredornintawan pilarninkunata tupuruptinmi kasqa wakin punkukunapa sayaynin hinalla. 25Chay punkuwan corredorninmi kasqa muyuriqninpi ventanayuqkama. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro. 26Kasqataqmi qanchis gradasninkunapas, corredorninñataqmi uku lawman kasqa; pilarninkunapipas kaylaw-waklaw waqtanpim kasqa palmeraman rikchakuq dibujokuna. 27Uku law patiopas sur lawman qawaq punkuyuqmi kasqa. Chay punkumanta sur lawman qawaq punkukama tupuruptinmi kasqa pichqa chunka metro.
Templopa uku law pationman yaykuna punkumanta
28Chaymantam sur lawman qawaq punkuntakama uku law patioman aparuwarqa. Sur lawman qawaq punkuta tupuruptinmi kasqa wakin punkupa sayaynin sayayniyuqlla. 29Punku cuidaqkunapa cuartonkunapas, pilarninkunapas hinaspa corredorninpas kasqa punta kaqkunapa sayaynin sayayniyuqllam. Chay punkupas chaynataq corredorninpas muyuriqninpi ventanayuqmi kasqa. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten. 30Muyuriqninpim kasqa corredorkuna, sayayninmi kasqa chunka iskayniyuq metro parten, anchonñataqmi kasqa iskay metro parten. 31Chay corredorqa hawa law pationmanmi qawasqa, pilarninkunapim kasqa palmeraman rikchakuq dibujokuna, chay punkumanmi qespisqa pusaq gradaskuna.
32Chaymantam aparuwarqa intipa qespimunan lawman qawaq uku law patioman, chaypi tarikuq punkuta tupuruptinmi wakin punkukunapa sayaynin sayayniyuqlla kasqa. 33Punku cuidaqkunapa cuartonkunapas, pilarninkunapas hinaspa corredorninpas chay wakinpa sayaynin sayayniyuqllam kasqa. Chay punkupas chaynataq corredorninpas muyuriqninpi ventanayuqkamam kasqa. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten. 34Corredorninmi hawa law patioman qawasqa, kaylaw-waklaw waqtanpi pilarninkunapas kasqa palmerakunaman rikchakuq dibujoyuqmi; chay punkumanmi qespisqa pusaq gradaskuna.
35Chaymantam norte lawpi punkuman aparuwarqa, hinaptinmi tupuruptin kasqa wakin hina sayayniyuqlla. 36Punku cuidaqkunapa cuartonkunapas, pilarninkunapas hinaspa corredorninpas kasqa wakinpa sayaynin sayayniyuqllam. Sayayninmi kasqa iskay chunka pichqayuq metro, anchonñataqmi kasqa chunka iskayniyuq metro parten. 37Corredorninmi hawa law patioman qawasqa. Pilarninkunapas kaylaw-waklaw waqtanpi palmeraman rikchakuq dibujoyuqmi kasqa, chay punkumanmi qespisqa pusaq gradaskuna.
Norte lawpi tarikuq cuartokunamanta
38Kasqataqmi huk cuartopas corredor lawman punkuyuq, chay cuartopim lliw kañana ofrecenanku animalkunata mayllasqaku. 39Chay yaykuna corredorpim tawa mesakuna kasqa, kaylaw-waklawpi iskay; chaypa hawanpim lliw kañana sacrificiopaq, hucha pampachana ofrendapaq chaynataq hucharayku ofrendapaq animalkunata nakasqaku. 40Norte lawmanta yaykumuq corredorpa hawa lawninpipas, kaylawpim iskay mesakuna kasqa waklawpipas iskay mesataqmi kasqa. 41Chaynapim tawa mesakuna hawa lawpi kasqa, uku lawpipas tawataq; llapanqa kasqa pusaq mesakunam. Chaykunapa hawanpim animalkunamanta ofrendankuta nakasqaku. 42Diosman ofrecenanku lliw kañana sacrificiopaqmi kasqa rumimanta labrasqa tawa mesakuna. Chay mesakunapaqa tawan lawninmi kasqa qanchis chunka pichqayuq centimetroyuqkama; altoman sayayninñataqmi kasqa pichqa chunka centímetro. Chay mesakunapim churasqaku animalkunata nakananku serviciokunata. 43Chay cuartopa uku muyuriq perqanpim ganchokuna kasqa iskay chunka pichqayuq centímetro sayayniyuqkama, chay mesakunapa hawanpim churasqaku ofrecenanku aychakunata.
44Uku law patiopim kasqa takiqkunapaq iskay cuartokuna; hukninmi kasqa norte law punkupa waqtanpi sur lawman qawaspan, hukninñataqmi kasqa sur law punkupa waqtanpi norte lawman qawaspan.
45Hinaptinmi chay runa niwarqa:
Kay sur lawman qawaq cuartoqa templopi llamkaq sacerdotekunapaqmi. 46Kay norte lawman qawaq cuartoñataqmi altarpi llamkaq sacerdotekunapaq. Paykunam sacerdote Sadocpa mirayninkuna, paykunallam Leví castakunamantaqa servinankupaq Tayta Diosman asuykunqaku, nispa.
Templomanta
47Chay runam uku lawpi patiota tupururqa, hinaptinmi tawan lawninman kasqa pichqa chunka metro. Altarñataqmi templopa ñawpaqninpi kasqa. 48Templopa corredorninman aparuwaspanñataqmi punkupa waqtanpi pilarkunapa muyuriqninta tupururqa, hinaptinmi sapakama kasqa iskay metro partenkama. Punkuta hapiq perqakunañataqmi kasqa huk metro partenkama. 49Chay corredorpa largonmi kasqa soqta metro, anchonñataqmi kasqa chunka metro, chaymanmi qespisqa chunka gradaskuna. Chay pilarkunapa waqtanpim perqakuna kasqa.
Currently Selected:
Ezequiel 40: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
