Ezequiel 39
39
Gogpa vencesqa kasqanmanta
1Runapa churin, Gogpa contranpi profetizaspayki ñoqa Tayta Diospa nisqayta kaynata niy: Mesec hinaspa Tubal lawkunapi kamachikuq Gog, qampa contraykipim kachkani. 2Norte lawmanta aysamuspaymi Israel nacionpi orqokunaman pusamusqayki. 3Ichoq makikipi apasqayki arcotam pakirusaq, alleq makikipi apasqayki flechakunatam wikaparusaq. 4Chaynapim qamqa llapallan tropaykikunapiwan hinaspa qanwan hamuq nacionkunapiwan Israel nacionpa orqonkunapi wañunkichik, chaypim qamkunata alton pawaq animalkunaman hinaspa purun animalkunaman mikusunaykichikpaq qoykusqaykichik. 5Ayaykichikpas llutan pampapim wischurayanqa. Ñoqa Tayta Diosmi chaynata nini. 6Magog naciontapas chaynataq lamar qochapa patanpi hawkallaña kawsakuq nacionkunatapas kañaykusaqmi. Chaynapim Tayta Dios kasqayta yachanqaku. 7Israel llaqtaypim chuya sutiyta reqsichisaq, manañam saqesaqchu chuya sutiy penqayman churasqa kanantaqa. Chaynapim llapa nacionkunapas Israelpa chuya Diosnin kasqayta yachanqaku. 8Kay rimasqaykunaqa chayamuchkanñam, cumplikunqapunim. Ñoqa Tayta Diosmi chaynata nini.
9Israel nacionpi llaqtakunam lloqsimuspanku llapa armakunata, tukuy rikchaq escudokunata, arcokunata, flechakunata, lanzakunata chaynataq jabalinakunata kañanqaku. Chaykunam qanchis watapuni yantamanta servikunqa. 10Manañam montekunamanqa yanta pallaqpas lloqsinqakuñachu, nitaqmi sachatapas kuchunqakuñachu; aswanqa chay armakunam yantapi servikunqa. Ñawpaqta suwaqninkutam paykunaña suwanqaku, imankupas qechuqninkutam paykunaña qechunqaku. Ñoqa Tayta Diosmi chaynata nini.
Gogta pampanankumanta
11Chay tiempopim Gog pampakunanpaq Israel nacionpi huk sitiota qosaq, chay sitiom kachkan lamar qochapa intipa qespimunan lawninpi, illaqkunapa purinan qechwapi. Chaypim Gogtawan tropankunata pampanqaku, hinaptinmi llapa puriqkunapas mana pasayta atinqakuchu. Chayraykum chay sitiota Hamón-gog qechwawan sutichanqaku. 12Israelpa mirayninkunam allpanku limpio kananpaq ayakunata qanchis killapuni pampanqaku. 13Llapallan runakunam pampanqaku, chay punchawqa yuyarinanku punchawmi kanqa; chay punchawmi atiyniyuq kasqayta qawachikusaq. Ñoqa Tayta Diosmi chaynata nini. 14Chay qanchis killa pasaruptinmi runakunata minkanqaku lliw nacionta muyumuspanku tarisqanku ayakunata pampamunankupaq, chaynata nacionta limpianankupaq. 15Chay muyumuq runakunam runapa tullunta tariruspaqa chaypa waqtanpi huk señalta sayachinqaku, chaynapi pampaqkuna hamuspa Hamón-gog qechwapi pampanankupaq. 16Chaynatam llaqtata limpianqaku. Chaypitaqmi Hamona sutiyuq huk llaqtapas kanqa.
17Runapa churin, alton pawaq animalkunaman hinaspa purun animalkunaman ñoqa Tayta Diospa nisqayta kaynata nimuy: Tukuy hinastinmanta huñunakamuychik, Israel nacionpa orqonkunaman hamuychik, chaypim sacrificiota ruwasaq, chaypim aychata mikunkichik hinaspa yawarta tomankichik. 18Allinnin qari-qari soldadokunapa aychantam mikunkichik, kay pachapi kamachikuqkunapa yawarnintam tomankichik; paykunaqa rikchakunku allin cebasqa carnerokunamanraqmi, malta carnerokunamanraqmi, chivatokunamanraqmi hinaspa Basán lawpi poqosqa torokunamanraqmi. 19Ofrecespa wañuchisqaykunapatam wirantapas saksanaykichikkama mikunkichik, yawarnintapas sinkanaykichikkamam tomankichik. 20#Ap 19.17-18.Qamkunapaqmi caballokunapa, sillada tropakunapa, tropakunapa hinaspa guerrapi pelaqkunapa aychanwan huk convidota ruwapusqaykichik, hinaptinmi saksanaykichikkama mikunkichik. Ñoqa Tayta Diosmi chaynata nini.
Israel nacionpaq Tayta Diospa llakipayakuyninmanta
21Chaynatam huklaw nacionniyuq runakunaman atiyniyta qawachisaq, llapallan nacionkunam qawanqaku juzgaspay castigasqayta. 22Israelpa miraykunapas chay punchawmanta qepamanmi Tayta Dios kasqayta yachanqaku. 23Chaynapim huklaw nacionniyuqkunapas yachanqaku Israelpa mirayninkunaqa huchankurayku preso apasqa kasqankuta. Paykunataqa qepanchakuwasqankuraykum ñoqapas qepanchakururqani hinaspam enemigonkupa makinman qoykuptiy guerrapi wañuchisqa karqaku. 24Millakuypaq ruwasqankuman hinam hinaspa mana kasukuq kasqankuman hinam paykunataqa qepanchakururqani.
25Chayraykum ñoqa Tayta Dios kaynata nini: Jacobpa mirayninkunatam preso risqankumanta kutichimusaq, chuya sutiyraykum paykunataqa kuyapayarisaq, chaynapim sutiyta allinta qawachikusaq. 26Allpankupiña hawka mana pipapas manchachisqan kawsakuspankum, contraypi hatarispanku millakuypaq kaqkunata ruwasqankumanta penqakunqaku. 27Chaynaqa, kanqaku enemigonkupa allpanmanta hurqomuspay llapa nacionkunapa qawasqanta paykunapi chuya kasqayta qawachikuptiymi. 28Nacionkunaman presota apachisqaymanta mana chullatapas puchuykuspa allpankuman huñumuptiymi Tayta Dios kasqayta yachanqaku. 29Manañam paykunataqa haykapipas qepanchakusaqñachu, Espirituytam paykunaman chaqchurisaq. Ñoqa Tayta Diosmi chaynata nini.
Currently Selected:
Ezequiel 39: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
