Ezequiel 36
36
Israel nación bendecisqa kananmanta
1Runapa churin, Israel nacionpi orqokunaman ñoqa Tayta Diospa nisqayta kaynata niy: 2Israel nacionpa enemigonkunam kaynata ninku: “Wiñaypaq kaq orqokunaqa ñoqanchikpañam”, nispanku.
3Chaynaqa, ñoqa Tayta Diospa nisqayta kaynata profetizay: Qamkunataqa kayninta chayninta atacamuspam tuñichisurqankichik. Huklaw nacionkunam qamkunamanta munaychakururqaku; llapa runakunañataqmi qamkunamanta burlakuspa asikurqaku.
4Chaynaqa, Israel nacionpi orqokuna Tayta Diospa nisqanta uyariychik. Orqokunata, moqokunata, qechwakunata, wayqokunata, purmachisqa llaqtakunata hinaspa chunnichisqa llaqtakunatam Tayta Dios kaynata nin: Qamkunam muyuriqnikichikpi llaqtakunapa suwasqan karqankichik, chay llaqtakunam qamkunamanta burlakuspa asikurqaku.
5Ñoqaqa cheqaptapunim llapa nacionkunapa contranpi piñakuruni, Edompaqmi mastaqa piñasqa kachkani. Paykunaqa kusikuywan hinaspa hatun despreciowanraqmi allpayta hapikuykuspanku chakraykunatapas saquearqaku.
6Chaynaqa, Ñoqa Tayta Diospa nisqayta Israel allpa imayna kaynanmanta profetizamuy: Orqokuna, moqokuna, qechwakuna, wayqokuna, Tayta Diosmi kaynata nisunkichik: Wakin nacionkunapa penqayman churasusqaykichikmantam chay nacionkunapaq llumpayta piñakuruni.
7Chayraykum ñoqa Tayta Dios kaynata nini: Chay muyuriqnikichikpi nacionkunam penqayman churasqa kanqaku. 8Israel nacionpi orqokuna, qamkunam ichaqa kallmasapallaña sachayuq kankichik. Qamkunaqa Israel runaykunapaqmi sumaqllataña rurunkichik, paykunapa kutimunanqa hichpamuchkanñam. 9Waqaychaptiymi qamkunaqa yapusqa hinaspa tarpusqa kankichik.
10Ñoqapunim chaypi yachaq Israel runakunata mirachisaq. Llaqtakunapas runakunapa musoqmanta yachananmi kanqaku. Purmasqa raqaykunapas huktawan hatarichisqam kanqaku. 11Qamkunapi kaq runakunatapas, animalkunatapas ñoqam mirachisaq. Chaynapim paykunaqa nana-nanaqta miranqaku. Ñawpaq tiempopi hinaraqmi qamkunataqa chaypi kawsachisqaykichik. Qamkunataqa ñawpaq tiempomantapas aswan allintaraqmi ruwasqaykichik. Chaynapim Tayta Dios kasqayta yachankichik.
12Israel nacionpi orqokuna, runaykunatam qamkunapi purichisaq. Paykunapa herencianñam kankichik. Wawa-churinkutapas manañam wañuchinkichikñachu.
13Ñoqa Tayta Diosmi kaynata nini: “Orqokuna, runa mikuq kasqaykichikmantam rimanku. Qamkunapi yachaq llaqtakunatapas mikuruspas mana wawa-churiyuqtaña saqerunkichik”. 14Ichaqa manañam huktawanqa runakunata mikunkichikñachu nitaqmi nacionnikichikpi wawakunatapas wañuchinkichikñachu. Ñoqa Tayta Diosmi chaynata nini.
15Manañam huklaw nacionniyuqkunapa kamikuynintawan tratakuynintaqa uyarichisqaykichikñachu. Nacionnikichikpi wawa-churikunatapas manañam wañuchinkichikñachu. Ñoqa Tayta Diosmi chaynata nini.
16Tayta Diosmi kaynata niwarqa:
17Runapa churin, Israelpa mirayninkuna allpankupi yachaspaqa mana allin kawsayninkuwan chaynataq mana allin ruwayninkuwanmi millakuypaqtaña ruwarurqaku; paykunapa kawsasqankuqa qayllaypim karqa, imaynam killanwan onqoq warmipa qachan hina. 18Chayraykum chay nacionta yawarta chaqchuspanku idolokunawan millakuypaqta ruwasqankumanta llumpay piñakuyniywan castigarqani. 19Chayna mana allin ruwasqankumanta castigaspaymi tukuy hinastinpi kaq nacionkunaman cheqerachirqani. 20Maylaw nacionmanña rispapas ñoqapa chuya sutiytam penqayman churarqaku. Runakunam kaynata niqku: “Kay runakunaqa Tayta Diospa runankuna kachkaspapas nacionninkumantam lloqsiramunku”, nispanku.
21Israelpa mirayninkuna maymi chayasqanku nacionkunapi chuya sutiyta penqayman churasqankuta qawaspaymi llumpay llakisqa karqani.
22Chaynaqa, ñoqa Tayta Diospa nisqayta Israelpa mirayninkunaman kaynata willay: Israelpa mirayninkuna, kay ruwasqaytaqa manam qamkunaraykuchu ruwasaq, aswanqa chuya sutiyraykum. Qamkunaqa mayman rispapas chuya sutiytam penqayman churarqankichik. 23Llapa nacionkunapa chawpinpi penqayman churasqaykichik sutiytam paykuna qawasqanta chuyanchasaq. Chaynapim Tayta Dios kasqayta yachanqaku. Ñoqa Tayta Diosmi chaynata nini.
24Ñoqapunim lliw nacionkunamanta hurqomusqaykichik, chaykunamanta huñumuspam allpaykichikman kutichisqaykichik. 25Imawanpas qachachakusqaykichiktam chuya yakuwan mayllasqaykichik, idolokunawan qachachakusqaykichikmantam chuyanchasqaykichik. 26Musoq sonqotaña churaykuspaymi musoq espiritutaña qosqaykichik. Rumi sonqoykichikta hurqoruspaymi aycha sonqotaña churasqaykichik.
27Espirituyta qoykuspaymi decretoykunata cumplichisqaykichik, chaynapim kamachikuyniykunatapas kasukunkichik. 28#Ez 11.19-20.Ñawpaq taytaykichikkunaman qosqay allpapiña kawsaspam runaykunaña kankichik, ñoqañataqmi Diosnikichik kasaq. 29Manaña imawanpas qanrachakunaykichikpaqmi waqaychasqaykichik. Trigotapas llumpayta ruruchiptiymi manaña huktawanqa yarqaymanta kankichikñachu. 30Sachaykichiktapas llumpaytam ruruchisaq, chakraykichikpi cosechakunatapas allintam qespichisaq, chaynapim huklaw nacionniyuqkunapa qayllanpiqa manaña yarqaymantapas kankichikñachu.
31Chaynapim qamkunaqa mana allin kawsasqaykichiktawan mana allin ruwasqaykichikta yuyarinkichik, hinaspam mana allinkunata ruwaspa huchallikusqaykichikmanta penqakunkichik. 32Israel runakuna, allinta yachaychik, kaykunataqa manam qamkunaraykuchu ruwasaq. Qamkunaqa mana allin ruwasqaykichikmantayá penqakuychik. Ñoqa Tayta Diosmi chaynata nini.
33Ñoqa Tayta Diosmi kaynata nini: Mana allin ruwasqaykichikkunamanta chuyancharuspaymi yachanaykichik llaqtakunapi huktawan kawsachisqaykichik, purmasqa raqaykunapas huktawan hatarichisqam kanqa. 34Purmasqa chakrakunapas llapallan puriqkunapa qawasqantam tarpusqa kanqa.
35Hinaptinmi ninqaku: “Kay purmasqa chakraqa Edén lawpi huerta hinaraqmi rikurirun; tuñichisqa, purmachisqa hinaspa chunnichisqa llaqtakunapas kunanqa murallasqa hinaspa runakunapa yachasqan llaqtakunañam kachkan”, nispanku.
36Chaynapim muyuriqnikichikpi qepaq nacionkuna yachanqaku tuñichisqa kaqkunata ñoqa Tayta Dios musoqmanta hatarichisqayta, purmachisqa chakrakunatapas kaqllamanta tarpusqayta. Ñoqa Tayta Diosmi chaynata nini, nisqayqa ruwasqam kanqa.
37Ñoqa Tayta Diosmi kaynata nini: Chaywanpas ñoqaqa Israel llaqtapa qayakusqanraqmi kasaq kaykuna ruwanaypaq: Paykunatam ovejakunata hina achkallataña mirarachisaq. 38Imaynam fiesta punchawkunapi sacrificanankupaq nana-nanaq ovejakuna pusasqanku Jerusalén llaqtapi tarikun, chaynam purmasqa llaqtakunapas nana-nanaq runakunapa huntaykusqan kanqaku. Chaynapim Tayta Dios kasqayta yachanqaku.
Currently Selected:
Ezequiel 36: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
