Ezequiel 37
37
Visionpi chakisqa tullukuna rikusqanmanta
1Tayta Diosmi atiyninwan huntaykuwarqa, chaymi Diospa Espiritun aparuwaspan chakisqa tullukunapa kasqan wayqoman churaykuwarqa. 2Paymi kayman chayman pusaykachawarqa; chay tullukunaqa achkallaña kasqankuraykum qechwatapas pampaykurqakuraq, ichaqa pasaypaq chakisqakamam kasqaku. 3Hinaptinmi Tayta Dios niwarqa:
Runapa churin ¿creenkichu kay tullukuna kawsarinanta? nispa.
Chaymi ñoqañataq nirqani:
Dios Taytalláy, qamllam chaytaqa yachanki, nispay.
4Hinaptinmi Tayta Dios niwarqa: Kay chakisqa tullukunaman kaynata profetizay:
5¡Chakisqa tullukuna! Tayta Diosmi kaynata nisunkichik: Kawsarinaykichikpaqmi kawsay samayta qosqaykichik. 6Ankukunatam churasqaykichik, aychawanmi huntaykachisqaykichik, aycha qarawan qarachaykuspaymi kawsarinaykichikpaq kawsay samayta qosqaykichik, chaynapim Tayta Dios kasqayta yachankichik, nispa.
7Tayta Diospa kamachiwasqanman hinam profetizarqani. Rimachkaspaymi huk qapariyta uyarirqani, allpa pachapas kuyurirqam, hinaptinmi llapa tullukuna tullupura tinkinakurqaku. 8Qawarispaymi rikurqani, ankukunawan aycha rikurimusqanta hinaspa qaran tapaykusqanta. Ichaqa manaraqmi kawsarqakuchu.
9Chaymantam Tayta Dios niwarqa:
Runapa churin, kawsachikuq samayta kaynata niy: Tayta Diosmi kaynata nisunki: ¡Kawsachikuq samay, tawan lawmanta hamuspa kay wañusqakunata kawsarichiy! nispa.
10 #
Ap 11.11. Tayta Diospa kamachiwasqanman hina profetizaptiymi, chay kawsachikuq samayqa wañusqakunaman yaykururqa, hinaptinmi kawsariruspa sayarirurqaku. Paykunaqa nana-nanaq tropakuna hinañam karqaku. 11Chaymantam Tayta Dios niwarqa:
Runapa churin, kay tullukunaqa Israelpa llapallan mirayninkunam. Paykunam nichkanku: “Tullunchikkunaqa chakisqam kachkan, manañam ima ruwaytapas atichwanñachu, pasaypaq chinkasqam kachkanchik”, nispanku. 12Chaynaqa, runapa churin, ñoqa Tayta Diospa nisqayta kaynata niy: Runallaykuna, sepulturaykichikta kichaykuspaymi qamkunataqa kikiypuni hurqomusqaykichik, hinaspam allpaykichikman kutichimusqaykichik. 13Runallaykuna, sepulturaykichikta kichaykuspay chaymanta hurqomuptiymi Tayta Dios kasqayta yachankichik. 14Kawsanaykichikpaq espirituyta qoykuspaymi kikikichikpa allpaykichikpi churaykusqaykichik, chaynapim imam rimasqaykuna cumpliq kasqayta yachankichik. Ñoqa Tayta Diosmi chaynata nini.
Judá nacionwan Israel nación hukllawanakusqanmanta
15Tayta Diosmi huktawan rimapayawaspan kaynata niwarqa:
16Runapa churin, huk kaspita hapiykuspa hawanpi kaynata qellqay: “Kayqa Judapaqwan hukllawakuqnin wakin Israelpa miraykunapaqmi”, niqta. Huk kaspitapas hapispa chaypa hawanpi kaynata qellqay: “Kayqa Joseypa rantinpi kaq Efrainpaqwan hukllawakuqnin Israelpa wakin mirayninkunapaqmi”, niqta. 17Chay iskaynin kaspita makikipi hukllaman huñunay.
18Sichum llaqtamasikikuna tapusunki: “Willawaykuyá ¿ima ninantaq kayqa?” nispanku, hinaptinqa 19ñoqa Tayta Diospa nisqaytam kaynata ninki: Ñoqam hapisaq Efrainpa makinpi kaq Joseypa kaspinta chaynataq hukllawakuqnin Israelpa mirayninkunatapas, hinaspaymi Judapa kaspinman hukllawaykusaq, iskayninkutam hukllataña ruwasaq, chaynapim makiypi hukllaña kanqaku, nispayki.
20Chaynaqa, Ezequiel, paykuna qawachkaptinmi chay qellqasqayki kaspikunataqa hapinki. 21Hinaspaykim ñoqa Tayta Diospa nisqayta kaynata ninki: Israelpa mirayninkunataqa tukuy hinastinman risqanku nacionkunamanta huñumuspaymi allpankuman kutichimusaq. 22Kay allpapim, Israel law orqokunapim, paykunataqa huk nacionllataña ruwasaq, huk reyniyuqllañam kanqaku, manañam haykapipas iskayman rakinasqaqa kanqakuñachu. 23Manañam millakuypaq idolokunawanqa qachachakunqakuñachu, manañataqmi imawanpas huchallikunqakuñachu. Contraypi hatarispanku huchallikusqankumanta salvaykuspaymi huchankuta mayllaykusaq; paykunam llaqtay kanqaku, ñoqañataqmi Diosninku kasaq.
24 #
Ez 34.24. Serviqniy Davidmi paykunapa reynin kanqa, payllaña llapankupa michiqnin kaptinmi decretoykunaman hina kawsaspa kamachikuyniykunata kasukunqaku. 25Paykunaqa serviqniy Jacobman qosqay allpapiñam yachanqaku. Chaypim ñawpaq taytankupas yacharqaku, chaypitaqmi paykunapas, churinkunapas hinaspa mirayninkunapas wiñaypaq yachanqaku. Serviqniy Davidñataqmi wiñaypaq kamachiqninku kanqa.
26Hawka kawsakunankupaqmi paykunawan pactota ruwasaq. Chay pactoqa wiñaypaqmi kanqa. Paykunata anchallataña mirachispaymi temploytapas chawpinkupi wiñaypaq churasaq. 27#2 Co 6.16; Ap 21.3.Chaynapim paykunawan yachaspa Diosninku kasaq, paykunañataqmi llaqtay kanqaku. 28Ñoqapa temploy paykunapa chawpinpi wiñaypaq kaptinmi, wakin nacionkunapas yachanqaku Israel nacionqa ñoqapa sapaqchakusqay kasqanta.
Currently Selected:
Ezequiel 37: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
