Ezequiel 35
35
Edom nacionpa contranpi profetizasqanmanta
1Tayta Diosmi kaynata niwarqa:
2 #
Is 34.5-17; 63.1-6; Jer 49.7-22; Ez 25.12-14; Am 1.11-12; Abd 1-14; Mal 1.2-5. Runapa churin, Seir orqota qawarispa contranpi profetizaspa ñoqa Tayta Diospa kayna nisqayta niy:
3Seir orqo, contraykipim kachkani,
atiyniywanmi castigasqayki,
purmarachispaymi chunnirachisqayki.
4Llaqtaykikunatapas tuñirachispaymi purmarachisaq.
Chaynapim Tayta Dios kasqayta yachanki.
5Qamqa Israelpa mirayninkunapa wiñaypaq enemigonmi karqanki, mana allin ruwasqankumanta ñakariypi kachkaptinkupas guerrawanraqmi paykunataqa hapirqanki. 6Chayraykum ñoqa Tayta Dios kaynata nini: Wañuyman qoykuptiymi qamtaqa wañuyllaña qatikachasunki, runa wañuchisqaykimantam wañuy qatikachasunki. 7Seir orqotam manaña imapa kanan chunniqman tikrarusaq, chayninta puriqkunatapas wañuchisaqmi. 8Orqonkunatawan moqonkunatapas, qechwankunatawan wayqonkunatapas guerrapi wañuqkunapa ayankunawanmi huntarachisaq. 9Wiñaypaq chunniqmanñam tikrarusqayki, llaqtaykikunapipas manañam pipas yachanqañachu. Chaynapim Tayta Dios kasqayta yachanki.
10Qanmi nirqanki: “Israelpa mirayninkunapa iskaynin nacionninqa ñoqapañam kanqa, Tayta Dios chaypi kachkaptinpas ñoqam hapikuykusaq”, nispayki. 11Ichaqa ñoqa Tayta Diosmi kaynata nini: Imaynam Israelta cheqnikuyllawanña hinaspa piñakuyllawanña ruwasqaykita hinam qamtapas ruwasqayki. Qamta castigaruptiymi pim kasqayta reqsiwanqaku. 12Chaynapim yachanki Israel lawpi orqokunamanta burlakuspa rimasqaykita ñoqa Tayta Dios uyarisqayta. Qanmi nirqanki: “Purmachisqam kachkanku, kunanqa ñoqanchikpañam kanqa”, nispayki. 13Qamqa mana upallaykuspam ñoqapa contraypi rimarqanki, contraypi rimasqaykitam ñoqaqa uyariruni.
14Chaynaqa, ñoqa Tayta Diosmi kaynata niki: Qamta purmarachiptiymi kay pachapi llapallan runakuna kusikunqaku. 15Israelpa mirayninkunapa herencianku allpa purmachisqa kaptinmi kusikurqanki, chaynatapunim qanwanpas ruwasaq:
Seir orqom purmachisqa kanqa,
Edom nacionmi purmachisqa kanqa.
Chaynapim Tayta Dios kasqayta yachanqaku.
Currently Selected:
Ezequiel 35: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
