Ezequiel 34
34
Israelpa mana allin michiqninkunamanta
1Tayta Diosmi rimapayawaspan kaynata niwarqa:
2Runapa churin, Israelpa michiqninkunapa contranpi ñoqa Tayta Diospa nisqayta kaynata niy: ¡Israelpa michiqninkuna, kikillaykichikta michikuqkuna, imallapiraq rikukunkichik! Michiqkunaqa ovejakunatam michinanku. 3Ovejakunapa lechentam tomakunkichik, millwanmantam pachata ruwakunkichik, poqosqan kaqkunatañataqmi nakakuykuspa mikukunkichik, ovejakunamantam ichaqa mana imapas qokusunkichikchu.
4Eqoyaruq ovejakunatapas manam kallpanchankichikchu, onqoruqtapas manam hampiykunkichikchu, chakin pakikuruqtapas manam wataykunkichikchu, chullaruqkunatapas manam kutiykachinkichikchu, chinkaruqkunatapas manam maskamunkichikchu, aswanqa maqa-maqarispam paykunapi munaychakunkichik. 5#Mt 9.36; Mr 6.34.Chayraykum llapa ovejakunaqa cheqesqa mana michiqniyuq kachkanku. 6Orqokunapim, alto moqokunapim cheqeruspa llutanpi purillachkanku, tukuy hinastinman cheqesqam kachkanku, manam pipas maskaqninku kanchu, nitaqmi tapuyllapas tapukunkuchu.
7Chaynaqa, llapa michiqkuna, ñoqa Tayta Diospa nisqayta uyariychik: 8Sutiyraykum kaynata nini: Mana michiqniyuq kasqankuraykum ovejaykunata tukuy rikchaq purun animalkuna hapiruspa mikukurunku. Ovejay michiqkunapas manam maskamunkuchu; kikillanku michikuspankum ovejaykunataqa mana michinkuchu 9Chaynaqa, llapa michiqkuna nisqayta uyariychik.
10Ñoqa Tayta Diosmi kaynata nikichik: Michiqkuna, contraykichikpim kachkani, qamkunamantam ovejaykunata mañasqaykichik; manaña michiqnin kanaykichikpaqmi qarqorusqaykichik, chaynapim manaña kikillaykichiktaqa michikunkichikñachu. Ovejaykunatam simikichikmanta qechurusqaykichik, chaynapi manaña mikunaykichikpaq.
Allin michiqmanta
11Ñoqa Tayta Diosmi kaynata nini: Kikiyñam ovejaykunata maskamuspay nanachikusaq. 12Imaynam huk michiq ovejankuna cheqeruptin maskamun, chaynam ñoqapas ovejaykunata maskamusaq; hinaspaymi tutayaq yana puyupa tapaykusqan punchawpi tukuy hinastinman cheqerusqankumanta libramusaq. 13Huklaw nacionniyuq runakunapa chawpinmantam huñumusaq, hinaspam kikinkupa allpanman pusamuspay Israel law orqokunapi, yaku patan wayqokunapi, runapa yachanan pampakunapi michisaq. 14Suma-sumaq pastokunapi michiptiymi kanchankupas kanqa Israel law orqonkunapi; chaypim sumaq kanchakunapi samaspanku Israel orqokunapi wiñaq sumaq pastokunata mikunqaku. 15Kikiyñam ovejaykunata michisaq, kikiytaqmi samanankumanpas qatisaq. Ñoqa Tayta Diosmi chaynata nini.
16Chinkasqa ovejakunatam maskamusaq, chullaruqtam kutichimusaq, chakin pakisqakunatam wataykusaq, eqoyasqakunatam marqarikusaq. Poqosqakunatawan kallpasapankunatam ichaqa puchukarachisaq, imam kaqman hinam michisaq.
17Ovejallaykuna, qamkunatam ichaqa ñoqa Tayta Dios kaynata nikichik: Ñoqaqa allin arregloman hinam juzgasqaykichik carnerokunatapas chaynataq chivatokunatapas. 18¿Allinpaqchu hapinkichik allinnin pastota mikukuruchkaspa puchuqnintañataq saruparuyta? ¿Allinpaqchu hapinkichik chuya yakuta tomakuruchkaspa puchuqnintañataq putkacharuyta? 19Chaynapim ovejaykunaqa qamkunapa sarupasqaykichikta mikuspanku putkacharusqaykichik yakutaña tomanku.
20Chayraykum ñoqa Tayta Dios kaynata nikichik: Ñoqam wira ovejakunatawan tulluyasqa ovejakunata allin arreglota ruwasaq. 21Qamkunam eqoyasqa ovejakunatapas hombroykichikwan tanqaykarinkichik hinaspam waqrapaspaykichik kayman chayman cheqerachinkichik.
22Ichaqa kikiymi ovejaykunata libramusaq, manañam pipas suwanqañachu. Ñoqam ovejapurata allin arreglota ruwasaq. 23#Ap 7.17.Ñoqam ovejaykuna michiqta hatarichisaq, payñam ovejaykunata michinqa. Payqa serviqniy Davidmi, payñam michiqninku kaspa ovejaykunata nanachikunqa.
24 #
Ez 37.24. Ñoqa Tayta Diosmi paykunapa Diosnin kasaq, serviqniy Davidñataqmi kamachiqninku kanqa. Ñoqa Tayta Diosmi chaynata nini. 25Ovejaykunawanmi hawkaña kawsakunankupaq huk pactota ruwasaq. Mikukuq purun animalkunata nacionninkumanta chinkarachiptiymi chunniqpipas hawkaña kawsakunqaku, montekunapipas hawkañam puñukunqaku.
26Akllakusqay orqopa muyuriqninpi paykunata churaykuspaymi bendeciykusaq, paratapas tiempollanpim chayachimusaq, chay paraqa hatun bendicionmi kanqa. 27Campopi sachakunapas sumaqllatañam rurunqa, chakrapas achkanpim rurunqa, hinaptinmi paykunaqa chakrankupiña hawka kawsakunqaku. Servichikuqninku nacionkunapa yugo churasqanta pakiruspa libraykuptiymi Tayta Dios kasqayta yachanqaku.
28Huklaw nacionniyuq runakunaqa manañam paykunapiqa munaychakunqañachu, nitaqmi purun animalkunapas mikunqañachu. Manaña pipapas manchachisqanmi hawkaña kawsakunqaku. 29Ancha ruruq allpata paykunaman qoykuptiymi yarqaymantaqa manaña ñakarinqakuñachu, nitaqmi huklaw nacionkunapas paykunataqa asipayanqakuñachu.
30Chaynapim yachanqaku ñoqa Tayta Dios paykunawan kasqayta; paykunam llaqtay kanqaku ñoqañataqmi Diosninku kasaq. Ñoqa Tayta Diosmi chaynata nini.
31Runaykunaqa ovejaykunam kankichik, michinay pampapi kaq ovejaykunam kankichik, ñoqañataqmi Diosnikichik kani. Ñoqa Tayta Diosmi chaynata nini.
Currently Selected:
Ezequiel 34: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
