Éxodo 7
7
1Hinaptinmi Moisesta Tayta Dios nirqa:
Qamtaqa Faraonpaqmi ñoqapa rantiypi churayki, wawqeki Aaronñataqmi profetayki kanqa, 2paymanmi ñoqapa tukuy ima kamachisqaykunata ninki, hinaptinmi wawqeki Aaronñataq Faraonman nimunqa Israelpa mirayninkunata Egipto nacionmanta kacharinanpaq. 3#Hch 7.36.Ichaqa ñoqam Faraonpa sonqonta rumiyarachisaq, hinaspaymi Egipto nacionpi achka-achka señalkunatawan admirakuypaq kaqkunata ruwasaq. 4Chaywanpas Faraonqa manam uyarisunkichikchu, chaymi Egipto nacionta ñakarichispay Israelpa mirayninkunata tropaykunata hina hurqosaq. 5Egipto runakunaman atiyniyta qawachispay Israelpa mirayninkunata paykunapa chawpinmanta hurqoptiymi, Egipto runakuna yachanqaku ñoqa Tayta Dios kasqayta.
6Chaymi Moiseswan Aarón, Tayta Diospa kamachisqanman hina ruwarqaku. 7Faraonwan rimasqan tiempopim Moisesqa pusaq chunka watanpiña karqa, Aaronñataqmi pusaq chunka kimsayuq watanpiña karqa.
Aaronpa tawnan maqta uruman tikrakusqanmanta
8Moisestawan Aarontam Tayta Dios nirqa:
9“Milagrota qawachiway” nispa Faraón nisuptikichikqa, Aarontam ninki: Tawnaykita hapispa Faraonpa ñawpaqninman wischuykuy maqta uruman tikrakunanpaq, nispa.
10Moiseswan Aaronmi, Faraonpa qayllanman yaykuspanku Tayta Diospa kamachisqanman hina ruwarqaku. Chaymi Faraonpa hinaspa serviqninkunapa ñawpaqninman tawnanta Aarón wischuykuptin maqta uruman tikrakururqa. 11Faraonpas yachaysapa runakunatawan layqakunata qayachiptinmi, Egipto nacionniyuq layqakunapas layqayninkuwanmi chaynata ruwarqaku. 12Sapakama tawnankuta wischuykuptinkum chaykunapas maqta uruman tikrakururqa, ichaqa Aaronpa tawnan maqta uruman tikrakuqmi paykunapa maqta uruman tikrakuq tawnankuta millpururqa. 13Chaywanpas Tayta Diospa nisqanman hinam Faraonpa sonqon rumiyarurqa, chaymi paykunata mana kasurqachu.
Yakukunapa yawaryasqanmanta
14Chaymantam Moisesta Tayta Dios nirqa:
Faraonqa sonqon rumiyasqa kaptinmi llaqtayta mana kachariyta munanchu. 15Faraonman tutapayta riy, payqa Nilo mayutam rinqa, chaymi mayupa patanpi paywan tupanaykipaq suyanki, apankitaqmi maqta uruman tikrakuruq tawnatapas. 16Hinaspam payta ninki: Hebreo runakunapa Diosninmi kachamuwan qanman kaynata ninaypaq: Chunniqpi yupaychamuwananpaq llaqtayta kachariy, nispa. Ichaqa kunankama mana kasuwasqaykiraykum 17#Ap 16.4.Tayta Dios kaynata nin: Kunanmi Tayta Dios kasqayta yachanki, makiypi tawnawan Nilo mayuta waqtaruptinmi yawarman yaku tikrakurunqa. 18Chaymi mayupi kaq challwakunapas wañurunqa, mayupas asnariruptinmi Egipto runakunaqa mayupi yaku tomaytapas millakurunqaku, nispa.
19Moisestam Tayta Dios nirqa:
Aaronta niy: Tawnaykita hapispa makikita haywariy Egipto nacionpi mayukunapa, yarqakunapa, qochakunapa, qocharayaq yakukunapa hinaspa llapachallan yakukunapa hawanman chaynapi yawaryarunanpaq. Chaymi lliw Egipto nacionpi, kullumanta chaynataq rumimanta yaku churanankupipas yawar kanqa, nispayki.
20Chaymi Tayta Diospa kamachisqanta hina Moiseswan Aarón ruwarqaku. Tawnanta hoqarispanmi Faraonwan serviqninkuna qawachkaptinku mayuta waqtarurqa, hinaptinmi Nilo mayupi yakukuna yawarman tikrakururqa. 21Challwakunapas wañuruptinmi mayu asnarirurqa Egipto runakunapas mana tomay atinankukama. Lliw Egipto nacionpim yawar karqa.
22Egipto nacionniyuq layqakunapas layqayninkuwan chaynata ruwaptinkum Faraonpa sonqon rumiyarurqa, chaymi Tayta Diospa nisqanpi hina Moisestawan Aaronta mana kasurqachu. 23Chaymantam palacionman Faraón kutikurqa, paytaqa chaykunamantaqa manam imapas qokurqachu. 24Egipto runakunañataqmi mayumanta yakuta mana tomayta atispanku mayupa patanpi uchkurqaku limpio yakuta maskaspanku.
25Nilo mayuta Tayta Diospa waqtachisqanmantam qanchis punchawña pasarurqa.
Currently Selected:
Éxodo 7: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
