Éxodo 6
6
1Chaymi Moisesta Tayta Dios nirqa:
Kunanmi Faraonta imam ruwasqayta qawanki, atiyniywan ñakarichiptiyñam kacharisunkichikqa, hinaspam nacionninmanta kikin qarqosunkichik, nispa.
Moisesta huktawan Dios kamachisqanmanta
2Moisesta rimapayaspam Tayta Dios nirqa:
Ñoqam Tayta #6.2 Hebreo simipi Diospa sutinqa YHWH ninanmi. Runa simipiñataqmi “Tayta Dios”.Dios kani. 3#Ex 3.13-15.Abrahamman, Isaacman hinaspa Jacobmanmi rikurirqani “Tukuy Atiyniyuq Dios” sutiywan reqsichikuspay; “Tayta Dios” sutiypim ichaqa paykunaman manaraq reqsichikurqanichu. 4Paykunawanmi pactota ruwarqani, chaynapi huklaw llaqtayuq hina yachasqanku Canaán allpata paykunaman qonaypaq. 5Israelpa mirayninkunapa ñakarisqankutapas yachanim, paykunawanmi Egipto runakuna servichikuchkanku. Pacto ruwasqaytaqa manam qonqanichu, 6chayraykum Israelpa mirayninkunata ninki: Ñoqam Tayta Dios kani. Ñoqam Egipto nacionpi sasa llamkaykunamanta hurqosqaykichik, servipakuq kasqaykichikmantapas librasqaykichikmi. Atiyniywanmi hatun castigokunawan salvasqaykichik. 7Llaqtaypaqña hapiykuspaymi Diosnikichik kasaq, qamkunañataqmi Egipto nacionpi sasa llamkaykunapi ñakarisqaykichikmanta hurqoqnikichik Tayta Dios kasqayta yachankichik. 8Abrahamman, Isaacman hinaspa Jacobman qonaypaq prometesqay allpamanmi pusasqaykichik. Chay allpata qoptiymi qamkunapaña kanqa. Ñoqam Tayta Dios kani, nispa.
9Chaynatam Israelpa mirayninkunata Moisés rimapayarqa. Paykunam ichaqa Moisesta mana kasurqakuchu, sasallaña llamkaypi tarikuspanku llumpay pisipasqa kasqankurayku. 10Chaymi Moisesta Tayta Dios nirqa:
11Egipto nacionpi rey Faraonpa qayllanman yaykuspa nimuy, kay allpamanta Israelpa mirayninkunata kacharinanpaq, nispa.
12Moisesñataqmi Tayta Diosta nirqa:
Israelpa mirayninkuna mana kasuwachkaptinqa, ¿imaynataq Faraonqa kasuruwanqa mana ancha rimay atiq runataqa? nispa.
13Chaymi Aarontawan Moisesta Tayta Dios kamachirqa, Israelpa mirayninkunatawan chaynataq Faraonta kaynata nimunankupaq: Tayta Diosmi Egipto nacionmanta Israelpa mirayninkunata hurqonaykupaq kamachimuwanku, nispa.
Aaronpa hinaspa Moisespa ñawpaq taytankumanta
14Kaykunam taytankumanta sapa ayllupa kamachiqninkuna:
Israelpa piwi churin Rubenpa churinkunam karqa: Hanoc, Falú, Hezrón hinaspa Carmi. Paykunam karqaku Rubenpa ayllunkuna.
15Simeonpa churinkunam karqa: Jemuel, Jamín, Ohad, Jaquín, Zohar hinaspa Cananea warmipa wawan Saúl. Paykunam karqaku Simeonpa ayllunkuna.
16Leviypa churinkunañataqmi mirayninkuman hina karqa: Gersón, Coat hinaspa Merari. Leviymi pachak kimsa chunka qanchisniyuq watata kawsakurqa. 17Gersonpa churinkunam ayllunkunaman hina karqa Libni hinaspa Simei. 18Coatpa churinkunam karqa: Amram, Izhar, Hebrón hinaspa Uziel. Coatmi pachak kimsa chunka kimsayuq watata kawsarqa. 19#1 Cr 6.16-19.Meraripa churinkunam karqa Mahliwan Musi. Paykunam mirayninkuman hina Leví ayllunkuna karqaku.
20Amrammi casarakurqa tían Jocabedwan, chaymi wachakurqa Aarontawan Moisesta. Amrammi pachak kimsa chunka qanchisniyuq watata kawsarqa.
21Izharpa churinkunam karqa: Coré, Nefeg hinaspa Zicri.
22Uzielpa churinkunam karqa: Misael, Elzafán hinaspa Sitri.
23Aaronmi casarakurqa Aminadabpa churin hinaspa Naasonpa panin Elisabetwan. Paymi wachakurqa Nadabta, Abiuta, Eleazarta hinaspa Itamarta.
24Coreypa churinkunam karqa: Asir, Elcana hinaspa Abiasaf. Paykunam Coré ayllukuna karqaku.
25Aaronpa churin Eleazarpas Futielpa huknin warmi churinwanmi casarakurqa chaymi wachakurqa Fineesta. Paykunam Leví ayllukuna ukupi kamachikuqkuna karqaku.
26Aarontawan Moisestam Tayta Dios kamachirqa, Israelpa mirayninkunata Egipto nacionmanta tropa-tropata hurqomunankupaq. 27Kay Moiseswan Aaronmi rey Faraonta rimapayarqaku Egipto nacionmanta Israelpa mirayninkunata kacharinanpaq.
Moiseswan Aarón Diospa qayasqan kasqankumanta
28Tayta Diosmi Egipto nacionpi Moisesta rimapayaspan 29nirqa:
Ñoqam Tayta Dios kani. Tukuy nisqaykunata Egipto nacionpi rey Faraonman willamuy, nispa.
30Ichaqa Tayta Diostam Moisés nirqa:
Ñoqaqa mana ancha rimakuy atiq runam kani ¿imaynataq Faraonqa uyariwanqa? nispa.
Currently Selected:
Éxodo 6: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
