Éxodo 22
22
Dañomanta kamachikuykuna
1Pipas torota otaq ovejata suwakuruspa rantikurunanpaq nakarunqa hinaspaqa, huk toromantam pichqa torotaña sayachipunqa, huk ovejamantañataqmi tawa ovejataña.
2Sichum huk suwata, suwakuchkaqta tariruspa pipas maqachkaspalla wañurachiptinqa, chay maqaqnin runaqa mana huchayuqmi kanqa. 3Punchaw pacha wañurachiptinmi ichaqa, wañuchisqanmanta chay maqaqnin runa sentenciasqa kanqa.
Suwakusqanpi hapirachikuspanqa, dueñonmanmi sayachipunqa, sayachipunanpaq mana imanpas kaptinñataqmi suwakusqanmanta pagananpaq rantikusqa kanqa.
4Sichum kawsachkaqtaraq suwapa makinpi tarirunqaku torota, asnota otaq ovejata, hinaptinqa chay suwam huk chaynatawanraq sayachipunqa.
5Pipas chakranpi otaq uvas chakranpi michinanpaq animalninta qaykunman, hinachkaspan hukpa tarpukuyninta dañorachinqa hinaspaqa chakranmanta chaynataq uvas chakranmantapas allinnin kaqwanmi sayachipunqa.
6Pipas kichkakunata ninawan kañachkaptin chay nina huñusqa kawsayta otaq sayachkaq kawsaytapas ruparuptinqa, chay nina ratachiqmi kawsaypa dueñonman kañasqanmanta sayachipunqa.
7Pipas qollqenta otaq imantapas runamasinman churachikunman, hinaptinñataq churapachikusqan wasimanta pipas suwarunman, hinaptin chay suwata hapiruptinkuqa chay suwam huk chaynatawanraq sayachipunqa. 8Suwata mana tariptinkum ichaqa, chay wasipa dueñon Diospa qayllanman pusasqa kanqa, chaynapi runamasinpa kapuqnin suwakusqanmanta otaq mana suwakusqanmantapas jurananpaq.
9Sichum pipas torota, asnota, ovejata, pachata otaq imatapas hapikuykuchkaspan llullakuspan ninman: “Ñoqapam kayqa” nispa, hinaptinqa Diospa qayllanpim arreglanqaku, huchayuq kaqmi huk chaynatawanraq sayachipunqa.
10Pipas runamasinman asnonta, toronta otaq ima animalnintapas waqaychapunanpaq saqeykunqa, hinaptin chay animal wañurunman, maqapasqa karunman, mana pipapas rikusqanta suwasqa karunman , hinaptinqa 11chay waqaychaqmi Tayta Diospa qayllanpi juranqa runamasinpa kapuqninta mana suwakusqanmanta, hinaptinmi animalpa dueñonqa cheqap kasqanpaq hapinqa, chaynapim chay animal waqaychaqqa mana sayachinqañachu. 12Sichum chay animalta kikin suwarachikuspanqa dueñonmanmi sayachipunqa. 13Purun animal wañurachiptinqa puchuntam apamunqa chaynapim mana paganqachu.
14Pipas runamasinmanta uywanta prestakunman hinaptin dueñonpa mana rikusqanta imapas pasarunman otaq wañurunmanpas hinaptinqa pagapunqam. 15Dueñon rikuchkaptin wañuruptinmi ichaqa mana sayachipunqachu, alquilasqa kaptinqa, haykawan alquilasqallantam pagapunqa.
Runamasinkuwan allin kawsanankumanta kamachikuykuna
16Manaraq qari reqsiq sipasta engañaruspa paywan puñuruspanqa, costumbreman hinam sipaspa taytanman pagapunqa, hinaspam chay sipaswan casarakunqa. 17#Dt 22.28-29.Taytan mana casarachiyta munaptinqa, casarachkaq hinam engañasqanmanta costumbreman hina chay sipaspa precionta qollqenpi paganqa.
18 #
Dt 18.10-11. Layqa warmitaqa wañuchinkichikmi.
19 #
Lv 18.23; 20.15-16; Dt 27.21. Pipas animalwan qachakuqtaqa wañuchinkichikmi.
20 #
Dt 17.2-7. Diosllamanmi sacrificiotaqa ofrecenkichik, idolokunaman ofreceqqa wañunqapunim.
21Huklaw llaqtayuqtaqa amam engañankichu nitaqmi ñakarichinkichu. Qamkunapas Egipto nacionpim huklaw llaqtayuq hina karqankichik.
22 #
Ex 23.9; Lv 19.33-34; Dt 24.17-18; 27.19. Amam viudatapas nitaq mana tayta-mamayuqtapas ñakarichinkichu. 23Sichum ñakarichiptiki paykuna qayakamuwaptinkuqa uyarisaqpunim. 24Chaynata ruwaptikichikqa sinchita piñakuspaymi guerrawan wañuchisqaykichik, warmikichikñataqmi viuda kanqa, churikichikkunapas mana taytayuqmi qepanqaku.
25 #
Lv 25.35-38; Dt 15.7-11; 23.19-20. Sichum qanwan yachaq wakcha runaman qollqeta prestaspaykiqa, mana mirayniyuqllapaqmi prestanki, amataqmi wakin runa hinaqa miraynintapas mañankichu. 26Runamasikipa pachanta prendapi hapispaykiqa manaraq inti seqaykuchkaptinmi kutichipunki, 27#Dt 24.10-13.chaylla maytukuykunanpaq kasqanrayku. Mana chayqa ¿imapitaq puñunman? Chay runa qayakamuwaptinqa kuyapayakuq kasqayraykum uyarisaq.
28 #
Hch 23.5. Amam Diospa contranpi mana allintaqa rimankichu, nitaqmi kamachikuqkunatapas ñakankichu.
29Ama unaspam cosechaykikunapa chaynataq uvasnikikunapa punta kaq rurunta apamuwanki.
Piwi churikitapas qowankipunim. 30Vacaykikunapa chaynataq ovejaykikunapa punta kaq wawankunatapas qowankim; nacesqanmantam qanchis punchaw mamanwan kanqa, pusaq punchawmanñataqmi ñoqaman qowanki.
31 #
Lv 17.15. Qamkunaqa ñoqallapaqña sapaqchasqa runakunam kankichik, chayraykum aycha mikuq purun animalkunapa wañuchisqan animalpa aychantaqa ama mikunkichikchu, chay aychataqa allqokunamanmi wischuykunkichik.
Currently Selected:
Éxodo 22: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012