Éxodo 23

Allin arreglota ruwanapaq kamachikuykunamanta

1 # Ex 20.16; Lv 19.11-12; Dt 5.20. Amam imatapas llullakuspaqa willakunkichu.

Amataqmi falso testigo kanaykipaqqa mana allin runakunawanqa tanteanakunkichu.

2Mana allin ruwaqkunataqa achkallaña kaptinkupas amam qatinkichu; testigo kaspaykipas ama pimanpas sayapakuspam cheqap kaqllata rimanki, llulla rimaqmanqa achkallaña kaptinkupas amam sayapakunkichu; 3#Lv 19.15.wakchaña kaptinpas amam sayapakunkichu.

4Enemigoykipa chinkaq toronta otaq asnontapas tarispaykiqa kutichipunkim. 5#Dt 22.1-4.Cheqnisuqnikipa cargayuq asnon llasaywan urmaruqta rikuspaykiqa amam qawayllaqa qawankichu aswanqa sayarichiypim yanapaykunki.

6Wakcha runa quejapi kaptinqa allin arreglotam ruwaykunki.

7Llullakuspa yanqamanta tumpakuqmanqa amam hukllawakunkichu, amataqmi mana huchayuq runataqa wañuyman sentenciankichu. Huchayuqtaqa castigasaqpunim.

8 # Lv 19.15; Dt 16.19. Amam sayniyutaqa chaskikunkichu, sayniyuqa allin ruwaqkunatapas pantachinmi, allin ruwaq runakunapa cheqap rimasqantapas qewirunmi.

9 # Ex 22.21; Lv 19.33-34; Dt 24.17-18; 27.19. Huklaw llaqtayuq runataqa amam ñakarichinkichu, qamkunapas yachankichikmi imaynam runapa llaqtanpi vida pasaytaqa. Qamkunapas huklaw llaqtayuq hinam Egipto nacionpi karqankichik.

Chakrakuna samachinamanta

10Soqta watam chakraykipi tarpuspa cosechanki, 11#Lv 25.1-7.qanchis watapiñataqmi samachinki, chaynataqa ruwanki llaqtaykipi wakchakuna pallapakuspan mikunankupaqmi, puchuqnin kaqtañataqmi purun animalkuna mikunqa; chaynallatam ruwanki uvas chakraykiwan chaynataq aceitunas chakraykiwanpas.

12 # Ex 20.9-11; 31.15; 34.21; 35.2; Lv 23.3; Dt 5.13-14. Soqta punchawmi ruwaynikita ruwanki, qanchis kaq punchawpiñataqmi samanki, chaynapi toroykipas asnoykipas samananpaq. Chaynataq criadoykipas, wasikipi samapakuqpas kallpata hapinanpaq.

13Chaynaqa, tukuy nisqaykunatayá kasukuychik. Amam mañakunkichikchu nitaqmi rimankichikpaschu sapaq dioskunapa sutintaqa.

Kimsa hatun fiestakunamanta

(Ex 34.18-26. Dt 16.1-17)

14Watapim kimsa kutita hatun fiestata ruwapuwankichik. 15#Ex 12.14-20; Lv 23.6-8; Nm 28.17-25.Mana levadurayuq Tanta fiestatam ruwanki. Kamachisqayman hinam qanchis punchawpuni mana levadurayuq tantata mikunki. Chay fiestataqa Abib killapim ruwanki, chay killapim Egipto nacionmanta lloqsimurqanki. Mana imayuqqa amam pipas ñawpaqniyman asuykamunqachu.

16 # Lv 23.15-21; Nm 28.26-31. # Lv 23.39-43. Cosecha qallariy fiestatapas chaynataq cosecha tukuy fiestatapas ruwankim, chaytaqa sapa watam cosecha tukuyta ruwanki.

17Watapim kimsa kutita llapallan qarikuna ñoqa Tayta Diosman asuykamuwanqaku.

18Animalta sacrificaspaykiqa, amam yawarninta levadurayuq tantatawan kuskataqa ofrecewankichu, amataqmi paqarinnintin punchawkamaqa wirantapas puchuchinkichu.

19 # Dt 26.2. # Dt 14.21. Chakrapi tarpusqaykipa punta kaq allinnin ruruntam ñoqa Tayta Diospa wasiyman apamunki.

Uña cabrachataqa amam mamanpa lechenpiqa yanunkichu.

Israelpa mirayninkunata Tayta Diospa angelnin pusasqanmanta

20Ñoqam ñawpaqnikita angelniyta kachani, risqaykipi waqaychasunaykipaq chaynapi allichapusqay sitioman chayachisunaykipaq. 21Paypa nisqanta uyarispa kasukuy hinaspa ama contranpiqa hatariychu; payqa ñoqapa rantiypim kachkan, mana kasukuptikichikqa manam pampachasunkichikchu. 22Nisqanta uyarispayki tukuy kamachisqayta kasukuptikim ichaqa enemigoykikunapa enemigon kaspay paykunata ñakarichisaq. 23Angelniymi puntaykita rispa amorreokunapa, heteokunapa, ferezeokunapa, cananeokunapa, hititakunapa hinaspa jebuseokunapa kasqanman pusasunki. Paykunataqa ñoqam puchukachisaq. 24Paykunapa idolonkunapa ñawpaqninpiqa amam qonqorakunkichu nitaqmi yupaychankichu. Paykunapa ruwasqanta hinaqa amam qatipakunkichu, aswanqa ñutuspaykim lliwta puchukachinki. 25Ñoqa Tayta Diosllatam yupaychawankichikqa, hinaptinmi mikunaykitawan yaku tomanaykita bendecisaq. Onqoykunatapas ñoqam qanmanta wischusaq. 26Llaqtaykipiqa warmikunapas manam malparinqachu nitaqmi qolluqpas kanqachu, unaytam kawsachisqayki.

27Ñawpaqnikitam manchakuyta kachasaq, yaykusqayki llaqtakunapi runakunatam sustocharusaq. Enemigoykikunapas manchakuymantam ñawpaqnikipi ayqenqaku. 28Qampa ñawpaqnikitam wayliskunata kachasaq, chaynapim heveokunata, cananeokunata hinaspa heteokunata ñawpaqnikimanta wischusaq. 29Manam huk watallapichu ñawpaqnikimantaqa wischusaq, watallapi qarqoruptiyqa allpam chunnirunman hinaptinmi purun animalkuna miraruspan dañota ruwasunkichikman. 30Miranaykikamam chay runakunataqa as-asllamanta ñawpaqnikimanta wischusaq, hinaptinmi chay allpaqa qamkunapaqña kanqa. 31Qanman qosqay nacionpa linderonmi kanqa Puka lamar qochamanta qallarispa filisteokunapa lamar qochankama chaynataq chunniqmanta qallarispa Eufrates mayukama. Chay nacionpi runakunatam makikiman churani qayllaykimanta wischunaykichikpaq.

32Paykunawanpas, idolonkuwanpas amam ima contratotapas ruwankichu. 33Amam allpaykipipas yachanqakuchu, yanqañataq idolonkuta yupaychaspayki contraypi huchallikuwaq. Chayqa pantaymanmi aparusunkiman.

Currently Selected:

Éxodo 23: RCHQ2

Highlight

Copy