Éxodo 21
21
Criadokunapaq kamachikuykunamanta
1Israel runakunaman kay kamachikuykunata qonanpaqmi Moisesta Tayta Dios nirqa:
2Hebreokunamanta criadota rantispaykiqa soqta watam servichikunki, qanchis kaq watapiñataqmi mana imata pagaspalla libre lloqsikunqa. 3Sapallan yaykumuspaqa sapallanmi lloqsikunqa, warmiyuq yaykumuspam ichaqa warmintin lloqsikunqa. 4Criado kachkaptin, warmita patronnin qoptin, chay warmiñataq qaritapas otaq warmitapas wachakuruptinqa, chay warmim wawankunapiwan patronninpaq qepanqa, qosanñataqmi sapallan lloqsikunqa. 5Sichu chay criado ninqa: “Patronniytam kuyani, kuyanitaqmi warmiytawan churiykunatapas; chaynaqa manam libreqa lloqsiymanchu” nispa , hinaptinqa 6#Lv 25.39-46.patronninmi Diospa santuarionman pusanqa, hinaspam punkuman otaq punkupa pilarninman asuykachispan alesnawan chay criadonpa rinrinta uchkurunqa, hinaptinmi kawsanankama chay patronninpa criadonña kanqa.
7Pipas warmi churinta criadapaq rantikuruptinqa, chay warmiqa manam lloqsinqa qari criado hinachu. 8Sichum patronnin chay criadanwan mana casarakuyta munaptinqa, chay criadataqa hina castamasinmi rantinqa, wischupakusqanraykum huklaw llaqtayuq runamanqa mana rantikunqachu. 9Churinwan casarachispanmi ichaqa warmi churinta hina uywanqa. 10Sichum patronnin chay criadanwan casado kachkaspa huk warmita casararuspanqa amam punta warmintaqa pisichinqachu mikunanta, pachanta nitaq casada derechontapas. 11Sichum chay criadapa kay kimsan derechonta patronnin mana ruwaptinqa chay criadam mana pagaspalla lloqsikunqa.
Runamasin wañurachiqpaq kamachikuykunamanta
12 #
Lv 24.17. Pipas runamasinta maqaspa wañuchiqqa paypas wañuchisqataqmi kanqa. 13#Nm 35.10-34; Dt 19.1-13; Jos 20.1-9.Pipas mana wañuchiyta munachkaptin ichaqa Dios munarqa chay runapa makinpi wañunanta , hinaptinqa chay runam amparakunapaq akllasqay sitioman ayqekunqa. 14Pipas runamasinta wañuchiyta munaspan qonqaymanta wañurachiptinmi ichaqa, altarniypiña pakakuptinpas hurqospa wañuchinkichik.
15Pipas taytanta otaq mamanta maqaqqa wañuchisqam kanqa.
16 #
Dt 24.7. Pipas runamasinta aparuspa rantikuruptinqa otaq makinpiraq tariruptinkuqa, chay suwaqa wañuchisqam kanqa.
17 #
Lv 20.9; Mt 15.4; Mr 7.10. Pipas taytanta otaq mamanta ñakaqqa wañuchisqam kanqa.
18Iskay runakuna peleaspa huknin runa rumiwan chamqarunman otaq takarunman, hinaptin mana wañuspa camachakurunman, 19hinaspañataq hatariruspa hawapi tawnawan puriptinqa, amam chay maqaqnintaqa wañuchinkichikchu. Aswanqa chay onqoqmanmi, onqospa tiempo pierdesqanmanta pagapunqa, allinyanankamataqmi hampichinqapas.
20Pipas criadonta otaq criadanta kaspiwan waqtaspa wañurachispanqa, chay runaqa castigasqam kanqa. 21Sichum huk punchaw otaq iskay punchawllapas kawsaptinmi ichaqa mana castigasqachu kanqa qollqenpa chanin kasqanrayku.
22Sichum iskay qarikuna peleachkaspanku wiksayuq warmita malparirachispanku, cuerponta ichaqa mana imanarqakuchu hinaptinqa juezkunapa nisqanman hinam, qosanpa mañakusqan multata paganqaku. 23Chay warmi wañuruptinmi ichaqa wañuchiqninpas wañuchisqa kanqa. 24#Lv 24.19-20; Dt 19.21; Mt 5.38.Runaqa ñawimantam ñawinwan paganqa, kirumantam kirunwan, makimantam makinwan, chakimantam chakinwan paganqa; 25ninawan puslluchiqqa paypas puslluchisqam kanqa, heridaruqpas heridasqam kanqa, qoyuyachiqpas qoyuyachisqam kanqa.
26Pipas maqaspan criadonpa otaq criadanpa ñawinta toqyarachispanqa, ñawinraykum libreta kachaykunqa. 27Pipas criadonpa otaq criadanpa kirunta wichirachispanqa, kirunraykum libreta kachaykunqa.
Qonqaymanta wañurachiqkunapaq kamachikuykunamanta
28Sichum huk toro, qaritapas otaq warmitapas waqraruspan wañurachiptinqa, chay torom rumiwan choqapasqa wañunqa, aychantapas amam mikunqakuchu, dueñonmi ichaqa mana huchayuq kanqa. 29Sichum chay toro waqrakuq kasqanta yachachkaspa dueñon mana cuidarqachu hinaptin pitapas wañurachiptinqa, chay torom rumiwan choqapasqa wañunqa, dueñonpas wañuchisqam kanqa. 30Sichum chay toroyuqta mana wañuchispanku multaylla multaptinkum ichaqa, wañuqpa ayllunkunaman juezpa nisqan multata paganqa. 31Pipatapas qari churinta otaq warmi churinta waqraruptinqa, kay kamachikuyman hinam ruwasqa kanqa. 32Pipatapas criadonta otaq criadanta toro waqraruptinqa dueñonmi paykunapa patronninman kimsa chunka masnin qollqeta paganqa, toroñataqmi rumiwan choqapasqa wañunqa.
33Pipas pozopa tapanta kicharunqa, otaq pozota toqospan mana tapanqachu hinaptin chayman toro kaspa otaq asno kaspapas wichiykuptinqa, 34pozopa dueñonmi chay animalpa dueñonman paganqa, chay wañusqa animalñataqmi pozoyuqpaqña kanqa.
35Pipa toronpas runamasinpa toronta waqraruspa wañurachiptinqa, chay wañuchiq torotam rantikuruspanku qollqetañataq igualman rakinakunqaku, wañusqa torotapas partenakunqakum. 36Sichum chay toro waqrakuq kasqanrayku lliwpa reqsisqan kachkaptin dueñonpas mana watarqachu , hinaptinqa chay wañuq toromantam huk torota sayachipunqa, chay wañusqa torotañataqmi paypaqña kanqa.
Currently Selected:
Éxodo 21: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012