Efesios 4
4
Espiritupi huklla kasqanchikmanta
1Ñoqaqa Señorta servisqayraykum preso kachkani, chaynaqa ruegakamuykichikmi Diospa akllasqankuna hina allinta kawsanaykichikpaq. 2#Col 3.12-13.Chaynaqa, uchuychakuspayá llampu sonqolla hinaspa pacienciakuq kaychik, imamanta pantanakuruspapas kuyakuywanyá aguantanakuychik.
3Chuya Espiritupa yanapakuyninwanyá huk sonqolla kaychik, tukuy tiempopi hawkalla kawsanaykichikpaq. 4Cuerpoqa hukllam, hukllataqmi Espiritupas, Diosqa huk sonqolla suyanaykichikpaqmi qayasurqankichik. 5Hukllam Señorqa, hukllam iñiypas, hukllataqmi bautismopas. 6Hukllam Diosqa, payqa lliwpa Taytanmi, payqa llapallanpi munaychakuqmi, llapallantakamam tukuy imatapas ruwan, llapallanpintaqmi kachkanpas.
7Ichaqa sapakamamanmi munasqanman hina Jesucristoqa atiyta qowarqanchik. 8#Sal 68.18.Chaymi Qellqa kaynata nin:
“Altoman wicharispanmi,
presokunata aparikurqa,
runakunamanmi atiyta qorqa”, nispa.
9“Wicharirqam” nisqanqa, ¿ima ninantaq? Kaywanqa niwachkanchik puntataqa kay pachamanta aswan ukumanraq uraykusqantam. 10Hina payllataqmi tukuy imaman huntariykunanpaqpas cielokunapa altonkamaraq wicharirqa. 11Paypunitaqmi atiytapas qorqa, wakinman: Apóstol kananpaq, profeta kananpaq, evangelista kananpaq, michiq kananpaq hinaspa yachachikuq kananpaq.
12Paykunatam churarqa iñiqkunata allinta yachachispa Diospa obranpi llamkanankupaq, chaynapi Cristopa cuerpon wiñachisqa kananpaq. 13Chaynapim iñisqanchikpipas chaynataq Diospa Churin reqsisqanchikpipas llapallanchik wiñaspa hukllaña kasunchik, chaynapi yuyayniyuq runa hinaña kaspa mana imapapas pisisqan Cristo hinaña kasunchik, 14manam kasunqa warmakuna hinañachu, warmakunaqa hukta-hukta creeruspankum wayrawan apachikuchkaq hina runakunapa yachachisqanwan apachikunku, paykunataqa sakri runakunam sumaqllataña rimaspa pantachin.
15Aswanqa kuyanakuspayá cheqap kaqta qatispa aswan-aswan Cristoman rikchakuq kananchikkama wiñasun, Cristoqa llapallan iñiqkunapa umanmi. 16#Col 2.19.Cristom llapallan iñiqkunata huk cuerpollata ruwawanchik, chaynataqa ruwawanchik cuerpopa partenkuna yanapanakunanpaq ankukunawan tinkinachkaq hinam, chaynapim sapakama ima ruwananchikta allinta ruwaspa kuyakuywan kallpanchakuspa wiñasunchik.
Cristowanña musoq kawsaymanta
17Señorninchikpa sutinpim nikichik: Amañayá Dios mana reqsiq runakuna hinaqa kawsaychikchu, paykunaqa mana allin piensasqankuman hinallam kawsachkanku.
18Paykunaqa yuyayninku tutayasqa kaptinmi mana entiendenkuchu, Diospa qosqan musoq kawsaymantaqa karupim kachkanku, sonqonku rumiyasqa kasqanraykum mana yachayniyuq kachkanku.
19Paykunaqa manaña penqakuq rikuriruspankum tukuy imaymana qanra kawsayllapi purikuchkanku, millakuypaq kaqkunata ruwaspankum aswan-aswanraq chayna kawsayta munachkanku.
20Qamkunam ichaqa mana chaynatachu Cristomanta yacharqankichik, 21sichum cheqaptapuni paymanta yachachikuyta uyarirqankichik hinaspa Jesuspi cheqap kasqanman hina chaskispaqa. 22#Col 3.9.Huchaman aysaqnikichikmanta karunchakuspayá amaña ñawpaq kawsaynikichikpi hinañachu puriychik, chayna kawsayqa pantachisuspaykichikmi mana allinllata munachisunkichik.
23Yuyaymanaynikichiktayá musoqyachiychik. 24#Col 3.10.#Gn 1.26.Hinaspayá musoq runawan pachakuychik, Diosman rikchakuq kanaykichikpaq, chayna runatam Diosqa unancharqa cheqaptapuni mana huchallikuq justo kananpaq.
25 #
Zac 8.16. Chaynaqa, amaña llullakuspa cheqaptapuni runamasikichikwan rimaychik, llapanchikmi huk cuerpopa partellan kanchik.
26 #
Sal 4.4. Piñakuspaqa amataqyá huchallikuychikchu, amayá inti seqaykunankamaqa piñakuruychikchu. 27Huchaman diablo urmachisunaykichiktaqa amayá saqekuychikchu. 28Pipas suwakuqqa amañayá suwakuchunchu, aswanqa imatapas allinta ruwaspayá llamkachun, chaynapi mana imayuqkunata imallawanpas yanapaykunanpaq.
29Rimaspaykichikqa amayá qacha simichu kaychik, aswanqa allin kaqkunallatayá rimaychik, chaynapi uyariqnikichikkunapa allinninpaq kaptin iñiyninkupi aswan-aswan wiñanankupaq.
30Amayá Diospa Chuya Espirituntaqa llakichiychikchu. Paywanmi sellowan hina sellasurqankichik, chaynapi hamuq punchawpi librasunaykichikpaq.
31Qamkunamantayá kaykunata wischuychik: Piñakuyta, rabiakuyta, cheqnikuyta, qaqchakuyta, insultanakuyta chaynataq tukuy mana allin ruwaytapas.
32 #
Col 3.13. Aswanqa sumaq sonqo kaspa kuyanakuychik, imaynam Diospas Cristorayku pampachasurqankichik, chaynayá qamkunapas pampachanakuychik.
Currently Selected:
Efesios 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
