Efesios 3
3
Mana judío kaqkunaman Pablopa willakusqanmanta
1Ñoqa Pablom, Jesucristo servisqayrayku preso kachkani mana judío kaqkunapa allinnikichikpaq. 2Qamkunaqa yachankichikñam Diospa kuyakuyninmanta qamkunawan llamkanaypaq kamachiwasqanta. 3Diosmi pakasqa kaqkunata reqsichiwarqa, chaykunamantaqa ñawpaqtaraqmi asllatapas qellqamurqaykichikña. 4Chayta leespaykichikmi yachankichik Cristomanta pakasqa kaqkuna yachasqayta. 5Kaykunataqa ñawpaq tiempopi runakunamanqa Diosqa manam reqsichirqachu, kunanmi ichaqa sapaqchakusqan apostolninkunaman hinaspa profetakunaman Espirituntakama reqsichin. 6#Col 1.26-27.Pakasqa kaqkunaqa kaymi: Jesucristomanta allin noticiawanmi mana judío kaqkuna judiokunapa herencia chaskiqmasinña rikurirunku, paykunawan hukllaña kasqankuraykum Cristo Jesuspi Diospa promesan chaskiqmasinña karunku.
7Diosmi kuyakuyninpi atiyninta qoykuwarqa, Jesucristomanta allin noticiata willakunaypaq. 8Llapallan iñiqkunamanta mana valeqpaq hapikuchkaptiypas, Diosqa ñoqata kuyawaspanmi kunawarqa, mana judío kaqkunaman Cristomanta hatun valorniyuq pakasqa kaq allin noticiata willakunaypaq. 9Tukuy imapas unanchaq Diosmi qallariymantapuni kikillanpaq waqaychakusqanta, llapallanman willakunaypaq kunaykuwarqa. 10Chaynapim altokunapi atiyniyuqkunapas hinaspa munaychakuqkunapas iñiqkunata hukllamanña huñunasqata qawaspanku yachanqaku Diosninchikqa mana haypay atina yachayniyuq kasqanta. 11Diosmi ñawpaqmantapuni imam munasqanta Señorninchik Jesucristowan ruwarqa. 12Jesucristoman iñiywan hapipakuspallam mana manchakuspa Diosmanqa asuykunchik. 13Chaynaqa, qamkunarayku ñakarisqaywanqa amayá hukmanyaruychikchu, chayqa aswanraq alabakunaykichikpaqmi.
Cristopa kuyakuyninmanta
14Chayraykum qonqorakuykuspay Dios Taytanchikta mañakuchkani. 15Paymantam lliw ayllukuna hanaq pachapi kaqkunapas chaynataq kay pachapi kaqkunapas sutinkuta chaskinku. 16Taytanchiktam mañakuchkani hatu-hatun kayninman hina Espiritunpa atiyninwan sonqoykichikta kallpanchananpaq. 17Chaynapim iñisqaykichikman hina Cristoqa sonqoykichikpi yachanqa, hinaptinmi sapichakusqa hinaspa allin cimientasqa hina kuyanakuypi takyankichik. 18Chaynapim llapallan iñiqkunawan kuska Cristopa kuyawasqanchikta yachankichik, mayna anchom, mayna largom, mayna ukum hinaspa mayna hatun kasqanta. 19Mañakuchkanitaqmi imawanpas mana tupachiy atina Cristopa kuyakuyninta yachanaykichikpaqpas, chaynapi Dioswan huntasqa kanaykichikpaq.
20Chaynaqa, Diosllatayá hatunchasun, payllam ñoqanchikpiqa atiyninwan ruwan mañakusqanchikmantapas hinaspa piensasqanchikmantapas aswan llimparichkaqtaraq. 21Diosninchikqa Jesucristontakamayá llapallan iglesiakunapi wiña-wiñaypaq hatunchasqa kachun. Amén.
Currently Selected:
Efesios 3: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
