Deuteronomio 32
32
1¡Cielokuna, rimarisqayta uyariychik!
¡Kay pacha, rimarisqayta uyariy!
2Yachachikuyniyqa para hinam chayamunqa,
rimasqayqa sulla hinam wichimunqa;
lliwaman paramuchkaq hinam chayamunqa,
pastoman paramuchkaq hinam wichimunqa.
3Tayta Diospa sutintam hatunchasaq,
qamkunapas Diosninchikta hatunchaychik.
4Payqa pakakunanchik qaqam,
ruwasqankunapas mana pantayniyuqmi,
ruwayninkunapas allinpunim.
Payqa cheqap Diosmi,
paypiqa manam ima mana allinpas kanchu,
payqa derechonpim imatapas ruwan.
5Millakuypaq huchasapa runakuna,
Tayta Diosta piñachiq runakuna,
manam qamkunaqa churinchu kankichik.
6Mana yuyayniyuq mana yachayniyuq runakuna,
¿chaynatachu Tayta Diosman pagapunkichik?
¿Manachum payqa taytaykichik karqa?
¿Manachum payqa unanchasuqnikichik karqa?
Paymi unanchaspa takyachisurqankichik.
7Ñawpaq tiempokunamanta yuyariychik,
ñawpaq watakunapi achka miraykunamanta yuyariychik,
ñawpaq taytaykichikkunata tapurikuychik,
paykunam willasunkichik.
Yuyaqkunata tapurikuychik,
paykunam nisunkichik.
8Tukuy imapa hawanpi munaychakuq Diosmi
nacionkunaman herenciata rakinarqa,
chay nacionkunapa linderonkunatam churarqa,
Israelpa mirayninkunaman hinam rakirqa.
9Tayta Diospa herencianqa runankunallam,
paypa herencianqa Jacobpa mirayninkunallam.
10Paykunatam chunniq allpapi tarirqa,
wayrapa pukunan chaki allpapi.
Marqayninpi apamuspanmi paykunata yachachirqa,
ñawi rurunta hinam waqaycharqa.
11Mallqonkunata pawachinanpaq qesanpa altonpi muyurichkaq anka hinam,
Tayta Diospas raprankunata mastarispan apamurqa,
hoqarispanmi wichayta qespichirqa.
12Tayta Diosmi paykunataqa pusamurqa,
manam sapaq dioschu.
13Alto orqonkunatam pusamurqa,
paykunamanqa allpapa rurunkunatam mikuchirqa,
mikuchinanpaqmi qaqamanta mielta hurqorqa,
raqchi rumimantam aceitenkutapas hurqorqa.
14Vacakunamanta lecheta hurqospam lluklluta mikuchirqa,
allinnin malta carnerokunatawan,
Basán lawpi carnerokunata,
allinnin chivatokunatam mikuchirqa.
Allinnin trigotam mikuchirqa,
uvaspa weqenmanta vinotam tomachirqa.
15Ichaqa #32.15 Jesurún nispaqa Israel nacionmantam rimachkan.Jesurunmi wirayaruspan haytakuqllaña rikurirurqa,
wiranpas wiswirinankamam anchallataña poqorurqa;
hinaspam unanchaqnin Tayta Diosta saqerurqa,
waqaychaqnin qaqatam wischupakururqa.
16Mana reqsisqanku dioskunata yupaychaspankum
Tayta Diosta llakichispa piñachirqaku.
17 # 1 Co 10.20. Demoniokunapaqmi animalkunata ofrecerqaku,
manam Tayta Diospaqchu;
paykunapapas chaynataq ñawpaq taytankupapas
mana reqsisqanku chayllaraq rikurimuq idolokunapaqmi chayta ruwarqaku.
18Israelpa mirayninkuna,
amparaqnikichik taytaykichiktam qonqarunkichik,
kawsay qosuqnikichik Tayta Diostam qonqarunkichik.
19Chayta rikuspanmi Tayta Dios sinchita piñakururqa,
piñakuruspanmi qaritapas warmitapas churinkunata qepanchakururqa.
20Chayraykum Tayta Dios nirqa:
Paykunatam qepanchakurusaq, imatas ruwanqaku;
paykunaqa mana allin ruwaqkunam,
paykunaqa iskay uya churikunam.
21 # 1 Co 10.22. #
Ro 10.19. Idolokunata yupaychaspankum llakichiwarqaku,
millakuypaq idolokunata yupaychaspankum piñachiwarqaku.
Chayraykum ñoqapas paykunata hukmanyarachisaq,
mana yachayniyuq llaqtawanmi sientirachisaq,
mana yuyayniyuq runakunawanmi piñarachisaq.
22Piñakuyniymi nina hinaraq ruparinqa,
uku pachapa ukunkamaraqmi chayarunqa;
allpatapas kawsaynintintam tukurunqa,
orqokunapa sapintam kañarunqa.
23Tukuy mana allinkunatam montoykamusaq,
flechaykunatam paykunaman chayachimusaq.
24Yarqaymantam wañunqaku,
sinchi calenturawanmi puchukanqaku,
millay peste onqoywanmi tukunqaku,
mikukuq purun animalkunatawan kachukuq maqta urukunatam
paykunaman kachaykusaq.
25Callekunapim churinkupas espadapi wañunqaku,
wasinku ukupiñataqmi mancharisqallaña kanqaku;
jovenkunawan sipaskunapas,
ñuñuq wawakunawan yuyaqkunapas wañunqakum.
26Paykuna cheqerachiytam tantearqani,
manaña yuyarisqa kanankupaq chinkarachiytam tantearqani.
27Ichaqa enemigokunapa asipayasqa kanantam mana munarqanichu,
yanqañataq contrankupi kaqkuna ninmanku:
“Kaytaqa kallpallanchikwanmi ruwarunchik,
manam Tayta Dioschu ruwan”, nispanku.
28Israel llaqtaqa mana yachayniyuqmi kachkan,
yuyaymanayninmi chinkarun.
29Yachayniyuq kaspaqa musyakunmankuchá imapim tukurunankutapas.
30¿Chullalla runa, waranqa runata qatikacharunmanchu?
¿Iskaylla runa, chunka waranqa runata qatikacharunmanchu?
Arí atirunmanmi,
ichaqa enemigonkuman waqaychaqninku Tayta Dios hapiykachiptillanmi.
31Enemigonchikkunapa waqaychaqninkuqa
manam waqaychaqninchik hinachu,
chaytaqa enemigonchikkunapas allintam yachanku.
32Paykunapaqqa uvas plantankupas
Sodoma Gomorra lawpi uvas hinam,
paykunapa uvasninkuqa venenoyuq qatqe uvaskunam.
33Vinonpas maqta urupa venenon hinam,
maqta urupa wañuchikuq venenon hinam, nispa.
34Tayta Diosmi nin:
“Tukuy kaykunatam qorita hina waqaychachkani.
35 #
Ro 12.19; Heb 10.30. Mana allin ruwaqkunatam castigasaq,
mana allin ruwasqankuman hinam pagapusaq.
Wichinanku punchawmi chayamuchkanña,
chinkachisqa kananku punchawmi hichpaykamuchkanña,
purmachisqa kananku punchawmi utqaykamuchkanña”, nispa.
36Tayta Diosmi llaqtanta mana kallpayuqta rikuspan nanachikunqa,
manaña pipas kallpayuq qepasqanta rikuspanmi
serviqninkunata llakipayarinqa.
37Tayta Diosmi enemigonchikkunata ninqa:
“¿Maytaq chay qaqa hina hapipakunaykichik idoloykichikkunaqa?
38¿Maytaq ofrecesqanku wirakuna mikuq idoloykichikkunaqa?
¿Maytaq vino tallipusqanku tomaq idoloykichikkunaqa?
Yanapasunaykichikpaq hatarichunku,
nanachikusunaykichikpaq hamuchunku.
39Kayta yachaychik: Ñoqallam Diosqa kani,
ñoqamanta hukqa manam kanchu.
Ñoqallam wañuchinipas ñoqallataqmi kawsachinipas,
ñoqallam kirinipas ñoqallataqmi hampinipas,
makiymantaqa manam pipas librakunmanchu.
40Cieloman makiyta haywarispaymi jurani,
wiñaypaq kawsaq Dios kasqayta.
41Espadayta llipipipinankama ñawchiyachispaymi,
justicia ruwanaypaq espadayta hapiykuspaymi,
enemigoykunamanta vengakusaq,
ruwayninkuman hinam cheqniwaqniykunaman pagapusaq.
42Flechaykunatam yawarwan sinkarachisaq,
espadaymi aychata mikukunqa;
wañuqkunapa, presokunapa yawarninta chapuparusaq,
capitankunapa umantam mikukunqa”, nispa.
43 #
Ro 15.10. #
Ap 19.2. Llapa nacionkuna, Diospa llaqtanwan kusikuychik,
Tayta Diosmi serviqninkunapa wañusqanmanta vengakunqa,
enemigonkunatam castiganqa.
Allpantam chuyanchanqa,
runankunatam pampachanqa, nispa.
Wañukunallanpaqña Moisespa rimarisqanmanta
44-45Israelpa mirayninkunapa qayllanman Moisés hamuruspanmi, Nunpa churin Josueypiwan chay takita qallariyninmanta tukuyninkama takirqaku. 46Chaymantam Israelpa mirayninkunata kaynata nirqa:
Tukuy kay nisqaykunata yuyaymanaspa sonqoykichikpi hatalliychik. Churikichikkunata kamachiychik kay yachachikuykunata kasukuspa ruwayman churanankupaq. 47Kay yachachikuykunaqa manam llutan yachachikuykunachu, aswanqa kawsachiqnikichikmi. Kay yachachikuykunaraykum Jordán mayuta chimpaspa Tayta Diospa qosusqaykichik allpapi unay watakunata kawsakunkichik, nispa.
Prometesqan allpata Moisesman Dios qawachisqanmanta
48Chay punchawllapim Moisesta Tayta Dios nirqa:
49Moab lawpi, Jericó llaqtapa chimpan Abarim orqokunaman rispaykiyá Nebo orqoman qespiy, chaymantam Israelpa mirayninkunaman qonay Canaán allpata qawarinki. 50Chay qespisqayki orqopim wañukunki, hinaspam ñawpaq taytaykikunapa kasqanman rinki, imaynam wawqeki Aaronpas Hor orqopi wañukuspan ñawpaq taytaykikunapa kasqanman risqanpi hina. 51Iskaynikichikmi Israelpa mirayninkunapa qayllanpi, Zin chunniqpi, Meriba-cades sitiopi ñoqapa contraypi huchallikurqankichik, hinaspam Israelpa mirayninkunapa qayllanpi mana hatunchawarqankichikchu. 52#Nm 27.12-14; Dt 3.23-27.Chaynaqa, chimpallanmantam chay allpataqa qawarinki, Israelpa mirayninkunaman qonay allpamanqa manam yaykunkichu.
Currently Selected:
Deuteronomio 32: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
