Deuteronomio 31
31
Moisespa rantinpi Josué churasqa kasqanmanta
(Nm 27.12-23)
1Israelpa mirayninkunatam huktawan Moisés nirqa:
2 #
Nm 20.12. Ñoqaqa pachak iskay chunka wataypiñam kachkani, mayman rinaypaqpas manañam kallpay kanñachu. Tayta Diospas niwarqataqmi “Jordán mayutaqa manam chimpankichu”, nispa. 3Chaywanpas Tayta Diosmi ñawpaqnikichikta rispan, chay risqaykichikpi nacionkunata chinkachispan paykunapa allpanta qosunkichik. Josueymi Tayta Diospa nisqanpi hina pusasunkichik. 4#Nm 21.21-35.Señornikichik Tayta Diosmi chinkachinqa imaynam amorreokunapa reynin Sehonta, rey Ogta chaynataq nacionninkutapas chinkachisqanta hina. 5Chay nacionkunata Tayta Dios vencerachisuptikichikqa, kamachisqayman hinam paykunawan ruwankichik. 6Chaynaqa, kallpanchakuspa qarinchakuychik. Ama paykunata manchakuychikchu, amataq katkatataychikchu; Señornikichik Tayta Diosmi qamkunawan richkan, manam payqa saqerusunkichikchu nitaqmi qonqasunkichikchu.
7Chaymantam Josueyta qayaspan Israelpa llapallan mirayninkunapa qayllanpi Moisés nirqa:
Kallpanchakuspa qarinchakuy, qanmi kay runakunata ñawpaq taytankuman Tayta Diospa jurasqan allpaman pusanki, hinaspam paykunaman qonki. 8#Jos 1.5; Heb 13.5.Tayta Diosmi ñawpaqnikita rispan qanwan kanqa. Manam saqesunkichu nitaqmi qonqasunkichu, chaynaqa ama manchakuychu nitaq hukmanyaychu, nispa.
Kamachikuykunata Ramada fiestapi leenankumanta
9Moisesmi kay yachachikuykunata qellqarqa, hinaspam Tayta Diospa pacton waqaychana Arca apaq Leví ayllu sacerdotekunaman chaynataq Israelpa llapallan ancianonkunaman qorqa. 10-11#Dt 15.12.#Dt 16.13-15.Chaymantam paykunata kamachispan nirqa:
Sapa qanchis wata tukuytam, manukuqkunata pampachana watapi, Ramada fiestata ruwanaykichikpaq Israelpa llapallan mirayninkuna Señornikichik Tayta Diospa qayllanman paypa akllasqan sitioman huñunakamunqaku, hinaspam lliwpa qayllanpi kay kamachikuy librota leenki. 12Llapallan runakunatam huñunkichik: Qaritapas, warmitapas, wawakunatapas chaynataq qamkunawan yachaq huklaw llaqtayuqkunatapas; chaynapi leesqanku yachachikuykunata uyarispanku Tayta Diosta manchakunankupaq hinaspa kay yachachikuykunata kasukunankupaq. 13Chaynapim kay yachachikuykunata manaraq yachaq miraynikichikkunapas uyarispanku Tayta Dios manchakuyta yachanqaku, Jordán mayuta chimpaspa Tayta Diospa qosqan allpapi kawsananku punchawkama.
Wañukunallanpaqña Moisespa rimarisqanmanta
14Moisestam Tayta Dios nirqa:
Wañukunayki punchawmi hichpamuchkanña, chaynaqa Josueyta qayaspa paywan kuska asuykamuwanaykichik carpaman riy, chaypi payman kamachikuyniykunata ninaypaq, nispa.
Chaynapim Moiseswan Josué rispanku, Tayta Diosman asuykuna carpapi sayarqaku. 15Chaypim paykunaman sayanpa puyupi Tayta Dios rikuriykurqa, chay puyuqa carpapa punkunpim sayaykurqa. 16Hinaptinmi Moisesta Tayta Dios nirqa:
Qamqa wañukunkiñam, ichaqa kay runakunam maymi risqanku allpapi, hukwan tupakuruq casada warmi hina mana reqsisqanku dioskunata qatinqaku. Saqeruwaspankum paykunawan ruwasqay pactotapas yanqacharunqaku. 17Hinaptinmi contrankupi piñakuruspay paykunata saqerusaq. Qepancharuptiymi puchukaytaña qallaykunqaku. Chaymi hatun sasachakuypi hinaspa hatun ñakariypi kaspa ninqaku: “Kay ñakariykunaqa hamuruwanchik Tayta Dios manaña ñoqanchikwan kasqanraykum”, nispanku. 18Chayna ñakariypi kaptinkum astawanraq paykunamanta karunchakurusaq, chaynataqa ruwasaq tukuy mana allinkunata ruwaspa idolokunataña yupaychasqankuraykum.
19Kunanyá kay takita qellqaspa Israelpa mirayninkunaman takinankupaq yachachiychik, chaynapi Israelpa mirayninkunapa contranpi testigo kananpaq. 20Ñawpaq taytaykichikkunaman juraspa prometesqay tukuy imapa kanan chaynataq tukuy imapa qespinan allpaman paykunata pusaruptiymi saksanankukama mikuspa wirayanqaku, ichaqa karunchakuruspam idolokunataña yupaychanqaku. Qepancharuwaspankum pactoytapas mana kasukunqakuchu. 21Chay hatun sasachakuykunapi chaynataq ñakariykunapi kaptinkum kay taki testigo kanqa, chaynapi mirayninkupas mana qonqanankupaq. Ñoqaqa yachaniñam qonaypaq jurasqay allpaman manaraq yaykuchkaspa imam tanteasqankutapas, nispa.
22Chay punchawmi Moisés qellqarqa kay takita, hinaspam Israelpa mirayninkunaman yachachirqa.
23 #
Nm 27.23. #
Jos 1.6. Nunpa churin Josueyta kamachispanmi Tayta Dios kaynata nirqa:
Kallpanchakuspa qarinchakuy, qanmi jurasqay allpaman Israelpa mirayninkunata pusanki, ñoqam qanwan kasaq, nispa.
24Chay yachachikuykunata Moisés qellqayta tukuruspanmi, 25Tayta Diospa pacton waqaychana Arca apaq Levitakunata nirqa:
26Kay kamachikuy librota Señornikichik Tayta Diospa Arcanman churaychik. Chaypi kachun, contraykichikpi testigo kananpaq. 27Ñoqaqa yachanim qamkunaqa mana kasukuq hinaspa rumi sonqo runakuna kasqaykichikta. Qamkunawanraq kachkaptiypas Tayta Diosta mana kasukuspaqa, imaynaraq wañukuptiy kankichik. 28Chaynaqa, aylluykichikpi ancianonkunatawan kamachikuqkunata qayamuychik, paykuna uyarichkaptin kaykunata nispay cielotawan kay pachata paykunapa contranpi testigota churanaypaq. 29Wañukuptiyqa cheqaptapunipas huchallikuspaykichikmi kay kamachisqayman hina kawsaymantapas karunchakurunkichik. Yachanitaqmi Tayta Diospa qayllanpi mana allinkunata ruwaspa payta piñachinaykichiktapas, chayraykum hamuq punchawkunapi castigasqa kankichik, nispa.
Moisespa qellqasqan taki
30Hinaptinmi Israelpa llapallan mirayninkunapa qayllanpi Moisés kay takita qallariyninmanta tukupayninkama rimarirqa:
Currently Selected:
Deuteronomio 31: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
