Deuteronomio 25
25
1Sichum pipas quejanakuypi kaspaqa juezmanmi rinqaku. Juezkunañataqmi allinta qatipaykuspanku huchayuq kaqta sentencianqaku. 2Chay huchayuqta azotenankupaq sentenciaptinkuqa, juezmi qayllanpi pampaman chutaykachispa huchanman hina azotechinqa. 3Ichaqa tawa chunka makillatam azotenkichik, yanqañataqmi llumpayta azoteruptikichikqa chay castamasikichik qayllaykichikpi penqaypaq kanman.
4 # 1 Co 9.9; 1 Ti 5.18. Erapi trillachkaq torotaqa amam senqapankichikchu.
Cuñadan viudawan casarakunanpaq yachachikuymanta
5Sichum wawqentin chulla wasillapi yachachkaptinku manaraq churiyuq kachkaspa huknin wañukuptinqa, chay wañukuqpa viudanqa amam sapaq runawanqa yapakunqachu. Aswanqa chay wañukuqpa wawqenmi chay viudata casaranqa hinaspam cuñadokunapaq kamachikuyta cumplinqa.
6 #
Mt 22.24; Mr 12.19; Lc 20.28. Chay viudapa piwi wawanmi wañukuq qosanpa sutinta apanqa, chaynapi wañukuqpa sutin Israelpa mirayninkunamanta mana chinkananpaq.
7Sichum cuñadanta chay runa mana casarayta munaptinqa, chay viudam llaqtapa punkunpi ancianokunaman rispan paykunaman willanqa: “Cuñadoymi wañukuq wawqenpa sutin Israel ukupi yuyarisqa kananta mana munanchu. Cuñadokunapaq kamachikuytam mana ñoqawan cumpliyta munanchu”, nispa.
8Hinaptinmi chay llaqtapi ancianokuna, chay warmipa cuñadonta qayachimuspanku paywan rimanqaku. Sichum chay runa ninqa: “Manam casarayta munanichu” nispa, 9hinaptinqa chay viudam ancianokunapa qayllanpi asuykuspan cuñadonpa usutanta chusturunqa, hinaspam uyanpi toqaykuspan ninqa: “Kaynatam wañukuq wawqenpa sutin yuyarinata mana munaq runataqa ruwana”, nispa.
10 #
Rt 4.7-8. Hinaptinmi Israel nacionpi chay runapa ayllunta sutichanqaku: “Usutan chustuchikuq runapa ayllunmi”, nispanku.
Wakin yachachikuykunamanta
11Sichum iskay runakuna maqanakuchkaptinku, huknin runapa warminñataq qosanta amachaspan chay huknin runapa qari kayninmanta hapiruptinqa, 12mana llakipayaspam chay warmipa makinta qorurunkichik.
13-14Amam maypipas rantinkichikchu nitaq rantikunkichikchu suwakuq balanzapiqa, nitaq mana cabal tupupipas.
15Cabal pesaq balanzapim rantinkichik otaq rantikunkichikpas, chaynapim Señornikichik Tayta Diospa qosusqaykichik allpapi unayta kawsakunkichik.
16 #
Lv 19.35-36. Señornikichik Tayta Diosqa millakunmi chayna mana allinkunata ruwaspa runamasinku engañaqkunataqa.
Amalecitakunata chinkachinankumanta
17Egipto nacionmanta lloqsimuptikichik amalecitakuna ñanpi imam ruwasusqaykichiktam yuyankichik, 18paykunaqa Tayta Diostapas mana manchakuspankum qepaykichik hamuq pisipasqakunata chaynataq hukmanyasqakunata hayparamuspanku wañuchirqaku.
19 #
Ex 17.8-14; 1 S 15.2-9. Chaynaqa, qosunaykichik allpapi llapa enemigoykichikta Señornikichik Tayta Dios vencerachisuptikichikmi llapa amalecitakunata kay pachamanta pasaypaqta chinkachinkichik. Yanqataq qonqaruwaqchik.
Currently Selected:
Deuteronomio 25: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
