Deuteronomio 19
19
Amparakunanku llaqtakunamanta
(Nm 35.9-28. Jos 20.1-9)
1Señorninchik Tayta Diosmi nacionkunata chinkachispan allpankuta qamkunaman qosunkichik, chaynapi llaqtankunapipas chaynataq wasinkunapipas yachanaykichikpaq. 2#Jos 20.1-9.Hinaptinqa Señorninchik Tayta Diospa qosunaykichik allpapim kimsa llaqtakunata akllankichik, 3hinaspam chay llaqtakunaman riq ñankunatapas allichankichik. Chaypaqmi chay allpaykichikta kimsaman partenkichik, chaynapi runamasin wañurachiq runa mayqannin llaqtamanpas lluptikunanpaq.
4Pipas runamasinta wañurachiq runam chay llaqtaman lluptikuspan vidanta libranqa, ichaqa qawachinqam runamasinta qonqaymanta wañurachisqanta hinaspa ñawpaqmantapas mana cheqnikusqanta. 5Ichapas kayna kanman: Pipas runamasinwan monteta yantaman rinman, hinaptinñataq hachawan waqtachkaptin cabonmanta hacha lloqsiruspan chay runata wañurachinman hinaptinqa wañurachiqmi chay hukkaqnin llaqtaman ayqekunqa, chaynapim mana wañunqachu. 6Yanqañataq ancha karupi chay llaqta kasqanrayku wañuqpa ayllun chay wañuchiqta vengakunanpaq piñakuywan qatispan wañurachinman, chay wañuchiq runa inocente kachkaptinpas otaq mana cheqnichkaspan qonqaymanta wañurachiptinpas.
7Chayraykum kamachikichik kimsa llaqtakunata sapaqchanaykichikpaq. 8Ñawpaq taytaykichikkunaman prometesqanman hina allpaykichikta Señornikichik Tayta Dios hatunyachispan lliw allpata qoykusuptikichikqa, 9chay kimsa llaqtakunamanmi kimsa amparakuna llaqtakunatawan yapankichik. Kunan willasqay kamachikuykunata kasukuptikichikqa hinaspa sapa punchaw payta kuyaspa kamachisqanman hina kawsaptikichikqa Señornikichik Tayta Diosmi allpaykichikta hatunyachinqa.
10Chaynapim Señornikichik Tayta Diospa qosunaykichik allpapi mana huchayuq runakunataqa mana wañuchinkichikchu, chaynataqmi wañuqkunamantapas mana huchayuq kankichik.
11Sichum pipas runamasinta cheqnisqanrayku qatispan traicionmanta wañurachispan amparakuna hukkaqnin llaqtaman ayqeptinqa, 12chay wañuchiqpa llaqtanpi ancianokunam hapirachimuspanku wañuqpa ayllunman hapiykachinqaku, hinaptinmi wañurachinqaku. 13Chayna runataqa ama llakipayaspam wañuchinkichik, chaynapim Israel nacionpi inocente runa mana wañuchisqachu kanqa. Chaynata ruwaptikichikqa ima ruwasqaykichikpas allinmi lloqsisunkichik.
14 #
Dt 27.17. Señornikichik Tayta Diospa qosunaykichik allpapi yachaspaqa, amam runamasikichikpa allpanpa linderonkunataqa asuchinkichikchu. Chay linderokunaqa ñawpaq taytaykichikkunapa churasqanku hinallam kanqa.
Llulla rimaq testigokunamanta
15 #
Nm 35.30; Dt 17.6; Mt 18.16; 2 Co 13.1; 1 Ti 5.19; Heb 10.28. Chullalla testigopa declarasqanwanqa amam pitapas mana allin ruwasqanmanta otaq huchallikusqanmantapas acusanqakuchu, aswanqa iskay otaq kimsa testigokuna declaraptillanmi.
16Pipas runamasinta cheqnikuspan imamantapas yanqamanta acusaptinqa, 17chay iskaynin quejanakuqkunam Tayta Diospa qayllanmanwan sacerdotekunapa chaynataq chay tiempopi juezkunapa qayllanman asuykunqaku. 18Juezkunañataqmi allinta qatipaykunqaku; sichum chay testigopa rimasqan yanqa kaptinqa 19chay runamasinpa contranpi mañakusqan castigowanmi castigasqa kanqa. Chaynata ruwaspam qamkunamanta mana allin ruwaqta chinkachinkichik. 20Chayta yachaspankum wakin runakunapas manchakunqaku, hinaspam manaña chay mana allinkunata ruwanqakuchu. 21#Ex 21.23-25; Lv 24.19-20; Mt 5.38.Amam llakipayankichu, payqa paganqapunim: Vidamantam vidanwan, ñawimantam ñawinwan, kirumantam kirunwan, makimantam makinwan, chakimantam chakinwan.
Currently Selected:
Deuteronomio 19: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
