Deuteronomio 15
15
Debekuqkunata pampachana watamanta
1Sapa qanchis watam debesuqnikichikta pampachankichik. 2Debekuqkunawanqa kaynatam ruwankichik: Runamasikichikman imatapas prestaykuspaqa pampachaykuspam amaña mañankichikñachu. Israelpa mirayninkuna kaptinpas otaq aylluykichik kaptinpas amañam mañankichikñachu. Chay watapim Tayta Diospa sutinpi kaynata willakunkichik: “Kunan wataqa debekuqkunata pampachana watam”, nispaykichik. 3Huklaw llaqtayuq kaptinmi ichaqa prestasqaykichiktaqa mañawaqchik. Castaykichikmantam ichaqa amaña mañankichikchu. 4Chaynapim qamkuna ukupiqa wakchakunapas mana kanqachu, aswanqa Señornikichik Tayta Diosmi qosusqaykichik allpapi bendecisunkichik, 5bendecisunkichikqa Señornikichik Tayta Diosta uyarispa kunan kamachisqankunata kasukuspaykichik ruwayman churaptikichikmi. 6Arí, Señornikichik Tayta Diosqa nisusqaykichikman hinam bendecisunkichik, chaymi achka nacionkunaman prestankichik. Qamkunam ichaqa mana paykunamanta prestakunkichikchu. Achka nacionkunapim munaychakunkichik. Qamkunapim ichaqa pipas mana munaychakunqakuchu.
7Sichum Señornikichik Tayta Diospa qosunaykichik allpapi, hukkaqnin yachasqaykichik llaqtapi qamkuna castamanta wakcha runa kanqa, hinaptinqa sonqoykichikta ama rumiyaykachispam yanapaykunkichik. 8#Lv 25.35.Llakipayaspaykichikmi nisqanman hina prestaykunkichik. 9Yanqañataq sonqoykichikpi mana allinkunata tanteawaqchik hinaspa “debekuqkunata pampachana qanchis kaq watam hichpamuchkanña” nispaykichik castamasikichikmanta wakchakunata mana allin ñawikichikwan qawaspa imallawanpas mana yanapaykuwaqchikchu; chayna kaptinqa contraykichikpi Tayta Diosta mañakuptinmi chay ruwasqaykichikwan huchallikuwaqchik. 10Amam maqllaqa kankichikchu, chayllam yanapaykunkichik. Chaynata ruwaptikichikqa Señornikichik Tayta Diosmi astawan tukuy ruwasqaykichikpi bendecisunkichik. 11#Mt 26.11; Mr 14.7; Jn 12.8.Kay pachapiqa manam wakchakunaqa faltanqachu. Chayraykum ñoqa kamachikichik, castamasikichikmanta wakchayaspa yarqaymanta kaqkunawan llakipayakuq kanaykichikpaq.
Criadokunapa favorninpi yachachikuymanta
(Ex 21.1-11)
12Hebreomanta kaq llaqtamasikichik qaripas otaq warmipas criadoykichik kananpaq kikinta rantikurususpaykichikqa, soqta watallam servisunkichik. Qanchis kaq watamanmi ichaqa libre lloqsikunqa. 13Libreta kachaykuspaykichikpas amataqmi mana imayuqtaqa kachaykunkichikchu. 14Aswanqa animalnikichikmantam, cosechaykichikmantam chaynataq vinoykichikmantam qoykunkichik. Señornikichik Tayta Diospa tukuy qosusqaykichiktam rakiykunkichik. 15Egipto nacionpi esclavo kasqaykichikmanta Señornikichik Tayta Dios hurqomususqaykichiktam yuyarinkichik. Chayraykum chaynata kunan kamachikichik.
16Sichum chay criadoykichik qamtapas chaynataq aylluykitapas kuyasqanrayku qamkunawan yachakakuruspa mana lloqsiyta munaptinqa, 17punkuykiman asuykachispam alesnawan rinrinta uchkurunki, hinaptinmi wañukunan punchawkamaña servisunki. Chaynallatam criadaykichikwanpas ruwankichik. 18#Lv 25.39-46.Criadoykichikta libre kachaykuytaqa amam llakikunkichikchu. Llamkapakuqpa parte pagollanpaqmi payqa soqta watantin servisurqankichik. Chaynapim Señornikichik Tayta Diospas tukuy ruwasqaykichikpi bendecisunkichik.
Punta kaq orqo uñakunata Diospaq sapaqchanankumanta
19 #
Ex 13.12. Vacaykikunapa ovejaykikunapa punta kaq orqo uñantam Señornikichik Tayta Diospaq sapaqchanki.
Vacaykikunapa punta wawan torochataqa amam llamkachinkichu, nitaqmi ovejaykikunapa punta wawan carnerochapa millwantapas rutunkichu. 20Señornikichik Tayta Diospa qayllanpim chay animalkunata sapa wata, aylluykikunawan kuska paypa akllasqan sitiopi mikunkichik. 21Sichum chay sapaqchasqayki animal, ñawsapas, weqrupas otaq imaynapas kaptinqa, amam Señornikichik Tayta Diosmanqa ofrecenkichu. 22Aswanqa maymi yachasqayki llaqtapim chayna animaltaqa mikunki, chuya kaspa mana chuya kaspapas; tarukapa otaq luwichupa aychanta hinam mikunki. 23#Gn 9.4; Lv 7.26-27; 17.10-14; 19.26; Dt 12.16, 23.Chay animalkunapa yawarnintam ichaqa ama mikunkichu, yakuta hinam pampaman tallirunki.
Currently Selected:
Deuteronomio 15: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
