Daniel 8
8
Carnerotawan chivatota revelacionninpi Daniel rikusqanmanta
1Kimsa wataña rey Belsasar munaychakuchkaptinmi ñoqa Daniel punta revelacionniypa qepanta huk revelaciontawan rikurqani. 2Chay revelacionniypim reypa yachanan Susa llaqtapi kachkasqani, chay llaqtaqa Elam lawpim kachkan; chaypim Ulai mayupa patanpi kachkasqani.
3Qawarispaymi mayupa patanpi huk carnerota rikururqani, chay carneroqa iskay waqrayuqmi kasqa. Chay waqrankuna hatunkama kachkaptinpas huknin waqram hukninmantaqa aswan hatun kasqa. Chay hatun waqraqa huknin waqranpa qepantañam wiñaramurqa.
4Qawachkaptiymi chay carneroqa intipa seqaykunan lawman, norte lawman hinaspa sur lawman takarqa; manam ima animalpas chay carneropa ñawpaqninpiqa sayayta atirqachu, manataqmi pipas paypa atiyninmantaqa librakuyta atirqachu. Munasqanman hina imatapas ruwaspanmi aswan-aswan hatunyarqa.
5Chay rikusqaypi yuyaymanachkaptiymi intipa seqaykunan lawmanta, pampatapas manaña saruykuspan altollantaña huk chivato pawamuchkasqa. Chay chivatoqa kasqa iskaynin ñawinkunapa chawpinpi huk hatun waqrayuqmi.
6Chay chivatom, mayu patanpi rikusqay iskay waqrayuq carneropa kasqanman piñasqallaña kallpamuspan tukuy kallpanwan waqraparurqa. 7Waqrapaspanmi chay carneropa iskaynin waqranta pakirurqa, hinaspanmi chay carnerota pampaman choqaruspan saruparurqa. Manam pipas chay chivatomanta carnerota libraykunanpaq karqachu; chaynapim chay carneroqa chivatopa ñawpaqninpi manaña sayayta atirqachu.
8Chay chivatom aswan atiyniyuq rikurirurqa, chayna atiyniyuqllaña kachkaptinmi hatun waqran pakikururqa, hinaptinmi chay waqrapa rantinpi tawa waqrakunaña wiñaramurqa, chay tawa waqrakunaqa tawa lawmanmi qawarqa.
9Huknin waqramantam huk taksa waqracha wiñaramurqa, chay waqracham sur lawman llumpayllataña wiñarurqa, wiñarurqataqmi intipa qespimunan lawmanpas chaynataq sumaq allpa lawmanpas. 10#Ap 12.4.Cielokunapi chaskakunapa kasqankamam llumpayta wiñarurqa, hinaspam wakin chaskakunata pampakama wichirichimuspa saruparqa.
11Chaskakunapa kamachiqninpa contranpi hatunchakuruspanmi, Diosman sapa punchaw ofrecesqanku ofrendatapas qechurachirqa, santuariotapas millakuypaqtam ruwarunqa. 12Mana kasukusqanraykum Diospaq sapaqchasqa tropakunapas hinaspa sapa punchaw Diosman ofrecesqanku ofrendakunapas paypa makinmanña churasqa karqa, cheqap kaqkunatapas pampakunamanraqmi wikaparqa, tukuy ima ruwasqanpipas payqa allinpunim lloqsirqa.
13Uyarichkaptiymi huk chuya angelñataq angelmasinta kaynata tapurqa: ¿Haykapikamataq kay qawachisqa kaqkuna kanqa? ¿Haykapikamataq Diosman sapa punchaw ofrenda qoy michakusqa kanqa? ¿Haykapikamataq kay mana kasukusqankurayku purmachisqa kaqkuna kanqa? ¿Haykapikamataq paypa makinman Diospa santuarionpas qosqa kanqa? ¿Haykapikamataq sarupasqa chay chaskakunapas kanqa? nispa.
14Hinaptinmi huknin angelñataq nirqa:
Waranqa pachak pichqa chunka punchawkuna pasanankamam chay ofrendakunaqa mana ofrecesqachu kanqa tutaykuytapas nitaq achkiykuytapas, chaymantañam Diospa santuarionqa huktawan chuyanchasqa kanqa, nispa.
15Ñoqa Danielmi chay revelacionniypi qawasqay kaqkuna yachaykuyta munaspa yuyaymanachkarqani. Qonqaymantam runaman rikchakuq ñoqapa ñawpaqniypi rikurirurqa. 16#Lc 1.19, 26.Chaymi uyarirqani Ulai mayupa patanmanta kayna qaparimuqta:
¡Gabriel, chay runaman willay kay visionpa imam ninanta! nispa
17Chaynapim payqa ñoqapa kasqaykama asuykamuwarqa, chaymi manchakuyllawanña qonqoranpa kumuykuptiy niwarqa:
“Runapa churin, kay imam qawasqaykiqa tukupay tiempokunapaqmi”, nispa. 18Rimapayawachkaptinmi pampaman pakchanpa mana musyakuqña wichiykurqani, chaymi sayarichiwaspan 19niwarqa:
Kunanmi willasqayki tukupay tiempokunapi imaynam Diospa piñakuynin kananmanta. 20Chay iskay waqrayuq carnero rikusqaykiqa Media nacionpa hinaspa Persia nacionpa reyninkunam.
21Chay chivatoñataqmi Grecia nacionpa reynin, chay iskaynin ñawinkunapa chawpinpi kaq waqranñataqmi Grecia nacionpa punta kaq reynin. 22Rikurqankitaqmi imaynam chay punta kaq waqran pakiruptin chaypa, rantinpi tawa waqrakunaña wiñaramusqantapas. Chay waqraqa huk munaychakuymi, chaymantam tawa kamachikuqkuna lloqsimunqaku, paykunaqa manam punta kaq munaychakuq hina ancha atiyniyuqchu kanqaku.
23Chay tawa kamachikuqkunapa munaychakuynin tukuykuchkaptinmi,
chaynataq mana kasukuqkunapa
tukuy mana allin ruwasqanku pasaypaqña rikuriruptinmi,
llumpay hatun tukuq hinaspa sakri-sakri rey hatarimunqa.
24Chay reyqa llumpay atiyniyuqmi rikurirunqa,
ichaqa manam kikinpa atiyninraykuchu chaynaqa kanqa;
payqa admirakuypaqtam tukuy imatapas purmachinqa,
tukuy ima ruwasqanpipas allinpunim lloqsinqa,
atiyniyuq runakunatam wañuchinqa,
Diospa llaqtantapas wañuchinqam.
25Sakrillaña kasqanraykum
runakunata llumpayta engañanqa.
Sonqonpi hatunchakuspanmi
hawka kawsakuqkunatapas achkallataña wañuchinqa.
Payqa kamachikuqkunapa kamachiqninpa contranpim hatarinqa,
aswanqa vencesqam kanqa, ichaqa manam runakunapa atiyninwanchu.
26Chay kimsa wata partenpi imakunam pasananmanta rikusqaykiqa cheqappunim. Chay rikusqaykimantaqa amam pimanpas willakunkichu, chayqa unay watakunamantañam cumplikunqa.
27Ñoqa Danielmi eqoyaruspay achka punchawkuna onqorurqani, chaymantañam allinyaykuspay reypa kaqninkunata huktawan ruwarqani, ichaqa chay imam rikusqaykunawanmi muspaypi hina tarikurqani, chayqa karqa mana entiendey atinam.
Currently Selected:
Daniel 8: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
