Daniel 7
7
Danielpa mancharikuypaq animalkuna mosqorusqanmanta
1Babilonia nacionpi rey Belsasar munaychakuyta qallarisqan watapim, Danielqa mosqorurqa hinaspam visionkunata rikurqa. Chaymi hatarispan imam mosqorusqanta 2kaynata qellqarqa:
Ñoqam mosqoyniypi qawachkasqani tukuy hinastinmanta vientokuna pukumuspan hatun lamar qochapa yakunkunata kayman chayman kuyuchiqta. 3#Ap 13.1; 17.8.Hinaptinmi qonqaymanta tawa manchakuypaq hatun animalkuna lamar qochamanta lloqsimuchkasqa. Chay tawa animalkunaqa manam kaqkamallachu kasqaku. 4Punta kaq animalmi huk leonman rikchakusqa, ichaqa anka hina raprayuqmi kasqa. Chayta qawachkaptiymi raprankunata chutaruspanku pampamanta hatarirachiptinku runa hinaña iskaynin chakinwan sayarqa, hinaspam runa hina sonqoyuqña rikurirurqa.
5Iskay kaq animalmi rikchakusqa ukumariman, ichaqa huklaw waqtanmi hukninmanta masta hoqarikusqa. Siminpim kanirayasqa kimsa costilla tullukunata. Paytam nimurqa: “Hatarispayki aychata atinaykikama mikuy”, nispa.
6 #
Ap 13.2. Kimsa kaq animalmi leopardoman rikchakusqa, chay animalqa kasqa wasanpi tawa raprayuqmi hinaspa tawa umayuqmi. Chaymi munaychakunanpaq payman atiy qosqa karqa.
7 #
Ap 12.3; 13.1. Chay mosqoyniypi tawa kaq animal rikusqayñataqmi kasqa anchapas mancharikuypaq hinaspa kallpasapa. Kirunkunapas kasqa fierromanta hatu-hatunkunam, mikuspanpas pasaypaqtam chamchapasqa, puchusqantañataqmi sarupasqa. Chay animalqa kasqa wakin qawasqay animalkunamantapas pasaypaq hukmanmi hinaspa chunka waqrayuqmi. 8#Ap 13.5-6.Chay waqrakunata qawachkaptiymi, chawpinkumanta taksa waqracha wiñaramurqa, chay waqracha hatunyananpaqmi kimsa waqrakuna maymi kasqanmanta witusqa karqa. Chay waqrachaqa kasqa runapa ñawin ñawiyuqmi, kasqataqmi siminpas, chaymi hatun tukuspa rimarqa.
Wiñaypaq kawsakuqta Daniel qawasqanmanta
9 #
Ap 20.4. #
Ap 1.14. Qawachkaptillaymi reypa trononkuna churasqa karqa. Hinaptinmi huknin tronopi huk Yuyaq runa tiyaykurqa.
Paypaqqa pachanpas riti hina yuraq-yuraqmi kasqa,
chukchanpas algodón hina yuraq-yuraqmi kasqa,
trononpas lenwachkaq nina hinam kasqa,
trononpa ruedankunapas rawrachkaq nina hinam kasqa.
10 #
Ap 5.11. #
Ap 20.12. Ñawpaqninmantapas nina mayum lloqsirqa,
paytaqa waranqantin-waranqantinmi servirqaku,
ñawpaqninpipas manaña yupay atinam sayarqaku.
Tribunalpi juez tiyaykuptinmi librokuna kichasqa karqa.
11Chay taksan waqrapa hatun tukuspa imaymana rimasqanta qawachkaptiymi, chay waqrasapa animalta wañurachirqaku, ayantapas ñutupaspam ninaman wischuykurqaku. 12Chay wakin animalkunapa munaychakuyninpas qechusqam karqa, ichaqa manam wañurachirqakuchu wañunan punchaw chayamunankama.
13 #
Mt 24.30; 26.64; Mr 13.26; 14.62; Lc 21.27; Ap 1.7, 13; 14.14. Tutam visionniypi qawarqani, qonqaymanta puyukunawan kuska alto cielomanta runapa churinman rikchakuq uraykamuqta, paymi Yuyaqpa kasqanman chayaramurqa, hinaptinmi Yuyaqpa qayllanman asuykachirqaku.
14 #
Ap 11.15. Chaymi payman atiyta, ancha reqsisqa kayta, munaychakuyta qoykurqaku; chaynapi llaqtakuna, nacionkuna, rikchaqmana rimayniyuqkuna payta servinankupaq.
Paypa munaychakuyninqa wiña-wiñaypaq mana tukuqmi,
kamachikuyninpas mana haykapipas chinkaqmi.
15Chaykunawanmi ñoqa Daniel hukmanyaruspay pensamientopa intusqan mancharisqallaña karqani. 16Chaymi hukkaqnin sayaqman asuykuspay, tukuy chaykunapa imam ninanta willaykuwananpaq tapukurqani, chaymi payqa tukuy chaykunapa imam ninanta kaynata willawarqa: 17“Chay tawa hatun animalkunaqa kay pachapi tawa hatarimuq munaychakuqkunam. 18#Ap 22.5.Ichaqa tukuy imapa hawanpi munaychakuq Diospa llaqtanmi chay munaychakuyta chaskinqaku, chaynapim chay munaychakuyqa wiña-wiñaypaq paykunapaña kanqa”, nispa.
19Ñoqam tawa kaq animalmanta cheqaptapuni imam ninan kasqanta yachaykuyta munarqani, chay animalqa kasqa kimsan animalmantapas hukman rikchayniyuq mancharikuypaqmi, fierromanta kiruyuq hinaspa broncemanta silluyuqmi. Payqa mikusqantapas pasaypaqtam chamchapasqa, puchuntañataqmi sarupasqa. 20Yachaykuytataqmi munarqani chay chunkantin waqrakunamantapas, ñawiyuq hinaspa hatun tukuspa rimaq simiyuq taksa waqrachamantapas. Chay waqracha hatunyananpaqmi kimsa waqrakuna maymi kasqanmanta witusqa karqa. Chay waqrachaqa rikchakapuwarqa wakin waqrakunamantapas aswan hatunmi. 21#Ap 13.7.Qawarqanitaqmi imaynam chay waqrachaqa Diospaq sapaqchasqa kaqkunata guerrawan hapispa vencerusqantapas. 22#Ap 20.4.Chaynam karqa huk Yuyaq hamunankama, payñam allin arreglota ruwarqa tukuy imapa hawanpi munaychakuq Diospa llaqtanpaq; tiempo chayaramuptinmi Diospa llaqtanña chay munaychakuyta chaskinqa.
23Hinaptinmi chay willawaqniy niwarqa:
Chay tawa kaq animalqa
kay pachapi hatarimuq tawa kaq munaychakuymi,
chayqa wakinmantaqa hukniraq munaychakuymi kanqa,
paymi kay pachapi kaqkunata tukurunqa,
tukuy imatapas ñutuparuspam saruparunqa.
24 #
Ap 17.12. Chay chunka waqrankunaqa
munaychakuymanta chunka hatarimuq reykunam.
Chay reykunapa qepantañataqmi
pasaypaq hukman rikchayniyuq rey hatarimunqa,
hinaspam kimsa reykunata tuñichinqa.
25 #
Ap 12.14; 13.5-6. Chay reyqa tukuy imapa hawanpi munaychakuq Diostam kaminqa,
Diospa llaqtantam ñakarichinqa,
costumbrekunatawan Diospa kamachikuynintam tikraruyta munanqa,
Diospaq sapaqchasqa kaqkunapim munaychakunqa,
chaynataqa kimsa wata partenmi munaychakunqa.
26Ichaqa juezmi tiyaykunqa tribunalpi,
hinaspa chay reypa munaychakuyninta qechurunqa,
munaychakuyninta qechuruspam wiñaypaq chinkarachinqa.
27 #
Ap 20.4. #
Ap 22.5. Kay pachapi gobiernokunapa munaychakuyninpas,
atiyninkupas, hatun kayninkupas
tukuy imapa hawanpi munaychakuq Diospa llaqtanmanmi qosqa kanqa,
munaychakuyninqa wiña-wiñaypaqmi takyanqa,
chaymi llapallan llaqtakuna payllataña servispanku kasukunqaku, nispa.
28Kaypim chay willawasqan tukun. Ñoqa Danielñataqmi chaykunapi yuyaymanarispay anchata mancharikurqani, uyaypas hukmanyarurqam; ichaqa chaykunata sonqollaypi waqaychaspam mana pimanpas willarqanichu.
Currently Selected:
Daniel 7: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
