Daniel 9
9
Llaqtamasinkunapaq Danielpa mañakusqanmanta
1Rey Asueropa churin Dariom Caldea lawpi munaychakuyta qallaykurqa, rey Darioqa karqa Media nacionniyuq runakunapa castanmi. 2#Jer 25.11; 29.10.Pay punta kaq watapi munaychakuyta qallarichkaptinmi, ñoqa Daniel profeta Jeremiaspa qellqanta estudiachkarqani, chay qellqapim rimachkan Jerusalén llaqtaqa qanchis chunka watapuni purmachisqa kananmanta, Jeremiasmanmi Tayta Dios chaynata nirqa. 3Hinaptinmi ayunakuspay Señor Diosta mañakurqani, paytaqa mañakurqani hawaypi uchpallaña luto pachayuqmi. 4Tayta Diosta mañakuspaymi huchaykumanta kaynata willakurqani:
Hatu-hatun manchakuypaq Señor Diosnilláy, kasuqnikikunawan pacto ruwasqaykita cumpliqmi kanki, kamachikuynikikuna kasukuqta kuyapayaykuqmi kanki. 5Ñoqaykuqa qampa contraykipi huchallikuruspam llumpa-llumpayta mana allinkunata ruwaruniku, kamachikuynikikunatawan yachachikuynikikunatapas mana kasukuspam qepanchakuruniku. 6Servisuqniki profetaykikunatapas manam uyarirqanikuchu, paykunaqa qanmantam willakurqaku reyniykumanpas, kamachiwaqniykumanpas, ñawpaq taytaykumanpas chaynataq nacionniykupi runakunamanpas.
7Señorllayku, qamllam kanki tukuy imapas allin ruwaqqa, Judapa mirayninkunam, Jerusalén llaqtapi yachaqkunam, tukuy hinastinpi yachaq Israel ayllukunam penqaypi kachkaniku. Qampa contraykipi hatarispa qepanchasqaykuraykum tukuy hinastinman cheqerachiwarqankiku. 8Dios Taytallayku, ñoqaykuqa penqakuypaqmi kachkaniku; reyniykupas, kamachiqniykupas, ñawpaq taytaykupas, contraykipim huchallikuruniku. 9Ñoqaykuqa manam kasurqaykikuchu, Señor Diosnillayku llakipayaykuwaspaykikum huchaykutapas pampachaykunki.
10Dios Taytallayku, kamachikuynikikunata profetaykikunawan willachiwasqaykikutapas manam uyarirqanikuchu, yachachikuynikikunaman hina kawsanaykupaqpas manam kasukurqanikuchu. 11Israelpa mirayninkunaqa imam yachachiwasqaykikutapas llapallaykum mana kasukurqanikuchu, qampa nisqaykitaqa manam uyariytapas munarqanikuchu; contraykipi huchallikuruspaykum juraspa ñakaynikikunawan ñakasqa kachkaniku, imaynam serviqniki Moisespa qellqasqanman hina. 12Qamqa ñam cumplirunkiña contraykupi chaynataq kamachiqniykupa contranpi rimasqaykitapas, chaynapim chay hatun ñakariyta hawaykuman chayachimurqanki; sasachakuyqa manam haykapipas Jerusalén llaqtapiqa karqachu.
13Moisespa qellqasqan yachachikuykunaman hinam kay tukuy ñakariykunaqa chayaruwanku. Dios Taytallayku, chaywanpas ñoqaykuqa manam qampa yanapakuynikitaqa maskarqanikuchu, mana allin ruwasqaykumantapas manataqmi wanakurqanikuchu, cheqap kaqnikikunataqa manam uyariqpas tukurqanikuchu. 14Chayraykum Dios Taytallayku tukuy kay mana allinta ñoqaykuman kachaykamunki. Dios Taytallayku, qamqa tukuy imapas allin ruwaqmi kanki, ñoqaykum ichaqa niwasqaykikuta uyariytapas mana munarqanikuchu. 15Señor Diosnillayku, hatun atiynikiwanmi Egipto nacionmanta llaqtaykita hurqomurqanki, chay ruwasqaykikunawanmi qamqa anchallataña reqsichikunki. Chaywanpas ñoqaykuqa huchallikuruspam mana allinta ruwarqaniku. 16Señornillayku, allin ruwaq kasqaykiraykuyá akllakusqayki Jerusalén llaqtaykipa contranpiqa amaña piñakuyñachu nitaq rabiakuyñachu. Huchaykuraykum hinaspa ñawpaq taytaykupa mana allinkuna ruwasqankuraykum Jerusalén llaqtaykiwan runaykikunapas muyuriqniykupi nacionkunapa usuchisqan kachkaniku.
17Chaynaqa, Diosnillayku, kunanyá kay serviqnikipa qayakuyninta uyariykullaway, sutikiraykuyá purmachisqa santuarioykita llakipayaykuy. 18Diosnilláy, kumuykamuspayá uyariykullaway, ñawillaykitapas kichariykuspayá ñakariyniykutawan sutiki hatunchanayku llaqtapa purmasqa kasqanta qawariykuy. Ñoqaykuqa manam mañakuchkaykiku allin ruwasqaykupi hapipakuspachu, aswanqa ancha llakipayakuq kasqaykipi hapipakuspam. 19¡Señorlláy, uyariykullawayku! ¡Diosnilláy, pampachaykullawayku! ¡Señorlláy, uyariykuspa yanapaykullawayku! Diosnilláy, kikikirayku, Jerusalén llaqtaykirayku, sutikita hatunchaq runaykikunarayku ama unamuychu, nispa.
Qanchis chunka semanamanta
20Tayta Diosta mañakuspay huchaykunatapas hinaspa llaqtamasiykunapa huchantapas hinallaraq willakuchkaptiymi, sapaqchakusqan moqorayku mañakuchkaptiymi, 21#Lc 1.19, 26.Diosman tardeykuq ofrendata ofrecena horata, ángel Gabriel altonta pawamuspa ñoqapa kasqayman chayaramurqa. Paytaqa punta visionniypipas rikurqaniñam. 22Paymi kaynata niwarqa:
Daniel, ñoqaqa qamta entiendechinaypaqmi hamurqani. 23Mañakuyta qallaykuptillaykiraqmi Diosqa uyariykusurqankiña. Qamqa paypa ancha kuyasqanmi kanki, chayraykum uyarisusqaykita qanman willaykuq hamurqani. Chaynaqa, visionpi qawasqaykita entiendenaykipaqyá allinta uyariway:
24Qanchis chunka semanam tanteasqa kachkan
nacionnikipaqpas chaynataq chuya llaqtaykipaqpas,
mana kasukuyninkuwan huchallikuyninkupas tukunanpaq,
huchapas puchukachisqa kananpaq,
mana allin ruwayta pampachananpaq;
allin ruwayta wiñaypaq takyachinanpaq,
visionpas profeciapas cumplikunanpaq,
Chuyay-chuyay lugarpas Diosllapaqña sapaqchasqa kananpaq.
25Kaytam yachanayki hinaspa allinta entiendenayki:
Jerusalén llaqta huktawan hatarichisqa kananpaq
kamachikuy lloqsimusqanmantam
Kamachikuq Mesías hamunankamam qanchis semana pasanqa.
Chaymantam soqta chunka iskayniyuq semanakuna pasanqa;
chay tiempopim Jerusalén llaqtapa plazankunapas
perqankunapas musoqmanta hatarichisqa kanqa.
Chaykunaqa ruwasqa kanqa hatun sasachakuy tiempopim.
26Chay soqta chunka iskayniyuq semanakuna pasaruptinmi,
Kamachikuq Mesiasqa wañuchisqa kanqa.
Jerusalén llaqtatapas huk reymi tropankunawan hamuruspa tuñirachinqa,
chaynataqmi santuariotapas tuñirachinqa.
Lloqlla hinam puchukay chayaramunqa,
Puchukay chayamunankamam guerrakunapas
hinaspa purmachiykunapas kanqa.
27 #
Dn 11.31; 12.11; Mt 24.15; Mr 13.14. Chay reymi achka runakunawan
contratota huk semanapaq ruwanqa;
Ichaqa chawpi semanallapiraqmi
Diospaq animalkuna wañuchinankutapas,
Diosman kawsay ofrendakuna qonankutapas harkakurunqa.
Templopa altarninpipas millakuypaq kaqkunatam ruwanqa,
Chaykunapa qepantam chay millakuypaq runata Diospuni puchukarachinqa.
Currently Selected:
Daniel 9: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
