Amós 6
6
Israel nación tuñichisqa kananmanta
1¡Ay, imaynaraq kankichik!
Jerusalenpi hawkallaña yachaqkuna,
chaynataq Samaria orqopi hapipakuqkuna.
¡Ay, imaynaraq kankichik!
Israelpa hapipakunan
ancha reqsisqa nacionkunapi kamachikuqkuna.
2Calne llaqtanta pasaspayá qawaykuychik,
chaymanta Hamat llaqtaman rispayá
Filistea nacionpi Gat llaqtaman uraykuychik.
¿Kay nacionkunamanta aswan atiyniyuqchu kankichik?
¿Allpaykichikpas paykunapamanta aswan hatunchu?
3Qamkunam piensankichik sasachakuy
punchawta qamkunamanta asurachiyta,
ichaqa aswanraqmi qayaypaq qayachkankichik
ñakariy tiempokunata.
4Marfilmanta suma-sumaq catrekunapim waqtapankichik,
mastakuykuspam puñukunkichik,
malta carnerokunatawan malta torokunatam
kanchanmanta hurqoykuspa mikukunkichik.
5Arpata tocaspam musoq takikunata hurqokunkichik,
rey David hinaraqmi musoq tocanakunata ruwakunkichik.
6Hatun vasokunapim vinota upyakunkichik,
suma-sumaq perfumekunawanraqmi llusikunkichik,
ichaqa manam llakikunkichikpaschu
Joseypa ñakariyninmantaqa.
7Chayraykum kunan preso apaqkunapas
qamkunamanta qallarispa presochasunkichik;
chaynapim hawkallaña samakuspa upyakuynikichikwan
mikukuynikichikpas tukunqa.
8Tukuy Atiyniyuq Tayta Diosmi kikinrayku juraspa kaynata nin:
Millakunim Israelpa hatun tukuynintapas,
palacionkunatapas cheqninim;
chayraykum llaqtata tukuy ima kapuqninkunatawan
enemigonman qoykusaq.
9Chaykuna pasakuptinmi, huk wasipi chunkallaña qepaqkunamantapas lliw wañunqaku. 10Hinaptinmi wasimanta tullukunata wischunanpaq hukkaqnin ayllun wañuqkunapa cuerponta kañanqa; hinaspanmi wasi kuchupi qeparuqta tapunqa:
¿Kachkanraqchu pipas chaypi? nispa.
Chaymi pakakuqñataq nimunqa:
Manañam kanñachu, nispa.
Yaykuqñataqmi ninqa:
¡Upallay! Yanqañataq Tayta Diospa sutinpi jurawaq, nispa.
11Tayta Dios kamachiptinmi
hatun sumaq wasikunatapas tuñirachinqaku,
taksan wasikunatañataqmi purmarachinqaku,
lliwtam ñuturunqaku.
12¿Yaqachu caballokuna qaqanta kallpanmanku?
¿Yaqachu torokuna qaqapi yapunmanku?
¿Imanasqataq allin ruwayta wañuyman tikrarunkichik?
¿Imanasqataq allin kawsakuyta qatqeyarachinkichik?
13Qamkunam #6.13 Hebreo simipi Lo-Debar ninanqa “kallpallanman hapikuymi” ninanmi.Lo-Debar llaqtata vencerusqaykichikmanta
kusikuspa ninkichik:
¿Manachum kallpanchikwan #6.13 Hebreo simipi Carnaín ninanqa, “waqra” ninanmi.Carnaín llaqtatapas vencerunchik? nispaykichik.
14Chaynaqa, Israel runakuna,
Tukuy Atiyniyuq Tayta Diosmi kaynata nin:
Huk naciontam qamkunapa contraykichikpi hatarichisaq,
norte lawpi Hamat llaqtamanta qallaykuspa
sur lawpi Arabá mayukama ñakarichisunaykichikpaq, nispa.
Currently Selected:
Amós 6: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
