Amós 5
5
Israelta huchanmanta wanakunanpaq Diospa qayasqanmanta
1Israel runakuna uyariychik,
llaki simikuna rimarisqayta.
2Manaraq qari reqsiq sipas hinam Israel wichiykun
haykapipas manaña hatariy atinankama,
maymi tuñisqanpim qeparun,
manam pipas hatarichiqnin kanchu.
3Tayta Diosmi Israel nacionta kaynata nin:
Huk llaqtamanta waranqawan lloqsiqmi,
pachakllawanña kutimunqa,
pachakwan lloqsiqñataqmi
chunkallawanña kutimunqa.
4Tayta Diosmi Israel nacionta nin:
Maskawaychik hinaspaqa kawsankichikmi.
5Amaña idolokunata Bet-elpi maskaychikñachu,
amaña Gilgalmanpas yaykuychikñachu,
nitaq Beersebamanpas riychikñachu.
Gilgalqa presochaspa apasqam kanqa
Bet-elñataqmi purmachisqa kanqa.
6Tayta Diosman kutirikamuychik kawsanaykichikpaq.
Yanqañataq nina hina wichiykamuspay
Joseypa mirayninkunata ruparuyman,
Bet-elpi manaña pipas wañuchiy atinankama.
7¡Ay, imaynaraq kanqaku!
cheqap kaqta ñakariyman tikraqkuna,
allin kawsakuyta saruruspa yanqachaqkuna.
8 #
Job 9.9; 38.31. Maskaychik Suchu chaskakuna unanchaqta,
maskaychik Qalalu chaska unanchaqta,
tutayayta achkiyman tikraqta,
punchawtapas tutayachiqta,
lamar qochapa yakunkunata qayaspa
allpa pachaman chaqchurimuqta.
Payqa Tukuy Atiyniyuq Tayta Diosmi.
9Payqa atiyniyuqkunapa kallpanta yanqachaqmi,
atiyniyuq llaqtakunata purmachiqmi.
10Paykunaqa llaqtapa punkunpi
“allinta kawsaychik” niqninkutam cheqnirurqaku,
cheqap kaqkuna rimaqtam qepancharurqaku.
11Chaynaqa, wakchakunata yanqamanta tumpaspa
impuestota trigonpi chaskikusqaykichikraykum,
labrasqa rumikunawan wasikuna ruwasqaykichikpipas
mana yachankichikchu,
manataqmi uvas plantasqaykichikpa rurunmanta
vinotapas tomankichikchu.
12Yachanim millakuypaq huchaykichikkunatawan
mana kasukuspa tukuy mana allin ruwasqaykichikkunatapas,
yachanitaqmi allin kawsakuq runata ñakarichispa
Juezpa ñawpaqninpi wakchakunata juiciopi
pierdechinaykichikpaq qollqe chaskikusqaykichiktapas.
13Chayraykum allin yuyayniyuq runaqa upallakun,
tiempokuna mana allinña kasqanrayku.
14Allin kaqtayá kawsanaykichikpaq maskaychik,
amayá mana allin kaqtachu.
Chaynapi nisqaykichikpi hina
Tukuy Atiyniyuq Tayta Dios qamkunawan kananpaq.
15Mana allin kaqta cheqnispayá allin kaqta kuyaychik,
juzgaspapas cheqap kaqwanyá juzgaychik;
chaynapiqa ichapas Tukuy Atiyniyuq Tayta Dios
Joseypa mirayninmanta puchuqkunata llakipayarinmanraq.
16Tukuy Atiyniyuq Tayta Diosmi kaynata nin:
Llapa plazakunapim waqanqaku,
callekunapim qaparkachanqaku.
Chakrapi llamkaqkunatam waqanankupaq qayamunqaku,
waqapakuspa ganakuqkunatam waqanankupaq pusamunqaku.
17Chawpinkuta ñakarichistin pasaptiymi
uvas chakra ukukunapi waqanqaku.
Tayta Diosmi chaynata nin.
18¡Ay, imaynaraq kankichik!
Diospa punchawnin chayamunanta munaqkuna.
¿Imapaqtaq Diospa punchawnin
chayamunanta munankichik?
Chay punchawqa kanqa tutayaymi,
manam achkiychu.
19Imaynam leonmanta ayqespan
ukumariwan tuparunman,
otaq wasinman yaykuspa perqaman
tawnapakuykuptin maqta uru kachurunman,
chaynapunim chay punchawqa kanqa.
20¿Manachum Diospa punchawninqa kanqa
mana imayrikuqllapas achkiyuq
aswanqa ancha-ancha tutayay?
21Cheqninim, millakunim
yupaychawanaykichikpaq fiestaykichiktapas,
hatun huñunakuykuna ruwasqaykichiktapas
manam munanichu.
22 #
Is 1.11-14. Sacrificiokunata kañaspa
kawsaykunamanta ofrenda qowasqaykichiktapas
manam chaskisqaykichikchu;
ñoqawan allinyanakunaykichikpaq
wira animalkuna wañuchipuwasqaykichiktapas
manam rikuytapas atinichu.
23Qayllaymanta wischuychik takikichiktapas,
arpa tocasqaykichiktapas
manam uyariyta munanichu.
24Allin juzgasqaykichikpas
kallpachkaq mayu hinayá kachun.
Justicia ruwasqaykichikpas
mana chakiq pukyu hinayá kachun.
25Israel runakuna,
¿yaqachu tawa chunka wata
mana imapa kanan chunniqpi purispa
ofrendakunatawan sacrificiokunata ofrecewarqankichik?
26Aswanraqmi Moloc chaynataq
Quiún sutiyuq idoloykichikkunata
chaskakunaman rikchaykachispa
“diosmi” nispa ruwasqaykichikta
qepirikuspa apaykacharqankichik.
27 #
Hch 7.42-43. Chayraykum Tukuy Atiyniyuq Tayta Dios kaynata nin:
Damascopa waklawninkunamanraqmi
presota apachisqaykichik, nispa.
Currently Selected:
Amós 5: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
