Amós 7
7
Israelpa puchukananmanta
1Tukuy Atiyniyuq Tayta Diosmi kayta rikuchiwarqa: Reypaq cosechayta tukuruptinkum michka hinasqanku wiñachkasqa, hinachkaptinmi Diosta rikurqani aqaruway urukunata uywachkaqta. 2Chay aqaruwaykuna qorakunatapas mikuyta tukuruptinkum mañakurqani:
Dios Taytalláy, pampachaykullawayku, Israel llaqtaqa aschallam kaniku, ¿pitaq hatarichiwanqaku? nispay.
3Chaymi Israelta kuyapayarispan Tayta Dios nirqa:
Pampachanim, manañam pasakunqachu, nispa.
Israelta ninawan castigananmanta
4Kaytawanmi Tayta Dios qawachiwarqa: Ninawanmi llaqtata Tayta Dios castigarqa; hinaptinmi lamar qochata chay nina chakirachispan kay pachatapas partenta ruparurqa. 5Chaymi mañakurqani:
¡Dios Taytalláy, pampachaykullawayku! Israel llaqtaqa aschallam kaniku, ¿pitaq hatarichiwanqaku? nispay.
6Chaymi Israelta kuyapayarispan Tayta Dios nirqa:
Pampachanim, manañam pasakunqachu, nispa.
Diosta plomada hapichkaqta rikusqanmanta
7Tayta Diosqa qawachiwarqataqmi kaytapas: Diosmi huk perqapa ñawpaqninpi sayachkasqa albañilpa plomadan hapikusqa. 8Hinaspanmi tapuwarqa:
Amós, ¿imatataq rikuchkanki? nispa.
Ñoqañataqmi nirqani:
Albañilpa plomadantam Señor, nispay.
Chaymi Dios niwarqa:
Kay plomadawanmi Israelpa imaynam kawsasqanta yachasaq, manañam pampachasaqñachu. 9Isaacpa idolokunata yupaychanan moqokunam tuñichisqa kanqa, Israelpa santuarionkunapas ñutusqam kanqa; rey Jeroboampa mirayninkunatam espadawan wañuchisaq, nispa.
Amasiaspa contranpi Amospa profetizasqanmanta
10Hinaptinmi Bet-elpi kaq sacerdote Amasías, Israelpa reynin Jeroboamman willachimurqa kaynata:
Amosmi contraykipi hatarirun. Israelpi runakunaqa manam tukuy ima rimasqanta aguantayta atinmankuchu. 11Amosmi nichkan: “Jeroboammi espadapi wañunqa, Israelñataqmi karu llaqtaman preso apasqa kanqa”, nispan.
12Chaymantam Amosta qarqospan sacerdote Amasías nirqa:
¡Yaw profeta, kaymanta pasaway! mikunaykipaq ganaykuyta munaspaykiqa Judá nacionpiñayá profetizamuy.
13Amaña Bet-elpiqa profetizayñachu, kaypiqa reypa santuarionmi kachkan, kaymantataqmi munaychakunpas, nispa.
14Hinaptinmi Amós nirqa:
Ñoqaqa manam profetachu kani nitaqmi profetapa churinchu, aswanqa ovejata michispa purun higosta huñukuqllam kani. 15Ichaqa Tayta Diosmi ovejata michichkaptiy qayaykuwaspan kamachiwarqa: “Israel llaqtayman riy hinaspa ñoqamanta willamuy”, nispan. 16Chaynaqa, Tayta Diospa nisqanta uyariy. Qanmi ninki: “Ama Israelpa contranpi nitaq Isaacpa mirayninkunapa contrapipas profetizaychu”, nispa. 17Chayraykum Tayta Dios kaynata nin: Warmikim llaqtapa chawpinpi chuchumika kanqa, churikikunam espadapi wañunqaku, allpaykitapas sorteaspam rakinakunqaku; qampas Diosta mana reqsiq runakunapa llaqtanpim wañunki, Israelñataqmi karu llaqtaman preso apasqa kanqa, nispa.
Currently Selected:
Amós 7: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
