Amós 4
4
1Basán lawpi wira vacakuna kaqlla
Samaria llaqtapi warmikuna,
qamkunam wakchakunata usuchinkichik,
mana imayuqkunatam sarutyankichik.
Qosaykichiktam kamachinkichik
vinota apamuy tomananchikpaq, nispaykichik.
Qamkunayá kayta uyariychik.
2Tayta Diosmi chuya kayninrayku kaynata jurarqa:
Hamuchkanmi tiempo senqaykichikmanta
ganchowan watuchaspa aysasqa kanaykichikpaq,
miraynikichikpas anzuelowan challwa hapisqa hina
apasqa kanankupaq.
3Perqa uchkunkunatam chulla-chullamanta lluptinkichik,
yachanaykichik wasimantam Hermón orqoman
wischusqa kankichik.
Tayta Diosmi chaynata nin.
Israelqa castigasqapas mana wanakuq kasqanmanta
4Qamkunaqa huchallikuytam anchata gustankichik,
chaynaqa Bet-elmanwan Gilgalman rispayá,
idoloykichikta yupaychamuychik,
manañam imapas qokuwanchu imayna kaynikichikpas.
5Sapa tutapaytayá levadurayuq tantata kañapuychik,
sapa kimsa punchawyá diezmoykichiktapas chayman astaychik,
ofrendata apamunankupaqyá tukuy hinastinpi qayaykachakamuychik,
aswan mastaraqyá huchallikuychik.
Israelpa mirayninkuna,
hucha ruwaytam qamkunaqa kuyankichik.
Tayta Diosmi chaynata nin.
6Ñoqam yarqayta pasachirqaykichik,
llaqtaykichikkunapipas manam mikuy karqachu,
chaywanpas qamkunaqa manam
ñoqaman kutirikamurqankichikchu.
Tayta Diosmi chaynata nin.
7Cosechapaq kimsa killaraq faltachkaptinmi
paratapas mana parachimurqanichu.
Huk llaqtapim parachirqani
huk llaqtapiñataqmi mana,
partentam para chayarqa,
parapa mana chayasqanñataqmi chakirurqa.
8Iskay-kimsa llaqtam huk llaqtaman yaku tomaq rirqaku
ichaqa manam saksarqakuchu.
Chaywanpas manam ñoqaman kutirikamurqankichikchu.
Tayta Diosmi chaynata nin.
9Wayrawan utuskuruwanmi uvasnikichiktawan huertaykichiktapas tukurqa,
higos plantaykichiktawan olivos sachaykichiktapas aqaruwaymi tukurqa,
ichaqa manam ñoqaman kutirikamurqankichikchu.
Tayta Diosmi chaynata nin.
10Egipto nacionta castigasqayta hinam qamkunatapas castigarqaykichik,
jovennikichikkunatapas espadawanmi wañuchirqani,
caballoykichikkunatapas enemigoykikunam apakurqaku,
wañuqkunapa asnaynintam muskirqankichik,
chaywanpas manam ñoqaman kutirikamurqankichikchu.
Tayta Diosmi chaynata nin.
11 #
Gn 19.24. Sodoma Gomorra llaqtakunata hinam chinkarachirqaykichik,
ninamanta hurqosqa sansa hinam karqankichik,
ichaqa manam ñoqaman kutirikamurqankichikchu.
Tayta Diosmi chaynata nin.
12Chaynatam Israel qamkunawanpas ruwasaq,
qamkunawan chaynata ruwanay kachkaptinqa,
Diosnikichikwan tupanaykichikpaq allichakuychik.
13Kayqaya: Orqokunata unanchaqqa,
wayrakunata hatarichiqqa,
imam munasqanta runakunaman reqsichiqqa,
tutayayta achkiyman tikraqqa,
kay pachapa hawankunapi puriqqa.
Payqa Tukuy Atiyniyuq Tayta Diosmi.
Currently Selected:
Amós 4: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
