Amós 3
3
Profetapa imam ruwananmanta
1Israelpa mirayninkuna uyariychik
Tayta Diospa imam nisqanta.
Egiptomanta hurqomusqan runakunapa contranpim
kaynata nin:
2Kay pachapi lliw ayllukunamantam
qamkunallata akllakurqaykichik.
Chayraykum tukuy mana allinkuna
ruwasqaykichikmanta castigasqaykichik.
3¿Yaqachu iskay runakuna kuska purinmanku
imapipas mana huk sonqolla kachkaspanku?
4¿Yaqachu montepi león qaparinman
mikunanpaq mana imatapas hapiruchkaspa?
¿Yaqachu uña león machayninpi yanqa qaparinman
mikunanpaq mana imatapas hapiruchkaspa?
5¿Yaqachu urpichakuna trampaman wichinman
mana pipas trampata churaruchkaptin?
¿Yaqachu trampa wichqakurunman
mana imatapas hapiruchkaspa?
6¿Yaqachu trompetata llaqtapi tocaptinku
runakuna hawka kakunmanku?
¿Yaqachu llaqtapi ima sasachakuypas hatarinman
Tayta Dios mana kacharimuchkaptin?
7Tayta Diosqa imam ruwananta profetankunaman
mana willachkaspaqa
manam imatapas ruwanqachu.
8León qaparimuptin
¿Pitaq mana mancharikunmanchu?
Tayta Dios rimariptin
¿pitaq mana profetizanmanchu?
Samaria llaqta tuñichisqa kananmanta
9Asdod llaqtapa palacionkunapi,
Egipto nacionpa palacionkunapi,
qaparispa niychik:
“Samariapa orqonkunaman huñunakuspa qawaychik,
Samariapa chawpinpi
hatun sasachakuytawan ñakarichinakuyta”, nispaykichik.
10Tayta Diosmi kaynata nin:
Paykunaqa manam allin ruwayta yachankuchu;
aswanqa mana llakipayarispa suwakusqankuta
palacionku ukupi pakayllatam yachanku, nispa.
11Chayraykum Tayta Dios kaynata nin:
Enemigoykikunam hamunqa kay pachapa muyuriqninmanta;
hinaptinmi muyuriqnikipi harkasuqniki perqakuna tuñichisqa kaptin,
palacioykipi tukuy ima taqesqaykipas suwasqa kanqa, nispa.
12Tayta Diosmi kaynata nin:
Imaynam ovejata león mikuruptin
michiqnin salvarun iskay piernallantaña
otaq rinrinpa puntallantaña,
chaynapunim Samaria llaqtapi yachaq
Israel runakunapas lluptinqaku;
suma-sumaq camapi puñuqkunapas
hinaspa waqtapaqkunapas chaynam ayqenqaku, nispa.
13Tukuy Atiyniyuq Tayta Diosmi kaynata nin:
Uyariychik hinaspa Jacob casta runakunapa
contranpi rimaychik.
14 # 2 R 23.15. Israel runakunata castigasqay punchawmi
Bet-el llaqtapi altarkunatapas tuñichisaq;
altarpa waqrankunapas kuchusqa kaspam
pampaman wichichisqa kanqa.
15Rupay tiempopaq wasitapas chiri tiempopaq
wasitawan kuskatam tuñichisaq;
apukunapa sumaqllaña wasinpas chinkanqam,
llapa wasikunapas purmanqam.
Tayta Diosmi chaynata nin.
Currently Selected:
Amós 3: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
