2 Corintios 9
9
Iglesiakunapaq ofrendamanta
1Iñiqkunapaq yanapakuy ofrenda huñunaykichikmantaqa yanqañam qellqamuykichikman. 2Yachaniñam yanapakuy munasqaykichiktaqa, chaymi Macedonia lawpipas kusikuywan willakuni:
Acaya lawpi kaqkunaqa qayna watamantaraqmi yanapakunankupaq chaylla karqaku, nispay.
Chayta yachaykuspankum Macedonia lawpi kaqkunapas yaqa llapallanku yanapakuyta munarqaku. 3Chaywanpas kachamuchkanim kay wawqekunata chaynapi qamkunamanta kaypi alabakusqay mana yanqa kananpaq, aswanqa nisqayman hina listolla kanaykichikpaq. 4Yanqañataq Macedonia lawpi kaqkunawan hamuspayku mana listotachu tarimuykikuman, chayna kaptinqa qamkunapi confiakusqaykumantachá penqaypi kaymanku. 5Chayraykum kay wawqekunata mañakurqani puntata watukamusunaykichikpaq, chaynapi manaraq hamuchkaptiyku prometekusqaykichik kuyakuy ofrenda huñuypi yanapasunaykichikpaq, chaynapim chay ofrendaykichikqa kuyakuynikichikmanta kanqa, manam mañasqaykuman hinachu.
6Kaytam nikichik: Pipas aslla tarpuqqa asllatam cosechanqa, achka tarpuqñataqmi achkata cosechanqa. 7Sapakamayá sonqonpi tanteasqanman hina qochun, amayá llakikuspachu nitaq obligasqa hinachu, Diosqa kusikuywan qoqtam kuyan. 8Diosqa mirayniyuqtam mana imaykichikpas pisipusunaykichikpaq imatapas qosunkichik, chaynapi wakin runakunamanpas yanapanaykichikpaq. 9#Sal 112.9.Chuya Qellqapim kaynata nin:
“Wakchakunamanmi imallantapas qoykarin,
allin ruwasqanqa wiña-wiñaypaqmi”, nispa.
10 #
Is 55.10. Tarpuqman muhu qoqmi hinaspa mikuqman tanta qoqmi qamkunapaqpas tarpuynikichikta achkayachinqa, achkayachinqataqmi allin ruwaynikichiktapas. 11Chaynapim apuyachisqa kankichik tukuy sonqoykichikwan qonaykichikpaq, ofrendaykichikta apaptiykum wawqe-panikunapas Diosman graciasta qonqaku. 12Kay yanapakuyta wawqe-panikunaman apaspaqa manam imapas pisisqallankutachu qonchik, aswanqa qosqaykichikraykum paykunaqa anchata Diosman graciasta qonqaku. 13Kay yanapakuywanmi runakunaman allin noticiata chaskispa kasukusqaykichikta qawachinkichik, chaymi paykunapas Diosta yupaychanqaku. Yupaychanqakutaqmi paykunapaqwan llapallan runakunapaq ofrenda qosqaykichikmantapas. 14Chaynataqmi paykunaqa tukuy kuyakuywan qamkunapaq Diosta mañakunqaku, hatun kuyakuyninta qamkunaman qawachisusqaykichikmanta. 15Diosman gracias kachun mana imayna niy atiy qokuyninmanta.
Currently Selected:
2 Corintios 9: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
