2 Corintios 12
12
Pablopa revelacionninkunamanta
1Imatataq hurqokusaq kikiymanta alabakuspayqa. Aswanqa Señorpa qawachiwasqan musqoymantawan revelacionmantam willasqaykichik. 2Reqsinim Cristopi iñiq huk runata, paymi chunka tawayuq wata qepata kimsa kaq cieloman apasqa karqa. Ichaqa cuerpopichuch otaq espiritupichuch apasqa kanman karqa, manam chaytaqa yachanichu; Diosllam chaytaqa yachan. 3Chay runataqa reqsinim, cuerpopichuch otaq espiritupichuch apasqa kanman karqa, manam yachanichu, Diosllam chaytaqa yachan. 4Paraisoman apasqam karqa, chaypim runapa mana rimay atinan palabrakunata uyarimurqa. 5Chay runamantam ñoqaqa alabakusaq, ichaqa manam kikiymantaqa alabakuymanchu, aswanqa mana kallpayuq kasqaymantam alabakusaq. 6Alabakuyta munaspayqa manam locoyachkanichu, ñoqaqa cheqapllatam rimachkani, ichaqa manam alabakusaqchu, chaynapi qawaqniykuna hinaspa uyariwaqniykuna mana aswanraq imatapas ñoqamanta piensanankupaq.
7Chay rikusqay suma-sumaq revelacionmanta mana hatun tukunaypaqmi, kichkapa tipakuyninta hina aychaypi qowarqa, chayqa karqa ñakarichiwananpaq Satanaspa kachamusqan toksikuq puyam. 8Chay ñakariyta qechuwananpaq kimsa kutikama Señorta mañakurqani. 9Hinaptinmi Señor niwarqa:
Kuyakuyniypiyá contentakuy, atiyniyqa mana kallpayuq runakunapim qawachikun, nispa.
Chaymi mana kallpayuq kasqaymanta kusikuywan alabakuni, chaynapi Cristopa atiynin ñoqapi takyananpaq. 10Chayraykum kusisqa kani mana kallpayuq kaspaypas, kamisqa kaspaypas, mana imayuq kaspaypas, ñakarichisqa kaspaypas hinaspa sasachakuykunapi kaspaypas. Mana kallpayuq kachkaspaypas aswan kallpayuqraqmi rikuriykuni.
Corinto llaqtapi iñiqkunamanta Pablopa llakikusqanmanta
11Qamkuna alabawanaykichik kachkaptinmi, loco hina kikillaymanta alabakurqani, ichaqa qamkunam chayta ruwachiwarqankichik. Ñoqaqa mana valeqña kaspaypas chay hatu-hatun apostolkunamantaqa manam menoschu kani. 12Qamkunawan kaspaymi reqsichikurqaykichik cheqap apóstol kasqayta, chaymi pacienciakuspa Diospa atiyninwan ruwarqani admirakuypaq milagrokunata. 13Qamkunaqa manam wakiq iglesiakunamantaqa menoschu karqankichik, menosqa karqankichik imatapas qamkunamanta mana mañakusqallaypim. ¡Qamkunata imapipas pantaptiyqa pampachaykuwaychik!
14Kunanqa chayllam kachkani kimsa kutipiña watukaykamunaypaq, ichaqa manam imatapas mañakusqaykichikchu. Manam imapas kapuqnikichik kaqtachu maskani, aswanqa qamkuna maskaqmi hamuni. Tayta-mamankunam churinkunapaqqa qollqeta huñun, manam churinkunachu tayta-mamankupaqqa. 15Munasqayman hinam kapuqniykunata gastasaq, qamkunaraykuqa kallpaytapas gastasaqmi. Manam imananchu llumpayta kuyachkaptiypas qamkunañataq pisilla kuyawaynikichikqa.
16Cheqaptapunipas qamkunaqa yachankichikmi ñoqaqa mana gastachiqnikichik kasqayta, wakiqninkuñataqmi ninku sakri kayniywan trampaman wichiykachisqayta. 17¿Icha pipas kachamusqaywanchu engañarurqaykichik? 18Titotam mañakurqani huk wawqepiwan watukamusunaykichikpaq. Hinaptinqa ¿icha Titochu engañarusurqankichik? ¿Manachum iskayniyku hina chaynallata kawsarqaniku?
19Kuyasqay wawqe-panillaykuna ¿ichapas yuyaymanachkankichik ñoqaykuqa qayllaykichikpi pampachakuy mañakusqaykuta? ñoqaykuqa Diospa qayllanpim Cristopa sutinpi rimachkaniku, tukuy chay rimasqaykuqa iñiynikichikpi wiñanaykichikpaqmi. 20Qamkunaman hamuspayqa ichapas mana sonqoypaq hinachu tariramuykichikman, ñoqapas icha mana sonqoykichikpaq hinachu karuyman. Manchakuchkanim qamkuna ukupi: Liryanakuykuna, envidianakuykuna, piñanakuykuna, kikillanpaq munaq kaykuna, rakinakuykuna, cuento qepi kaykuna, pipapas qepanpi rimaykuna, hatun tukuq kaykuna hinaspa chaqwanakuykuna kananmanta. 21Manchakuchkanitaqmi huktawan hamuptiy Diosniy qamkunapa rantikichikpi penqayman churawananmanta, chaynata tariykamuspayqa waqasaqchá. Ñawpaqmantaraqmi mana wanakuspa hinallaraq huchallikuchkankichik. Qamkunaqa manaraqmi wanakunkichikraqchu qanra vidaykichikmanta, waqllikuymanta hinaspa viciokunapi puriykunamantapas.
Currently Selected:
2 Corintios 12: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
