1 Corintios 4
4
Apostolkunapa llamkasqanmanta
1Ñoqaykutaqa Cristopa yanapaqninta hinallayá qawawayku. Ñoqaykuqa Diospa pakasqan kaqkunapi nanachikuq mayordomollanmi kaniku. 2Allin mayordomoqa patronpa kamachisqantam cumplin. 3Ñoqataqa manam imapas qokuwanchu qamkuna juzgawaynikichikpas otaq juezpa juzgasqan kaypas, nitaqmi kikiypas juzgakunichu. 4Concienciayña chuya kaptinpas manam mana huchayuqchu kani, ichaqa Señormi ñoqataqa juzgawanqa. 5Chaynaqa, qamkunapas amayá manaraq tiemponpiqa juzgaychikchu, Señorninchik Jesucristo hamuspan tutayaypi pakasqa kaqkunata achkiyman hurqomunankama. Paymi qawachinqa runakunapa sonqonpa munasqankunata, chayraqmi sapakamata Dios atunchanqa.
6Wawqe-panikuna, qankunapa allinnikichikpaqmi kaykunata qellqamuykichik, ñoqatawan Apolosta ejemplopaq churaspay, chaynapi Qellqapa nisqanman hinalla yachachinaykichikpaq hinaspa ama mayqannikichikpas hukninman sayapakuspa huknintañataq alabanaykichikpaq. 7Chaynaqa, ¿pitaq wakinmanta allin reqsisqa kanaykipaq ruwasurqanki? ¿Imataq Diospa mana qosusqayki? Pay qochkasuptikiqa ¿imanasqataq mana chaskiq hinaqa alabakunki?
8Qamkunaqa saksasqañam kachkankichik, apuyarunkichikñam kanpas, mana ñoqallaykuwanmi munaychakuchkankichikña. ¡Amalaya reyña kawaqchik ñoqaykupas qamkunawan kuska reyña kanaykupaq! 9Piensasqayman hinaqa ñoqayku apostolkunataqa Diosmi qepamanña churaruwanku, chaymi wañuypaq sentenciasqa hinaña kachkaniku. Chaymi runakunapaqpas hinaspa angelkunapaqpas kay pachapi qawakuwanankupaq kachkaniku. 10Ñoqaykuqa Cristoraykum mana yachayniyuqpaq hapisqa kaniku, qamkunañataqmi ichaqa Cristopi yachayniyuq kankichik. Ñoqaykutaqa mana kallpayuqpaqmi hapiwanku, qamkunam ichaqa kallpasapa kachkankichik. Runakunam qamkunata respetasunkichik, ñoqaykutañataqmi despreciawanku. 11Kunankamam yarqaymanta, yakumanta, mana pachayuq hinaspa runakunapa maqasqan ñakarichkaniku, wasiykupas manam kanchu. 12#Hch 18.3.Makiykuwan llamkaspam llumpayta pisipaniku, runakunam insultawanku, ñoqaykunañataqmi bendeciniku; qatikachawaptinkupas aguantanikum. 13Mana allintam ñoqaykumanta rimanku, ñoqaykum ichaqa kuyakuyllawan kutipakuniku, kunankamam kay pachapi millakuypaq wanuta hina qawawanku.
14Manam kaykunataqa qellqamuykichik penqachinaypaqchu aswanqa kuyasqay churiykunaman hina consejanaypaqmi. 15Cristomanta chunka waranqaña yachachiqnikichik kaptinpas manam achkachu taytaykichikqa, Cristo Jesusmanta allin noticiata willaspa payman iñichisqayraykum ñoqaqa taytaykichik hina kani. 16#1 Co 11.1; Flp 3.17.Chaymi ruegakuykichik imam ruwasqayta hina ruwanaykichikpaq.
17Chayraykum kachamuchkaykichik Señorpi allin takyaq kuyasqa churiy Timoteota, paymi yuyarichisunkichik imaynam Cristopi kawsasqayta hinaspa imaynam tukuy hinastinpi iñiqkunata watukuspay yachachisqayta. 18Wakiqnikichikmi qari tukuqllaña rikurirunkichik, yaqapas manaña qamkunaman chayaramunayta piensaspaykichik. 19Chaywanpas Señor munaptinqa chayllam hamurusaq qawaykuqnikichik, hinaspam yachasaq chay qari tukuq runakunapa imam rimasqankuta. 20Diospa munaychakuyninqa manam rimayllachu, aswanqa Diospa atiyninmi. 21¿Imatataq munankichik? ¿Qamkunaman rispay azotewan hamunaytachu? icha ¿Kuyakuywan sumaq sonqolla hamunaytachu?
Currently Selected:
1 Corintios 4: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
