1 Corintios 15
15
Cristopa kawsarimusqanmanta
1Kunanqa wawqe-panikuna, Cristomanta allin noticia willasqaytam yuyarinaykichikta munani, chayqa chaskisqaykichik noticiam, chaywantaqmi qamkunaqa qaqa hina sayachkankichik. 2Chay allin noticiawanmi qamkunaqa willasqayman hina salvasqa kankichik, mana chayqa yanqapaqchiki iñiwaqchik karqa.
3 #
Is 53.5-12. Tukuymanta llalliqtaqa chaskisqayman hinam yachachirqaykichik: Qellqapa nisqanman hinam Cristoqa huchanchikkunarayku wañurqa. 4#Sal 16.8-10; Os 6.2.Chaynallataq Qellqapa nisqanman hina, pampasqa kasqanmanta kimsa punchawman kawsarimurqa, 5#Lc 24.34.#Mt 28.16-17; Mr 16.14; Lc 24.36; Jn 20.19.hinaspam Pedroman rikuriykurqa. Chaymantañataqmi rikuriykurqa chunka iskayniyuq apostolninkunaman, 6pichqa pachak masnin huñunasqa wawqe-panikunaman, wakinkunaqa kawsakuchkanraqmi, wakinkunam ichaqa wañukunkuña. 7Chaymantañataqmi Jacoboman hinaspa llapallan apostolkunaman rikuriykurqa.
8 #
Hch 9.3-6. Tukupaytañataqmi mana tiemponpi nacemuq wawaman hina ñoqaman rikuriykuwarqa. 9#Hch 8.3.Ñoqaqa llapallan apostolkunamantapas taksan kaqmi kani, ñoqaqa iñiqkunata ñakarichisqayraykum mana apostolwan sutichawanankupaq hinachu kani. 10Ichaqa Diospa kuyapayakuyninman hinam kunanqa apostolña kani, paypa kuyapayawasqanqa manam yanqapaqchu karqa, ñoqaqa llamkachkani wakin apostolkunamantapas mastaraqmi, ichaqa manam kikillaymantachu aswanqa Diospa yanapakuyninwanmi. 11Manam imananchu ñoqa willakuptiypas otaq paykuna willakuptinkupas, kay willakusqaykuraykum qamkunapas iñirqankichik.
Wañukuqkunapa kawsarimunanmanta
12Willakunikuqa Cristopa kawsarimusqanmantam, hinaptinqa ¿imaynamá wakiqnikichikqa ninkichik:
Wañuqkunaqa manam kawsarimunqachu, nispaykichikqa?
13Sichum wañuqkuna mana kawsarimunan kaptinqa Cristopas manachiki kawsarimurqachu. 14Sichum Cristo mana kawsarimuptinqa yanqapaqchiki kay willakusqaykupas kanman, manataqchiki iñisqaykichikpas valenmanchu.
15Chayna kaptinqa ñoqaykupas Diospa llulla testigonkunachá kaymanku “Diosmi Cristota kawsarirachirqa nisqaykumanta”. Wañuqkuna mana kawsarimunan kaptinqa manataqchiki Diospas Cristota kawsarichimurqachu.
16Wañuqkuna mana kawsarimunan kaptinqa Cristopas manataqchiki kawsarimurqachu. 17Cristo mana kawsarimuptinqa yanqapaqchiki iñisqaykichikpas, chaynaqa hinallaraqmi huchapi kachkankichik. 18Chayna kaptinqa Cristopi iñispa wañukuqkunapas chinkasqachiki kachkanku.
19Sichum kay pachapi kawsanallapaq Cristopi confiakuspanchikqa, lliw runakunamantapas aswan llakipayaypaqmi kachkanchik.
20¡Manam chaynachu! Cristoqa kawsarimurqam, payqa wañuqkunamanta punta kawsarimuqmi. 21Imaynam kay pachaman wañuy huk runantakamalla yaykumurqa, chaynataqmi kawsarimuypas huk runantakamalla hamurqa.
22Imaynam Adanpa huchallikusqanwan llapallan runa wañun, chaynallataqmi Cristopi iñiqkunapas llapallan kawsarimunqa. 23Ichaqa sapakamam qatinasninpi kawsarimunqa: Cristom puntata kawsarimurqa, pay hamuptinñataqmi iñiqninkunapas kawsarimunqa. 24Chaymantañam tukupay tiempo chayamunqa, chay tiempopiqa Cristom llapallan atiyniyuqkunata, munayniyuqkunata hinaspa autoridadkunata chinkarachinqa, hinaspam munaychakuyninta Dios Taytanmanña qoykunqa.
25 #
Sal 110.1. Cristoqa munaychakunqa llapallan enemigonkunata Dios saruchinankamam. 26Qepallaña chinkachinapaq kaq enemigoqa wañuymi. 27#Sal 8.6.Diosmi tukuy imata Cristowan saruchirqa. Chuya Qellqapim kaynata nin:
Paytaqa tukuy imapa hawapim churaykurqa, nispa.
“Tukuy imata” nispaqa manam Diospipas munaychakunqam nichkanchu, aswanqa Diosmi Cristowan tukuy imata saruchin.
28Tukuy imapi Cristo munaychakuruspanñam paypas Taytanpa munaychakusqan kanqa, chaynataqa ruwanqa tukuy imata Taytan saruchisqanman hinam. Chaynapim tukuy imakunapipas Diosña munaychakunqa. 29Wakin iñiqkunam bautizakunku wañuqkunarayku. Wañuqkuna mana kawsarimunan kachkaptinqa, ¿imanasqataq chaytaqa ruwanku?
30Chaynaqa, ñoqaykupas ¿imapaqtaq peligrollapi tukuy tiempo kachkaniku? 31Arí wawqe-panikuna, sapa punchawmi wañuypa patanpi hinaña kachkani. Ichaqa Señor Jesucristopi kasqaykichikwanmi kusisqa kachkani.
32 #
Is 22.13. Ñoqam purun animalkunawan Éfeso llaqtapi pelearqani, chaywanqa ¿imatataq hurqokuni? Wañuqkuna mana kawsarimunan kaptinqa allintam ninku:
Mikukusun, upyakusun, paqarinqa wañukusunmi, nispanku.
33Amayá engañachikuychikchu, mana allin rimaykunaqa allin kawsakuytam pierdechin. 34Allinta rikchapakuspayá ama huchallikuychikchu, wakiqnikichikqa manaraqmi Diosta reqsinkichikchu, penqakunaykichikpaqmi kaytaqa nikichik.
Wañuqkunapa imaynam kawsarimunanmanta
35Icha pipas tapukunman:
¿Imaynatataq wañuqkunaqa kawsarimunqa? ¿Imayna cuerpoyuqtaq kawsarimunqa? nispanku.
36¡Mana yuyayniyuqpa tapukuyninmi chayqa! Muhu tarpusqaykiqa wañunqaraqmi musoq planta wiñamunanpaqqa. 37Tarpunchikqa manam plantatañachu aswanqa muhullatam, trigo kaptinpas otaq sapaq muhu kaptinpas.
38Chaymantaqa Diosñam sapakamata wiñachin imayna sayayniyuqtapas munasqanman hina. 39Manam llapan aychaqa chay hinallachu, runakunapa aychanqa huk rikchaqmi, huk rikchaqtaqmi animalkunapa aychanpas, alton pawaq animalkunapa aychanpas chaynataq challwakunapa aychanpas.
40Kachkantaqmi hanaq pachamanta cuerpopas chaynataq kay pachamanta cuerpopas, ichaqa hanaq pachapi kaq cuerpokunapa sumaq kayninqa huk rikchaqmi, kay pachapi cuerpokunapa sumaq kayninpas huk rikchaqtaqmi. 41Intipa achkiyninqa huk rikchaqmi killapa achkiyninmantaqa, huk rikchaqtaqmi sapakama chaskakunapa achkiyninpas.
42Chaynataqmi, wañuqkunapas kawsarimuspankuqa huk rikchayniyuq kanqaku. Wañuqta pampaptinchikqa ismurunmi, kawsarimuspanmi ichaqa manaña wañunqachu.
43Wañuqpa ayantaqa pampanchik asnarichkaqtam, kawsarimunqam ichaqa kancharichkaqña. Pampanchikqa manaña kallpayuqtam, kawsarimunqam ichaqa kallpasapallaña. 44Pampanchikqa aycha cuerpollatam, kawsarimunqam ichaqa espirituman hina cuerpoyuqña, kanmi kay pachamanta kaq cuerpo, kantaqmi hanaq pachamanta cuerpopas.
45 #
Gn 2.7. Chuya Qellqapim kaynata nin:
Punta kaq Adanmi kawsaq runa karqa, qepa kaq Adanñataqmi kawsay qokuq Espíritu, nispa.
46Manam espiritumanta kaqchu punta cuerpoqa aswanqa aychamanta kaqmi, chaymantañam Espiritumanta cuerpoqa. 47Punta kaq runaqa kay pachamantam karqa allpamanta ruwasqa, qepa kaq runam ichaqa hanaq pachamanta hamurqa, payqa Señormi.
48Kay pachapaqmi runaqa ruwasqa karqa, kay pachapaqtaqmi runakunapas kanchik. Hanaq pachamantam Cristoqa karqa, hanaq pachapaqtaqmi iñiqkunapas kanchik. 49Imaynam allpamanta ruwasqa runaman rikchakunchik, chaynataqmi hanaq pachapi kaqmanpas rikchakusunchik.
50Nikichikmi wawqe-panikuna, aychayuq yawarniyuq runaqa manam Diospa munaychakusqanmanqa yaykunqachu, tukuruqlla kaqpas manataqmi chaskinmanchu mana tukuq kaqtaqa.
51Kunanmi manaraq pipapas yachasqanta nisqaykichik: Manam lliwchu wañusunchik, ichaqa lliwmi tikrasqa kasunchik. 52#1 Ts 4.15-17.Huk ñawi qemchiyllatam trompetapa tukupay tocayninpi tikrasqa kasunchik, trompetata tocaykamuptinmi wañuqkuna kawsarimunqa manaña wañunankupaq, ñoqanchikpas tikrasqam kasunchik.
53Kay tukuruqlla cuerponchikmi musoq pachawan pachakuchkaq hina mana tukuqman tikrakunqa, wañuqlla cuerponchikñataqmi wiñaypaq kaqman tikrakunqa. 54#Is 25.8.Kay tukuruqlla cuerponchikmi mana tukuqmanña pachakunqa, kay wañuqlla cuerponchik manaña wañuqwan pachakuruptinñataqmi Qellqapa kayna nisqan cumplikunqa:
“Wañuyqa vencesqañam kachkan,
55 #
Os 13.14. Yaw, wañuy ¿maytaq wañuchikuq kayniki?
¿Maytaq wañuchina puyaykiqa?”
56Wañuypa puyanmi hucha, leyñataqmi huchapa atiynin. 57Ichaqa Diosman gracias kachun Señor Jesucristowan vencesqanchikmanta.
58Chaynaqa, kuyasqay wawqe-panillaykuna, qaqa hina sayaspayá Señorpa llamkayninpi aswan llamkaychik. Qamkunaqa yachankichikmi Señorpaq llamkasqaykichikqa manam yanqapaqchu kanqa.
Currently Selected:
1 Corintios 15: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
