1 Corintios 14
14
Mana yachasqanchik rimaykunamanta
1Kuyakuyniyuq kayta maskaychik, Chuya Espiritupa atiyninkunata maskaychik, chaykunamanta aswan mastaqa profetizayta munaychik. 2Pipas mana yachasqa rimaykunapi rimaqqa manam runakunamanchu riman, aswanqa Diosllamanmi, ichaqa manam pipas entiendenchu, pakasqa kaqkunata Espiritupi rimachkaptinpas. 3Profetizaqñataqmi runakunaman rimapayan iñiyninpi wiñananpaq, kallpanchakunanpaq hinaspa consuelasqa kananpaq. 4Mana yachasqa rimaykunapi rimaqqa kikillanmi espiritunpi wiñan, profetizaqñataqmi iñiqkunata wiñachin.
5Ñoqaqa munaymanmi mana yachasqaykichik rimaykunata llapallaykichik rimanaykichikta, ichaqa mastaqa munani profetizanaykichiktam, profetizaymi aswan allinqa mana yachasqanchik rimaykunapi rimaymantaqa. Mana yachasqanchik rimaykunata rimaspaqa imam nisqantam interpretana chaynapi iglesia wiñananpaq. 6Wawqe-panikuna, qamkunaman watukamuspay mana yachasqaykichik rimaykunapi rimapayaykichikman, ichaqa mana Diospa qawachiwasqantapas willaykichikmanchu, manataq imatapas reqsichikichikmanchu, nitaq qamkunaman profetizaymanchu hinaspa manataq imatapas yachachikichikmanchu chayqa, ¿ima allintaq qamkunapaq kanman?
7Sichum tocanakunamanta qenapa, arpapa waqayninku huk tonolla kaptinqa, ¿imaynatataq yachachwan arpa kasqanta otaq qena kasqantapas? 8Guerrapaq hina trompetata mana tocamuptinqa manam pipas alistakunmanchu guerraman rinanpaq. 9Chaynam kanman qamkunapipas, mana yachasqaykichik rimaykunapi rimaptikichikqa ¿imaynatataq yachanmanku ima nisqaykichiktapas? ¡Yanqachiki rimawaqchik! 10Kay pachapiqa achka rimaykunam kachkan ichaqa llapallanmi entiendenapaq. 11Pipas huk rimaypi rimapayawasqanta mana entiendespayqa chay runapaqmi huklaw nacionniyuq hina kani, ñoqapaqpas chay runaqa huklaw nacionniyuq hinam. 12Chaynaqa, qamkunapas Diospa atiyninta aswan más chaskiyta munaspaqa, llapanmanta llalliqtaqa iñiqkuna wiñachiytayá maskaychik.
13Chaynaqa, pipas mana yachasqan rimayta rimaspanqa Diostayá mañakuchun chay rimasqanta uyariqninkunaman interpretananpaq. 14Sichum mana yachasqay rimaypi Diosta mañakuptiyqa espiritullaymi mañakun, ichaqa manam imam nisqaytapas yachanichu. 15Hinaptinqa ¿imatataq ruwayman? Diostaqa mañakusaqmi espirituywanpas chaynataq yuyayniywanpas. Takisaqtaqmi espirituywanpas chaynataq yuyayniywanpas. 16Sichum espirituman hina mana yachasqayki rimaypi Diosta yupaychaptikiqa mana entiendeq runaqa manam atinmanchu qanwan kuska gracias qoyta, imam nisqaykita mana entiendesqanrayku. 17Cheqaptam qamqa allinta Diosman graciasta qonki, huknikim ichaqa mana wiñanchu. 18Diosmanmi graciasta qoni qamkunamantapas aswan masta huk rimaykuna rimasqaymanta, 19iglesiapa huñunakuyninpim ichaqa munani pichqa palabrallatapas entiendenankupaq hina rimayta, chaynapi wakinkunamanpas yachachinankupaq, mana yachasqanku rimaypi chunka waranqa palabrakuna rimanaymantaqa.
20Wawqekuna, amayá wawakuna hinaqa piensaychikchu, wawakuna hinaqa kaychik mana allinkunapaqyá, aswanqa yuyayniyuq runakuna hinañayá piensaychik. 21#Is 28.11-12.Kamachikuy Qellqapim kaynata nin:
Mana reqsisqa rimaykunapim
kay runakunaman rimapayasaq,
chaywanpas manam kasuwanqakuchu, ninmi Señor, nispa.
22Chaynaqa, mana yachasqanchik rimaykunapi rimayqa huk señal hinam mana iñiqkunapaq, manam iñiqkunapaqchu, profetizaymi ichaqa llapa iñiqkunapaq huk señal hina. 23Iglesia huñunasqa kachkaptin mana yachasqanku rimaykunapi rimaptinkuqa ¿manachu manaraq yachaqqa otaq manaraq iñikusqa runa yaykuramuspan: “Kaykunaqa locoyarusqakum”, ninqa? 24Sichum llapallanku profetizachkaptinku manaraq iñikusqa runa otaq manaraq yachaq runa yaykuramuptinqa, llapallankum chay runapa huchanta qawachispa convencechinqaku. 25Chaynapim sonqonpi pakasqakunapas yachasqa kanqa, hinaptinmi qonqorakuykuspan Diosta yupaychanqa:
Cheqaptapunim Diosqa qamkunawan kasqa, nispan.
Huñunakuypi imaynam ruwanamanta
26Chaynaqa, wawqe-panillaykuna, huñunakuptikichikqa wakinmi takinmanku, wakinñataq yachachinmanku, wakinñataq Diospa revelasqanta willakunmanku, wakinñataq mana yachasqa rimayta rimanmanku, wakinñataq chay rimasqanta interpretanmanku. Tukuy kaykunatayá ruwaychik llapa iñiqkuna wiñananpaq. 27Mana yachasqan rimaypi hukkaqnin rimaptinqa iskay-kimsallayá huk-hukmanta muyuyninpi rimachunku hukñataqyá imam nisqanta interpretachun. 28Iglesiapa huñunakuyninpi mana interpretaq kaptinqa amayá pipas mana yachasqan rimaypiqa rimachunchu, rimaspaqa-rimachunku kikinkupaqyá hinaspa Diosllapaqyá. 29Chaynataqyá profetakunapas iskay otaq kimsalla rimachunku wakinkunañataq allinta uyarispanku imam ninanta juzgachunku. 30Sichum chaypi tiyaqkunamanta hukkaqnin revelacionta Diosmanta chaskiruptinqa punta rimaqqa upallachunñayá. 31Chaynapim llapallaykichik profetizaspaqa sapakama rimankichik uyariqkuna yachanankupaq hinaspa kallpanchakunankupaq. 32Profetakunapa atiy chaskisqanqa profetakunamanmi sujetakunan. 33Diosqa manam pantachikuq Dioschu, aswanqa hawkayay qokuqmi.
Imaynam iglesiakunapa ruwasqankuman hina. 34Warmikunaqa manam rimanankuchu huñunakuypiqa upallallam kananku, Diospa leyninpi kamachikusqanman hinam kasukunanku. 35Imatapas yachayta munaspaqa wasipiñayá qosanta tapuchun, iglesiapiqa warmipa rimayninqa penqakuypaqmi.
36Yachanaykichikmi, Diospa palabranqa manam qamkunawanchu qallarirqa, manataqmi qamkunallataqchu chaskirqankichikpas. 37Pipas profetapaq otaq Chuya Espiritupa yachachisqanpaq hapikuspanqa yachachunyá qamkunaman kay qellqamusqayqa Señorpa kamachikuynin kasqanta. 38Kay kamachikuyta mana chaskiqqa, manam Diospa chaskisqanchu kanqa.
39Wawqe-panikuna, profetizaytayá aswanqa munaychik, amataqyá mana yachasqa rimaykunapi rimanankutaqa harkakuychikchu. 40Ichaqa imatapas ruwaspaqa respetowan hinaspa ordenninpiyá ruwaychik.
Currently Selected:
1 Corintios 14: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
