Room 14

Ɩtaahʋʋnɩ mɩ-taabalaa tɔɔnaɣ yɔɔ

1Ɩmʋ weyi ɛwɛnɩ ɛjandʋ e-lidaʋ wɛnaʋ taa yɔ ɛ-tɔm, ɩtaakpɛzɩnɩ-ɩ. 2Nabʋyʋ taa, nɔɔyʋ maɣzɩɣ se pɩha-ɩ waɖɛ se ɛpɩzɩɣ ɛtɔɔ paa tɔɔnaɣ ŋgá. Ɛlɛ́, lɛlʋ weyi ɛkɛ ɛjam e-lidaʋ wɛnaʋ taa yɔ, ɛ́lɛ́ ñɔtɔkɩ ɖozi hatʋ ɖeke. 3Pɩfɛyɩ se weyi ɛtɔkɩ paa tɔɔnaɣ ŋgá yɔ, eniɣzi weyi ɛ́lɛ́ ɛɛtɔkɩ lɛɛsɩ yɔ. Weyi ɛɛtɔkɩ tɔɔnasɩ lɛɛsɩ yɔ, pɩfɛyɩ se ɛkpɛzɩnɩ weyi ɛ́lɛ́ tɔkɩ sɩtɩŋa yɔ. Mbʋ́ pʋyɔɔ yɔ, Ɛsɔ ñamʋ-ɩ nesi naalɛ. 4Ña anɩ nɛ ŋkpɛzɩɣnɩ lɛlʋ tʋmlaɖʋ? Yee ɛlakɩ ɖeu ɛ-tʋmɩyɛ taa yaa ɛɛlakɩ lɛ, pɩna-ŋ nɛ we? Ɛ-caa cɔlɔ lɛ. Ɛkɔŋ labʋ ɖeu, mbʋ́ pʋyɔɔ yɔ, Kɩpaɣlʋ wɛnɩ ɖoŋ se ɛsɩnɩ-ɩ nɛ ɛla mbʋ́ pʋwɛ ɖeu yɔ. 5Nabɛyɛ maɣzɩɣ se kɩyakɩŋ nɩɩyɩ kɩlɩ lɛɛŋ. Ŋgʋ́, lɛlaa ñamaɣzɩɣ se ɛwɛ kɩmaŋ. Pʋwɛɛ se paa weyi ɛtɩlɩ mbʋ́ ɛmaɣzɩɣ yɔ camɩyɛ, pʋtʋʋ ɛtaawɛɛ pɩ-taa. 6Weyi ɛmaɣzɩɣ se kɩyakʋ nakʋyʋ kɩlɩ lɛɛŋ yɔ, ɛlakɩ ḿbʋ́ se ɛɖʋ Kɩpaɣlʋ hɩɖɛ. Weyi ɛ́lɛ́ tɔkɩ paa tɔɔnaɣ ŋgá yɔ, ɛcaɣ ɖɔɖɔ se ɛɖʋ Kɩpaɣlʋ hɩɖɛ. Mbʋ́ pʋyɔɔ yɔ, ɛsaŋ Ɛsɔ tɔɔnaɣ ŋgá ɛtɔwaa yɔ kɔ-yɔɔ. Weyi ɛɛtɔkɩ tɔɔnasɩ nasɩyɩ yɔ, ɛlakɩ ḿbʋ́ se ɛɖʋ Kɩpaɣlʋ hɩɖɛ ɖɔɖɔ. Ɛsaŋ ɖɔɖɔ Ɛsɔ tɔɔnaɣ ŋgá ɛtɔwaa yɔ kɔ-yɔɔ. 7Toovenim lɛ, ɖa-taa nɔɔyʋ fɛyɩ se ɛwɛ wezuu ɛ-maɣmaɣ ɛ-yɔɔ. Nɔɔyʋ ɛɛsɩkɩ ɛ-maɣmaɣ ɛ-yɔɔ ɖɔɖɔ. 8Mbʋ́ pʋyɔɔ yɔ, yee ɖɩwɛ wezuu yɔ, ɖɩwɛɛ se ɖɩɖʋ Kɩpaɣlʋ hɩɖɛ. Yee ɖɩsɩkɩ yɔ, ɖɩsɩkɩ se ɖɩɖʋ-ɩ hɩɖɛ ɖɔɖɔ. Pʋ-yɔɔ lɛ, paa ɖɩwɛ wezuu yaa ɖɩsɩba yɔ, ɖɩkɛ Kɩpaɣlʋ ñɩma. 9Mbʋ́ pʋyɔɔ yɔ, Krɩstʋ sɩba nɛ efe se ɛkɛ sɩɖaa nɛ ɛsɛ ñɩma pa-Kɩpaɣlʋ. 10Ɛlɛ́, pɩlabɩ ɛzɩma nɛ ña ñɛkpɛzɩɣnɩ ña-taabalʋ? Ña yɔ, pɩlabɩ ɛzɩma nɛ ñɛpɛŋɩɣ ña-taabalʋ tɛtɛ? Đatɩŋa payɩ ɖɩkaɣ wobu Ɛsɔ ɛsɩndaa nɛ ɛhʋʋnɩ-ɖʋ tɔm. 11Mbʋ́ pʋyɔɔ yɔ, pama Ɛsɔtɔm Takayaɣ taa se:

«Ma Kɩpaɣlʋ lɛ, mankaɖɩɣ kpayɩ se:

ɛyáa tɩŋa payɩ

kaɣ luŋuu mɛn-tɛɛ nɛ

paa weyi ɛyɔɔdɩ nɛ pʋkʋyɩ ɛsɔdaa se ma lɛ Ɛsɔ.»

12Pʋ-yɔɔ lɛ, paa ɖa-taa weyi lɛ, ɛkɔŋ heyuu Ɛsɔ mbʋ́ ɛlaba yɔ nɛ ɛ-maɣmaɣ ɛ-nɔɔ.

Ɖɩñɩnɩ mbʋ́ pʋkɔŋnɩ laŋhɛzɩyɛ yɔ

13Điyele ɖama tɔm hʋnaʋ. Ɛlɛ́, ɩɖʋ kpem se: ɩɩlakɩ nabʋyʋ nɛ piyele putuuli mɩ-taabalʋ yaa pɩpɛɖɩ-ɩ kɩwɛɛkɩm taa. 14Ma nɛ Kɩpaɣlʋ Yesu ɖɛ-kpɛndʋʋ taa lɛ, manawa nɛ mantɩlɩ se nabʋyʋ fɛyɩ se pɩfɛyɩ cɩɖɩcɩɖɩ. Ɛlɛ́, yee nɔɔyʋ ɛmaɣzɩɣ se nabʋyʋ fɛyɩ cɩɖɩcɩɖɩ yɔ, pɩtɛ ɛyʋ pɩfɛyɩ cɩɖɩcɩɖɩ. 15Yee ŋpɩsɩ ña-taabalʋ hɔyɛ nɛ tɔɔnaɣ ŋgá ŋtɔkɩ yɔ yɔ, pɩwɩlɩɣ se ŋtɔɖɔ sɔɔlɩm nʋmɔʋ taa. Taatɩŋnɩ tɔɔnaɣ ŋgá ŋtɔkɩ yɔ kɔ-yɔɔ nɛ ŋɖʋzɩ weyi Krɩstʋ sɩbɩ ɛ-yɔɔ yɔ. 16Pɩfɛyɩ se mbʋ́ ŋmaɣzɩɣ se pʋmʋnaa se ŋtɔɔ yɔ, pɩha nɔɔyʋ waɖɛ nɛ ɛyɔɔdɩ tɔm ɛzaɣ́tʋ pʋ-yɔɔ. 17Mbʋ́ pʋyɔɔ yɔ, Ɛsɔ Kewiyaɣ tɔm tɛkɛ tɔɔnaɣ nɛ sʋlʋm pa-ñɩndʋ. Ɛlɛ́, pɩkɛ mbʋ́ Fezuu Kiɖeɖeu haɣ yɔ. Ḿbʋ́ yɔ: tʋʋzʋʋ nɛ laŋhɛzɩyɛ nɛ laŋhʋlʋmɩyɛ. 18Weyi ɛlakɩ Krɩstʋ tʋmɩyɛ ḿbʋ́ yɔ, ɛ-tɔm kɛdɩnɩ Ɛsɔ. Ɛyáa tɔŋ ɖɔɖɔ se ɛlakɩ ɖeu.

19Pʋ-yɔɔ lɛ, ɖɩñɩnɩ mbʋ́ pɩhɛzɩɣ ɖa-laŋa nɛ ɛzɩma mbʋ́ ɖɩsɩnɩ ɖama nɛ ɖɩtɛzɩ pɩʋ Ɛsɔ nʋmɔʋ taa yɔ. 20Taawɛɛkɩ Ɛsɔ tʋmɩyɛ tɔɔnaɣ ŋgá ŋtɔkɩ yɔ kɔ-yɔɔ. Toovenim lɛ, tɔɔnasɩ tɩŋa mʋnaa se pɔtɔɔ-sɩ. Ɛlɛ́, yee ŋnawa se pɩpɩzɩɣ pɩtɩŋnɩ nakɛyɛ yɔɔ nɛ ña-taabalʋ tɔlɩ yɔ, pɩfɛyɩ ɖeu se ŋtɔɔ-kɛ. 21Mbʋ́ pʋwɛ ɖeu yɔ lɛ se: taakpazɩnɩ ñɔ-nɔɔ mbʋ́ pɩpɩzɩɣ pɩpɛɖɩ ña-taabalʋ kɩwɛɛkɩm taa yɔ kaʋ. Paa nandʋ yaa sʋlʋm yaa paa ɛbɛ. 22Mbʋ́ ña-maɣmaɣ ŋmaɣzɩɣ se pʋwɛ ɖeu se ŋpɩzɩɣ ŋlabɩ-pʋ yɔ, pʋwɛɛ ña-taa Ɛsɔ ɛsɩndaa. Weyi ɛkʋyʋʋ se ɛlakɩ pʋyʋ nɛ pɩɩcɛyɩɣ-ɩ yɔ, ɛwɛ laŋhʋlʋmɩyɛ taa. 23Ɛlɛ́, weyi ɛpʋtʋʋ tɔɔnaɣ nakɛyɛ yɔɔ yɔ, yee ɛtɔɔ-kɛ yɔ, ɛ-tɔm sɩkɩ Ɛsɔ ɛsɩndaa. Mbʋ́ pʋyɔɔ yɔ, ɛfɛyɩnɩ lidaʋ se mbʋ́ ɛlakɩ yɔ pʋwɛ ɖeu. Mbʋ́ pɩtɩŋa payɩ ɛyʋ lakɩ nɛ ɛpʋtʋʋ pʋ-yɔɔ yɔ, pɩkɛ kɩwɛɛkɩm.

Currently Selected:

Room 14: KABI

Highlight

Compare

Copy