Room 15
15
Ɖɩla ɛzɩ Krɩstʋ yɔ
1Mbá ɖa ɖɩwɛ ɖoŋ ɖe-lidaʋ wɛnaʋ taa yɔ, pʋwɛɛ se ɖɩkʋ ɖɔ-hɔ mbá pɛkɛ ajamaa pe-lidaʋ wɛnaʋ taa yɔ pɔ-tɔm taa, ɖɩtaanɩɩnɩ ɖe-liu ñɩm. 2Paa ɖa-taa weyi, ɛcɛyɩ ɛ-tɩ nɛ ɛla mbʋ́ pɩkɛdɩnɩ ɛ-taabalʋ yɔ, mbʋ́ pʋwɛ ɖeu yɔ pɩ-taa nɛ ɛ-taabalʋ ɛnʋ, ɛpɩɩ Ɛsɔ nʋmɔʋ taa. 3Mbʋ́ pʋyɔɔ yɔ, Krɩstʋ tanɩɩnɩ mbʋ́ pɩkɛdɩnɩ ɛ-maɣmaɣ yɔ. Ɛlɛ́, pɩtalɩ-ɩ e-wezuu caɣʋ taa ɛzɩ pamaʋ Ɛsɔtɔm Takayaɣ taa se: «Tʋtʋ ndʋ́ patʋ ña Ɛsɔ yɔ, tɩpɩsɩ mɔ-yɔɔ» yɔ. 4Tɔm ndʋ́ tɩtɩŋa payɩ pama Ɛsɔtɔm Takayaɣ taa ɖooo lɔŋ yɔ, pama-tʋ se tikuli ɖɛ-ɛsɛ nɛ ɖɩɖɔkɩ ɖɔ-hɔ nɛ tiyele pɩlabɩ-ɖʋ hʋnʋm nɛ ɖɩɖaŋ mbʋ́ Ɛsɔ ɖʋwa se ɛlakɩ yɔ. 5Ɛsɔ weyi eyeki se ɛyáa ɛ́ɖɔ́kɩ pɔ-hɔ nɛ pɩlabɩ-wɛ hʋnʋm yɔ, eyele nɛ ɩla nɔɔ kʋɖʋmaɣ nɛ ɩla ɛzɩ Krɩstʋ Yesu kalakʋʋ yɔ 6nɛ ɩkpɛndɩ mɩtɩŋa payɩ nɛ ɩsa Ɛsɔ weyi ɛkɛ ɖa-Kɩpaɣlʋ Yesu Krɩstʋ Caa yɔ. 7Ɩmʋ ɖama camɩyɛ ɛzɩ Krɩstʋ mʋ́ʋ-mɩ nɛ Ɛsɔ hɩɖɛ sɛɛ yɔ. 8Mbʋ́ pʋyɔɔ yɔ, mankaɖɩɣ-mɩ se Krɩstʋ pɩsɩ Yuda ñɩma tʋmlaɖʋ se ɛla mbʋ́ Ɛsɔ kaɖʋwa se ɛlakɩ pɔ-cɔzɔnaa yɔ nɛ pɩwɩlɩ se ɛlakɩ mbʋ́ ɛɖʋwa yɔ. 9Ɛkɔm ɖɔɖɔ se mbá pɛtɛkɛ Yuda ñɩma yɔ, pasa Ɛsɔ ɛ-pʋtɔdɩyɛ naʋ yɔɔ ɛzɩ pamaʋ Ɛsɔtɔm Takayaɣ taa yɔ. Pamawa se:
«Pʋ-yɔɔ lɛ, mankaɣ-ŋ sam
ɛyáa tɩŋa hɛkʋ taa nɛ
mentee hendu nɛ manɖʋ-ŋ hɩɖɛ.»
10Pama Ɛsɔtɔm Takayaɣ taa ɖɔɖɔ se:
«Mbá mɩ ɩtɛkɛ Yuda ñɩma yɔ,
ɩkpɛndɩ Ɛsɔ ñɩma yɔɔ nɛ mɩ nɛ wɛ ɩmayɩ amaya.»
11Patasɩ maʋ ɖɔɖɔ se: «Kedeŋa yɔɔ ɛyáa tɩŋa,
mɩtɩŋa payɩ ɩkpazɩ Kɩpaɣlʋ hɩɖɛ ɛsɔdaa.
Ɛyáa kpeekpe,
ɩsam-ɩ!»
12Ezaayii ma ɛ-takayaɣ taa ɖɔɖɔ se:
«Yesee liɖe taa tʋ nɔɔyʋ kaɣ kɔm.
Ɛkaɣ kʋyʋʋ nɛ ɛcɔnɩ mbá pɛtɛkɛ Yuda ñɩma yɔ pɔ-yɔɔ nɛ
pataa-ɩ liu.»
13Ɛsɔ weyi eyeki se ɖɩtaa-ɩ yɔ, ɛtɩŋnɩ lidaʋ ŋgʋ́ ɩwɛnɩ ɛ-yɔɔ yɔ kʋ-yɔɔ nɛ eyele mɩ-laŋa hʋlʋmɩ siŋŋ nɛ ɛhɛzɩ-yɛ camɩyɛ. Peeɖe pɩtɩŋɩɣnɩ e-Fezuu Kiɖeɖeu ɖoŋ yɔɔ nɛ ɩtɛzɩ-ɩ taʋ kpem.
Pɔɔlɩ kɛ Krɩstʋ tʋmlaɖʋ
14Man-taabalaa mɩ, ma-maɣmaɣ mana siŋŋ se ɩlakɩ ɖeu pɩtɩŋa pɩ-taa nɛ ɩtɩlɩ mbʋ́ pʋpɔzʋʋ Ɛsɔ nʋmɔʋ taa yɔ pɩtɩŋa payɩ. Ɩpɩzɩɣ ɩtasɩ ɖama lɛɣtʋ. 15Paa ḿbʋ́ yɔ, mama-mɩ-tʋ kpayɩ ɖoli ɖoli se mɔntɔzɩ-mɩ mbʋ́ ɩɩtɛm kpɛlɩkʋʋ nɛ pɩɖɛɛ yɔ. Lootiye nɖɩ́ Ɛsɔ labɩ-m yɔ, ńɖɩ́ hanɩ-m waɖɛ se mama-mɩ ḿbʋ́. 16Ɛlabɩ-m-ɖɩ se mɛnkɛ Krɩstʋ Yesu tʋmlaɖʋ nɛ mansɩnɩ mbá pɛtɛkɛ Yuda ñɩma yɔ alɩwaatʋ ndʋ́ monsusuu-wɛ Laŋhɛzɩyɛ Tɔm ndʋ́ tɩlɩnɩ Ɛsɔ ɛnʋ ɛ-cɔlɔ yɔ. Mɛwɛ ɛzɩ cɔjɔ nɛ ḿbá ñɛwɛɛ ɛzɩ kɩlaʋ kpɩnɛ nɖɩ́ ɖɩkɛdɩnɩ Ɛsɔ nɛ e-Fezuu Kiɖeɖeu kɛzɩ-ɖɩ nɛ hɔɔlʋʋ nɛ ɖɩkɛ ɛ-ñɩnɖɛ yɔ. 17Pʋ-yɔɔ lɛ, ma nɛ Krɩstʋ Yesu ɖɛ-kpɛndʋʋ taa lɛ, manpɩzɩɣ mankʋndɩnɩ Ɛsɔ tʋmɩyɛ nɖɩ́ malakɩ yɔ. 18Mbʋ́ pʋyɔɔ yɔ, maacazɩɣ nabʋyʋ tɔm yɔɔdʋʋ nɛ pɩtasɩnɩ mbʋ́ Krɩstʋ tɩŋnɩ mɔ-yɔɔ nɛ ɛla se mbá pɛtɛkɛ Yuda ñɩma yɔ, papɩzɩ paña Ɛsɔ yɔ pʋ-tɔm. Tɔm ndʋ́ monsusaɣ yɔ nɛ mbʋ́ malakaɣ yɔ, pʋ-yɔɔ ɛtɩŋnaa. 19Ɛlabɩ ɖɔɖɔ hama lakasɩ ndɩ ndɩ nɛ ɛwɩlɩ Fezuu Kiɖeɖeu ɖoŋ. Ḿbʋ́ monsusi Krɩstʋ Laŋhɛzɩyɛ Tɔm siŋŋ, kpaɣ Yeruusalɛm nɛ puwolo pɩsɩɩnɩ Iliirii. 20Manɖʋwa siŋŋ se monsusuu Laŋhɛzɩyɛ Tɔm ɖenɖe pɔtɔyɔɔdɩdɩ Krɩstʋ tɔm yɔ nɛ mantaakɔɔ mantɩnɩ nɔɔyʋ tigiɖe yɔɔ. 21Ɛlɛ́, malakɩ ɛzɩ pamaʋ Ɛsɔtɔm Takayaɣ taa yɔ. Pamawa se:
«Mbá pataaheyi-wɛ ɛ-tɔm yɔ,
pɔkɔŋ-ɩ naʋ, nɛ
mbá pataayɔɔdɩ ɛ-tɔm nɛ panɩɩ yɔ,
pɔkɔŋ-tʋ nɩʋ nɛ panɩɩ tɩ-taa.»
Nɩmaŋ weyi Pɔɔlɩ ɖɔm-ɩ yɔ
22Tɔm ńdʋ́ ti-susuu wɛna pɩlaɣzɩɣ-m nɛ mɔntɔkɔmda mɩ-tɛ. 23Ɛlɛ́, lɛɛlɛɛyɔ mɛntɛm man-tʋmɩyɛ hɔɔlɩŋ ɩnɛ ɩ-taa. Pɩlabɩ pɩnzɩ sakɩyɛ yɔ, manɖʋʋ se mɔnkɔŋ mana-mɩ yɔ. 24Mancaɣ se maaɖɛɣ Ɛspaañɩ lɛ, mantɩŋ mɩ-tɛ nɛ mana-mɩ alɩwaatʋ pazɩ nɛ me-liu sɩ. Pʋwayɩ lɛ, ɩsɩnɩ-m nɛ mɔnɖɔ ma-nʋmɔʋ. 25Ɛlɛ́, mowoki Yeruusalɛm alɩwaatʋ tʋnɛ tɩ-taa nɛ mansɩnɩ Ɛsɔ ñɩma mbá pɛwɛ peeɖe yɔ nɛ pʋcɔ. 26Mbʋ́ pʋyɔɔ yɔ, Yesu aŋgba wena awɛ Masedonii nɛ Akayɩ yɔ, a-taa ñɩma ɖʋwa se pɔcɔʋ nabʋyʋ nɛ pasɩnɩ kʋñɔndɩnaa mbá pɛwɛ Yeruusalɛm Ɛsɔ ñɩma taa yɔ. 27Pa-maɣmaɣ paɖʋna se palakɩ ḿbʋ́. Toovenim lɛ, pɩɩwɛɛ se pala ḿbʋ́. Mbʋ́ pʋyɔɔ yɔ, Yeruusalɛm Yesu ŋgbɛyɛ taa ñɩma mbá pɛkɛ Yuda ñɩma yɔ, pawɩlɩ mbá pɛtɛkɛ Yuda ñɩma yɔ mbʋ́ pasɩm Ɛsɔ nʋmɔʋ taa yɔ. Pʋ-yɔɔ lɛ, pʋwɛɛ ɖɔɖɔ se mbá pɛtɛkɛ Yuda ñɩma yɔ, paba ɛsɩnɩ-wɛ nɛ pa-maɣmaɣ pa-ñɩm. 28Pɩtɛŋ nɛ mankpaɣ mbʋ́ pɩtɩŋa payɩ pɛcɛlɩ-m yɔ nɛ mowona manɖʋzɩ pe-nesi taa nɛ mankʋyɩ se mɛnɖɛɣ Ɛspaañɩ lɛ, mantɩŋnɩ mɩ-tɛ. 29Manawa se mɔnkɔŋʋʋ mɩ-tɛ yɔ, Krɩstʋ tɩŋɩɣnɩ mɔ-yɔɔ nɛ ɛwazɩ mɩ-yɔɔ siŋŋ.
30Ɛlɛ́, man-taabalaa, ndʋ́ meheyiɣ-mɩ yɔ lɛ se ɖa-Kɩpaɣlʋ Yesu Krɩstʋ nɛ ɛzɩma mbʋ́ Fezuu Kiɖeɖeu yeba nɛ ɖɩsɔɔlɩ ɖama yɔ pɔ-yɔɔ lɛ, monkuluu-mɩ hulaɣ se ɩsɩnɩ-m nɛ ɖitendi Ɛsɔ mɔ-yɔɔ nɛ ɖa-laŋa tɩŋa. 31Itendi-i se mantaasʋʋ Yudee ñɩma mbá paañaŋ Krɩstʋ yɔ pe-nesi taa. Itendi-i ɖɔɖɔ se Ɛsɔ ñɩma mbá pɛwɛ Yeruusalɛm yɔ, pamʋ haɖɛ nɖɩ́ mowokini-wɛ yɔ nesi naalɛ. 32Ɛsɔ etisaa yɔ, ḿbʋ́ mɔnkɔŋ mɩ-tɛ nɛ laŋhʋlʋmɩyɛ siŋŋ nɛ ma nɛ mɩ ɖɩcaɣ nɛ mɔ-yɔɔ hɛɛ. 33Ɛsɔ weyi ɛhɛzɩɣ ɛyáa laŋa yɔ, ɛwɛɛ mɩtɩŋa payɩ mɩ-cɔlɔ. Pɩla ḿbʋ́!
Currently Selected:
Room 15: KABI
Highlight
Share
Compare
Copy
Want to have your highlights saved across all your devices? Sign up or sign in
