Room 12
12
Krɩstʋ ñɩma wezuu kɩfalʋ caɣʋ tɔm
1Man-taabalaa, Ɛsɔ na ɖa-pʋtɔdɩyɛ naʋ mbʋ́ yɔ pʋ-yɔɔ lɛ, meheyiɣ-mɩ se pɩlabɩ-mɩ hʋnʋm nɛ ɩkpaɣ mɩ-maɣmaɣ mɩ-tɩ pilim mi-wezuu caɣʋ taa nɛ ɩha-ɩ nɛ ɩwɛɛ ɛzɩ kpɩna wena palaɣ-ɩ yɔ#12.1 Ɩha-ɩ nɛ ɩwɛɛ ɛzɩ kpɩna wena palaɣ-ɩ yɔ: ye pɛɖɛzɩɣ-tʋ piye piye yɔ, pɛɖɛzɩɣ se: ɩwɛɛ ɛzɩ kɩlaʋ wezuu ñɩŋgʋ yɔ.. Ɩkɛ Ɛsɔ ñɩma kpaagbaa kpem nɛ mɩ-tɔm kɛdɩnɩ-ɩ. Ḿbʋ́ pʋwɛɛ kpem se iluŋ ɛ-tɛɛ. 2Ɩtaawɛɛ ɩlakɩ ɛzɩ mbá paañaŋ Krɩstʋ yɔ. Ɛlɛ́, ɩha Ɛsɔ waɖɛ nɛ ɛha-mɩ lɩmaɣza kɩfana kpem nɛ pɩlɛɣzɩ-mɩ. Peeɖe ɩpɩzɩɣ ɩtɩlɩ mbʋ́ Ɛsɔ liu wɛɛ yɔ: ḿbʋ́ lɛ mbʋ́ pʋwɛ ɖeu nɛ pɩkɛdɩnɩ-ɩ nɛ pʋmʋna yɔ.
3Lootiye nɖɩ́ Ɛsɔ labɩ-m yɔ ɖɩ-yɔɔ lɛ, pɩha-m waɖɛ se meheyi paa mɩ-taa weyi se ɛtaakpazɩ ɛ-tɩ ɖenɖe ɛtatalɩ yɔ. Ɛlɛ́, ɛwɛnɩ lɩmaɣza wena amaɣnaa yɔ. Paa weyi ɛsɩɩnɩ lidaʋ ŋgʋ́ Ɛsɔ ha-ɩ yɔ kɩ-kámaɣ́ yɔɔ. 4Ɛyʋ wɛnɩ tomnaɣ kʋɖʋmaɣ, ɛlɛ́, kɛwɛnɩ hɔɔlɩŋ ndɩ ndɩ. Paa ŋ́gʋ́ nɛ kʋ-tʋmɩyɛ. 5Ḿbʋ́ ɖɔɖɔ paa ɖɩɖɔwa yɔ, ɖɩwɛ ɛzɩ tomnaɣ kʋɖʋmaɣ ɖa nɛ Krɩstʋ ɖɛ-kpɛndʋʋ taa nɛ ɖatɩŋa payɩ ɖɩɖɔkɩ ɖama ɛzɩ ɛyʋ tomnaɣ hɔɔlɩŋ ɖɔkʋʋnɩ ɖama yɔ. 6Ɛlɛ́, Ɛsɔ ha paa weyi nɛ e-ɖeɖe ɛzɩ ɛlabʋ-ɖʋ lootiye yɔ. Yee ɛha ɖa-taa nɔɔyʋ se ɛkɛ ɛ-náyʋ yɔ, pʋwɛɛ se pʋdʋ esusi tɔm ndʋ́ tɩlɩnɩ Ɛsɔ ɛnʋ ɛ-cɔlɔ yɔ nɛ pɩtalɩ lidaʋ ŋgʋ́ ɛha-ɩ yɔ kɩ-kámaɣ́ yɔɔ. 7Yee Ɛsɔ ɛha nɔɔyʋ se ɛla tʋmɩyɛ Yesu ŋgbɛyɛ taa yɔ, pʋwɛɛ se ɛlabɩ-ɖɩ. Weyi ɛha-ɩ se ɛwɩlɩ yɔ, pʋwɛɛ se ɛwɩlɩ. 8Weyi ɛha ɛ́lɛ́ se ɛyɔɔdɩnɩ lɛlaa nɛ pɩlabɩ-wɛ hʋnʋm yɔ, pʋwɛɛ se ɛ́lɛ́ ɛla ḿbʋ́. Pʋwɛɛ se weyi ɛhaɣ ɛ-ñɩm yɔ, ɛha-pʋ nɛ ɛ-laŋɩyɛ tɩŋa. Weyi ɛcɔŋnɩ lɛlaa yɔɔ yɔ, ɛcɔnɩ pɔ-yɔɔ camɩyɛ. Weyi ɛsɩŋnɩ pɩlabɩmwaa yɔ, ɛ́lɛ́ ɛsɩnɩ-wɛ nɛ laŋhʋlʋmɩyɛ. 9Pʋwɛɛ se ɩsɔɔlɩ ɛyáa nɛ mɩ-laŋɩyɛ tɩŋa pilim. Ikizi mbʋ́ pɩfɛyɩ ɖeu yɔ kpem. Mɩ-ɛsɩyɛ ɛsɛɛnɩ mbʋ́ pʋwɛ ɖeu yɔ. 10Ɩsɔɔlɩ ɖama ɛzɩ pʋmʋnaʋ se Yesu ŋgbɛyɛ taa ñɩma ɛsɔɔlɩ ɖama yɔ. Pɩlabɩ-mɩ hʋnʋm nɛ ɩña ɖama. 11Ɩla tʋmɩyɛ, fendu ɛtaakpa-mɩ. Ɩla Kɩpaɣlʋ tʋmɩyɛ nɛ mɩ-laŋa tɩŋa pilim. 12Mɩ-laŋa ɛhʋlʋmɩ mɩ-ɖaŋʋʋ yɔɔ. Ɩɖɔkɩ mɩ-hɔ kʋñɔmɩŋ taa. Ɩwɛɛ Ɛsɔ sɛʋ yɔɔ tam. 13Ɩsɩnɩ mɩ-taabalaa Ɛsɔ ñɩma mbá pɛwɛ kʋñɔŋ taa yɔ. Ɩmʋ mbá pɔkɔŋ mɩ-tɛ yɔ camɩyɛ. 14Itendi Ɛsɔ se ɛ́wazɩ mbá pɛwɛ mɩ-wayɩ kaŋ kaŋ yɔ pɔ-yɔɔ. Itendi-i se ɛ́wazɩ pɔ-yɔɔ, ɩtaawɩlɩ-wɛ kpalʋʋ. 15Mɩ nɛ mbá pamayɩɣ amaya yɔ, ɩkpɛndɩ ɩmayɩ. Mɩ nɛ mbá paba wiliɣ yɔ, ɩkpɛndɩ iwili. 16Ɩnɩɩnɩ ɖama camɩyɛ mi-wezuu caɣʋ taa. Ɩtaakpazɩ mɩ-tɩ, ɛlɛ́, ɩmaɣzɩ mbʋ́ patakpaɣ payaa pʋyʋ yɔ pʋ-yɔɔ. Ɩtaakpaɣ mɩ-tɩ se ɩkɛ lɔŋsɩnɖaa. 17Ɩtaala nɔɔyʋ taŋ labɩ-m malakɩ-ɩ. Ɩñaɣ pana nɛ ɩla mbʋ́ pʋwɛ ɖeu yɔ paa weyi ɛ-ɛsɩndaa. 18Ɩñaɣ pana ɛzɩma mbʋ́ ɩpɩzɩɣ yɔ nɛ mɩ nɛ ɛyáa tɩŋa payɩ pʋwɛɛ leleŋ. 19Man-taabalaa kʋsɔɔlaa, mɩ-maɣmaɣ ɩtaahɛyɩ ɛyáa mbʋ́ palabɩ-mɩ pɩfɛyɩ ɖeu yɔ. Ɛlɛ́, iyele se Ɛsɔ pana ɛkpanɩnɩ-wɛ. Mbʋ́ pʋyɔɔ yɔ, pama Ɛsɔtɔm Takayaɣ taa se: «Mɛhɛyɩɣnɩ ɛyáa mbʋ́ palabɩ pɩfɛyɩ ɖeu yɔ.» Đa-Kɩpaɣlʋ yɔɔdɩnɩ ḿbʋ́. 20Pamawa ɖɔɖɔ se: «Yee ñɔɔsɩ ɛwɩɣ ño-koyindu yɔ, ha-ɩ tɔɔnaɣ nɛ ɛtɔɔ. Yee lɔkɔtʋ ɛkpa-ɩ yɔ, ha-ɩ lɩm nɛ ɛñɔɔ. Mbʋ́ pʋyɔɔ yɔ, yee ŋlabɩ ḿbʋ́ yɔ, pʋwɛɣ ɛzɩ ŋhuti ɛ-ñʋʋ taa miŋ nɛ mamala yɔ.» 21Taayele ña-tɩ nɛ kɩdɛkɛdɩm wabɩ-ŋ. Ɛlɛ́, pʋwɛɛ se ŋla mbʋ́ pʋwɛ ɖeu yɔ nɛ ŋwabɩnɩ-pʋ.
Currently Selected:
Room 12: KABI
Highlight
Share
Compare
Copy
Want to have your highlights saved across all your devices? Sign up or sign in
