Room 11
11
Ɛsɔ tɔlɔ Izrɛɛlɩ ñɩma
1Pʋ-yɔɔ mɔnpɔzʋʋ se: Ɛsɔ lɔ Izrɛɛlɩ ñɩma naa we? Pɩtatɩɩkɛʋ ḿbʋ́ kpem! Mbʋ́ pʋyɔɔ yɔ, ma-maɣmaɣ mɛnkɛ Izrɛɛlɩ tʋ. Mɛnkɛ Abraham liɖe taa tʋ, mɛwɛ Bɛnjamɛɛ cejewiye taa. 2Ɛsɔ tɔlɔ ɛ-ñɩma mbá ɛɛlɩzɩ ɖooo lɔŋ yɔ. Pɩlakɩ-m ɛzɩ ɩsɩm Ɛsɔtɔm Takayaɣ taa ɖenɖe pamawa se Elii kpiɖaɣ Izrɛɛlɩ ñɩma yɔɔ Ɛsɔ ɛsɩndaa yɔ. 3Ekpiɖaɣ nɛ ɛtɔŋ se: «Kɩpaɣlʋ, pakʋ ña-náyaa nɛ pɔyɔkɩ ɖenɖe ɖenɖe palaɣ-ŋ yɔ. Men-ɖeke koŋ pɩsɛɣa nɛ pacaɣ se pɛtɛzɩ-m.» 4Ɛlɛ́, Ɛsɔ cosi-i se we? Ecosi-i se: «Mansɩ man-tɩ ɛyáa kutokiŋ lʋbɛ, potoluŋ sɩʋ ŋgʋ́ payaɣ se Baalɩfa#11.4 Baalɩfa: Kanaanɩ ñɩma ɛgɔlɩmɩyɛ naɖɩyɛ. Đɩɩwɛɛ nɛ pʋcɔ Izrɛɛlɩ ñɩma wolo pɛwɛɛ peeye. Paayebi Ɛsɔ tɛɛ luŋuu alɩwaatʋ natʋyʋ nɛ poluŋ ɖɩ-tɛɛ nɛ ɛlɛ pana kpanɩ-wɛ. yɔ kɩ-tɛɛ.» 5Ḿbʋ́ ɖɔɖɔ pʋwɛ lɛɛlɛɛyɔ alɩwaatʋ tʋnɛ tɩ-taa: Yuda ñɩma hɛkʋ taa lɛ, Ɛsɔ labɩ nabɛyɛ lootiye nɛ ɛlɩzɩ-wɛ nɛ ɛsɩɩ-wɛ ɛ-tɩ. 6E-lootiye yɔɔ ɛlɩzɩ-wɛ, pɩtɛkɛ pa-tʋmɩyɛ yɔɔ ɛlɩzɩ-wɛ. Pɩtɛkɛ ḿbʋ́, Ɛsɔ lootiye ɛɛtasɩɣ kɛʋ lootiye siŋŋ. 7Đɩyɔɔdʋʋ se we yɔ? Đɩtɔŋ se Izrɛɛlɩ ñɩma tehiɣ mbʋ́ pañɩnaɣ yɔ. Ɛlɛ́, mbá Ɛsɔ lɩzɩ pa-taa yɔ, pe-ɖeke pehiɣni-pʋ nɛ pɩsɛɣ pʋtɔ lɛlaa nɩŋgbaaŋ taa se pataanɩɩ. 8Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Ɛsɔ yeba nɛ pa-ñʋŋ taa kpa ɖoŋ nɛ
ehuuzi pɛ-ɛsɛ yɔɔ se pataana nɛ
ɛtɔ pa-nɩŋgbaaŋ taa se pataanɩɩ nɛ
pɛwɛɛ ḿbʋ́ halɩ nɛ sɔnɔ.»
9Daaviidi mawa ɖɔɖɔ se:
«Pɔ-tɔɔnasɩ ɛpɩsɩ kaamʋʋ
nɛ piyuu nɛ pɩkpa-wɛ
nɛ pɔtɔlɩ nɛ pɔhɔ pa-nɩŋgbaaŋ.
10Pɛ-ɛsɛ ɛyʋlʋmɩ
nɛ pataatasɩ naʋ kaʋ!
Nɛ pʋwɛɛ pɩnazɩɣ-wɛ.»
11Pʋ-yɔɔ mɔnpɔzʋʋ se: pucoɖuu Izrɛɛlɩ ñɩma nɛ pɔtɔlɩ yɔ, pɔtɔlaa se kʋyʋʋ fɛyɩ yaa we? Pɩtɛkɛ ḿbʋ́ kpem! Ɛlɛ́, pɛ-ɛzaɣ́tʋ yɔɔ lɛ, mbá pɛtɛkɛ Yuda ñɩma yɔ, papɩzaa pehiɣ ñʋʋ yabʋ se Yuda ñɩma ɛsɛzɩ ɛsɩyɛ pɔ-yɔɔ. 12Mbá pɛtɛkɛ Yuda ñɩma yɔ, Yuda ñɩma ɛzaɣ́tʋ nɛ pɔ-tɔlʋʋ pɔ-yɔɔ pehiɣ Ɛsɔ ñɩm. Yee pɩkɛ ḿbʋ́ lɛ, ɛzɩma pʋwɛɣ alɩwaatʋ ndʋ́ patɩŋa payɩ papɩsɩɣ ñʋʋ yabʋ nʋmɔʋ taa yɔ?
Mbá pɛtɛkɛ Yuda ñɩma yɔ pa-ñʋʋ yabʋ tɔm
13Mbá mɩ ɩtɛkɛ Yuda ñɩma yɔ, mɩ mɔyɔɔdʋʋnɩ lɛɛlɛɛyɔ: ma lɛ Krɩstʋ tiyiyu weyi ɛlakɩ tʋmɩyɛ mbá pɛtɛkɛ Yuda ñɩma yɔ pɛ-hɛkʋ taa yɔ. Pʋ-yɔɔ lɛ, mamaɣzɩɣ se man-tʋmɩyɛ wɛ wazaɣ siŋŋ. 14Malakɩ ḿbʋ́ se pʋtɔmaɣ yɔ, me-liɖe taa ñɩma kaatɛzɩ wɛʋ ɛsɩsɛmɩyɛ nɛ pɩya pa-taa nabɛyɛ ñʋʋ. 15Mbʋ́ pʋyɔɔ yɔ, Ɛsɔ lɔʋ Yuda ñɩma ḿbá yɔ, ɛ nɛ ɛyáa lɛlaa peceɣaa. Yee pɩkɛ ḿbʋ́ lɛ, ɛzɩma pʋwɛɣ alɩwaatʋ ndʋ́ ɛɖaɣnɩɣ-wɛ mʋ́ʋ yɔ? Pʋwɛɣ ɛzɩ ɛyʋ sɩkʋʋ nɛ efe nɛ pʋwɛɣ yɔ.
Tɛyɛ yɔɔ tɩʋ nɛ tɩʋ ŋgʋ́ pɔsɔwa yɔ ɩ-tɔm
16Ɩtɩlɩ se: yee pafaɣ tindine hɔɔlaɣ kajalaɣ ñɩŋga nɛ paha-kɛ Ɛsɔ yɔ, pɩwɩlɩɣ se ɛnʋ tɩnɩ tindine ńɖɩ́ ɖɩtɩŋa ɖɔɖɔ. Yee pakpaɣ tɩʋ nakʋyʋ lila nɛ paha Ɛsɔ yɔ, ɛnʋ tɩnɩ ki-pilinzi ɖɔɖɔ. 17Izrɛɛlɩ ñɩma wɛ ɛzɩ somuu ŋgʋ́ pɔsɔwa nɛ pɛsɛtɩ ki-pilinzi nasɩyɩ yɔ. Weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ́ kʋñɔ tɛyɛ yɔɔ yem yɔ ki-piliŋa. Pɛsɛtɩ-kɛ nɛ pɔsɔ ŋgʋ́ pɔsɔ kʋsɔʋ yɔ ki-pilinzi nzɩ́ pɛsɛtaa yɔ si-lone taa: lɛɛlɛɛyɔ, ŋtɔkɩ ɖɔɖɔ liɖe nɖɩ́ ɖɩcalɩɣ-kʋ yɔ ɖɩ-yɔɔ. 18Pʋ-yɔɔ lɛ, taakpaɣ pilinzi nzɩ́ pɛsɛtaa yɔ se sɩtɛkɛ pʋyʋ. Ɛbɛ yɔɔ ŋkpazɩɣ ña-tɩ yɔ? Pɩtɛkɛ ñɔ-yɔɔ lila wɛɛ, ɛlɛ́, ñɛwɛnɩ lila yɔɔ. 19Ŋkaɣ-m heyuu se «Pɛsɛtɩ pilinzi ńzɩ́ se pɔsɔ-m si-lone taa.» 20Pɩkɛ toovenim. Pɛsɛtɩ-sɩ, mbʋ́ pʋyɔɔ yɔ, ńzɩ́ lɛ lidaʋ fɛyɩwaa nɛ ña ñɛwɛɛ lone nɖɩ́ pɔsɔ-ŋ ɖɩ-taa yɔ ñe-lidaʋ wɛnaʋ yɔɔ. Taakpazɩ ña-tɩ, ɛlɛ́, sɔɔndʋ ɛkpa-ŋ. 21Mbʋ́ pʋyɔɔ yɔ, yee Ɛsɔ etohuuzi Yuda ñɩma mbá pɛwɛ ɛzɩ kajalaɣ pilinzi yɔ pɔ-yɔɔ yɔ, eehuuzuu ña ɖɔɖɔ ñɔ-yɔɔ. 22Cɔnɩ ŋna Ɛsɔ camɩyɛ lakasɩ nɛ ɛzɩma mbʋ́ ɛhʋʋnɩ ɛyáa nɛ ɛhɔŋ pa-nɩŋgbaaŋ ɖɔɖɔ yɔ: ɛhʋʋnɩ mbá palabɩ kɩwɛɛkɩm yɔ nɛ ɛlakɩ ña ɖeu. Ɛlɛ́, pʋwɛɛ se ŋwɛɛ Ɛsɔ camɩyɛ lakasɩ nʋmɔʋ taa. Pɩtɛkɛ ḿbʋ́, ɛsɛtɩɣ-ŋ ɖɔɖɔ ɛzɩ pɛsɛtʋʋ piliŋa yɔ. 23Yee Yuda ñɩma eyebi pa-kaañamtʋ nɛ paɖaɣnɩ wɛnaʋ lidaʋ yɔ, Ɛsɔ pɩsɩɣnɩ-wɛ ɖenɖe paawɛɛ yɔ. Mbʋ́ pʋyɔɔ yɔ, ɛwɛnɩ ɖoŋ se ɛɖaɣnɩ-wɛ sɔʋ. 24Pʋ-yɔɔ lɛ, weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ́ kʋñɔ tɛyɛ yɔɔ yem yɔ ki-piliŋa maɣmaɣ: pɛsɛtɩ-kɛ nɛ pɔsɔ-kɛ ŋgʋ́ pɔsɔ kʋsɔʋ yɔ kʋ-yɔɔ. Ŋgʋ́, ŋtɛkɛ kʋkʋ piliŋa. Yee Ɛsɔ ɛpɩzɩɣ ɛla ḿbʋ́ lɛ, ɛzɩma ɛɛpɩzɩɣ ɛpɩsɩnɩ Yuda ñɩma mbá pɛwɛ ɛzɩ somuu ŋgʋ́ pɔsɔ kʋkʋ kʋsɔʋ yɔ ki-pilinzi maɣmaɣ nɛ ɛpɩsɩnɩ ɛsɔ si-lona taa?
Izrɛɛlɩ ñɩma kpeekpe hikiɣ ñʋʋ yabʋ
25Man-taabalaa, mancaɣ se mawɩlɩ-mɩ mbʋ́ pɩɩwɛ mɛsaɣ tɛɛ yɔ nɛ ɩtaakpaɣ mɩ-tɩ se ɩkɛ lɔŋsɩnɖaa: Izrɛɛlɩ ñɩma lɛlaa tamaa, paapɩzɩɣ panɩɩ. Ɛlɛ́, pɛwɛɣ ḿbʋ́ nɛ pʋkɔɔ pɩsɩɩnɩ alɩwaatʋ ndʋ́ mbá Ɛsɔ lɩzɩ mbá pɛtɛkɛ Yuda ñɩma yɔ pa-taa yɔ patɩŋa payɩ pehiɣ ñʋʋ yabʋ yɔ. 26Peeɖe Ɛsɔ kɔŋ yabʋ Izrɛɛlɩ ñɩma tɩŋa ñʋʋ ɛzɩ pamaʋ Ɛsɔtɔm Takayaɣ taa yɔ. Pamawa se:
«Ñʋʋ yaɖʋ kaɣ lɩnaʋ Yeruusalɛm.
Ɛhɛzɩɣ Yakɔɔbʋ liɖe taa ñɩma kɩwɛɛkɩm.
27Ḿbʋ́ lɛ nɔɔ haʋ mbʋ́ meyeki nɛ pʋwɛɛ ma nɛ wɛ ɖɛ-hɛkʋ taa
alɩwaatʋ ndʋ́ menkpeɣiɣ-wɛ pa-kɩwɛɛkɩm yɔ.»
28Yee ɛyʋ ɛkpaɣ ɛzɩma mbʋ́ Yuda ñɩma kizi Laŋhɛzɩyɛ Tɔm yɔ yɔ, pɩwɩlɩɣ se pɛkɛ Ɛsɔ koyindinaa. Pɩlabɩ ḿbʋ́ se pʋwazɩ-mɩ. Ɛlɛ́, yee ɛyʋ ɛkpaɣ ɛzɩma mbʋ́ Ɛsɔ lɩzɩ-wɛ yɔ yɔ, pɩwɩlɩɣ se pɛkɛ mbá Ɛsɔ sɔɔlɩ-wɛ mbʋ́ ɛɛɖʋwa se ɛlakɩ pɔ-cɔzɔnaa yɔ pʋ-yɔɔ. 29Mbʋ́ pʋyɔɔ yɔ, Ɛsɔ ɛɛmʋʋ mbʋ́ ɛhawa yɔ kaʋ. Ɛɛlɛɣzɩɣ ɖɔɖɔ lɩmaɣza mbá ɛya-wɛ yɔ pɔ-tɔm taa. 30Toovenim lɛ, ɩtaña Ɛsɔ ɖooo lɔŋ. Ɛlɛ́, lɛɛlɛɛyɔ pɩtɩŋnɩ pa-kaañamtʋ yɔɔ nɛ Ɛsɔ na mɩ-pʋtɔdɩyɛ. 31Ḿbʋ́ ɖɔɖɔ lɛɛlɛɛyɔ patañam-ɩ nɛ ɛna mɩ mɩ-pʋtɔdɩyɛ. Đɩ-yɔɔ pɩtɩŋɩɣna nɛ ɛpɩzɩ ɛna pa-pʋtɔdɩyɛ ɖɔɖɔ. 32Mbʋ́ pʋyɔɔ yɔ, Ɛsɔ yeba nɛ ɛyáa tɩŋa wɛɛ ɛzɩ yomaa yɔ pa-kaañamtʋ yɔɔ se ɛna patɩŋa payɩ pa-pʋtɔdɩyɛ.
Ɛsɔ lɛ sɔsɔ
33Ɛsɔ camɩyɛ lakasɩ ɖɔwa siŋŋ! Ɛ-lɔŋsɩnɖɛ nɛ ɛ-lɛɣtʋ pɛfɛyɩ kámaɣ́! Apɩzɩɣ ɛlɩzɩ mbʋ́ Ɛsɔ ɖʋ ɛ-taa yɔ pʋ-tɔbʋʋ? Apɩzɩɣ ɛnɩɩ mbʋ́ ɛlakɩ yɔ pʋ-tɔbʋʋ? 34Pama Ɛsɔtɔm Takayaɣ taa se:
«Asɩm Ɛsɔ lɩmaɣza? Apɩzɩɣ ɛkɛ ɛ-tɔm tasɩyʋ?
35Apɩzaa ɛcalɩ-ɩ haʋ pʋyʋ nɛ
pʋwɛɛ se ɛhɛyɩ pʋdʋ pʋ-yɔɔ?»
36Mbʋ́ pʋyɔɔ yɔ, ɛ-cɔlɔ pɩtɩŋa pɩlɩɣna. Ɛnʋ yebina nɛ pɩtɩŋa pʋwɛɛ se pɩkɛ ɛ-ñɩm. Ɛsɔ hɩɖɛ ɛsɛɛ paa ɖooye! Pɩla ḿbʋ́!
Currently Selected:
Room 11: KABI
Highlight
Share
Compare
Copy
Want to have your highlights saved across all your devices? Sign up or sign in
