Room 10
10
Yuda ñɩma nɛ mbá pɛtɛkɛ Yuda ñɩma yɔ, pɛwɛnɩ Ɛsɔ kʋɖʋm
1Man-taabalaa, mbʋ́ mañɩnɩɣnɩ ma-laŋɩyɛ tɩŋa nɛ mentendiɣ Ɛsɔ Yuda ñɩma yɔɔ yɔ lɛ se: ɛya pa-ñʋʋ. 2Mbʋ́ pʋyɔɔ yɔ, manpɩzɩɣ malɩzɩ pa-aseɣɖe se pañakɩ pana siŋŋ Ɛsɔ nʋmɔʋ taa. Ɛlɛ́, patasɩm-kʋ. 3Toovenim lɛ, patakpaɣ ɛzɩma mbʋ́ Ɛsɔ pɩsɩɣ ɛyáa kʋtʋʋzaa yɔ nɛ payaa pʋyʋ nɛ pa-maɣmaɣ pañɩnɩɣ mbʋ́ paala nɛ papɩsɩ kʋtʋʋzaa yɔ. Pʋ-yɔɔ pɔtɔɖɔ ɛzɩma mbʋ́ Ɛsɔ pɩsɩɣ ɛyáa kʋtʋʋzaa yɔ pʋ-yɔɔ. 4Mbʋ́ pʋyɔɔ yɔ, Krɩstʋ yɔɔ paɣtʋ tatasɩ wɛnaʋ ɖoŋ se mbá patɩŋa payɩ pɛwɛnɩ lidaʋ Ɛsɔ yɔɔ yɔ, papɩsɩ kʋtʋʋzaa ɛ-ɛsɩndaa.
5Tɔm ndʋ́ Mooyiizi ma ɛzɩma mbʋ́ pɩtɩŋnɩ paɣtʋ yɔɔ ɖɔm yɔɔ nɛ Ɛsɔ pɩsɩ ɛyʋ kʋtʋʋzʋ yɔ pʋ-yɔɔ yɔ, ńdʋ́ lɛ se: «Weyi ɛɖɔŋ mbʋ́ paɖʋ paɣtʋ taa yɔ pʋ-yɔɔ yɔ, pɩtɩŋɩɣnɩ pʋ-yɔɔ nɛ ɛwɛɛ wezuu.» 6Ɛlɛ́, ɛzɩma mbʋ́ pɔtɔm se Ɛsɔ tɩŋɩɣnɩ lidaʋ ŋgʋ́ ɛyʋ wɛnɩ ɛ-yɔɔ yɔ kʋ-yɔɔ nɛ ɛpɩsɩ-ɩ kʋtʋʋzʋ yɔ, ńdʋ́ lɛ se: «Taapɔzɩ ña-maɣmaɣ ña-tɩ se akaɣ kpaʋ ɛsɔdaa?» Pʋ-tɔbʋʋ se akpaɣ ɛsɔdaa nɛ etisi Krɩstʋ. 7Taapɔzɩ ña-maɣmaɣ ña-tɩ ɖɔɖɔ se: «Akaɣ tibu tɛtɛɛ?» Pʋ-tɔbʋʋ se atiki ɛlɩzɩ Krɩstʋ nɛ sɩɖaa taa. 8Se we pama Ɛsɔtɔm Takayaɣ taa yɔ? Pamawa se: «Ñɔ-cɔlɔ tɔm wɛɛ, tɩwɛ ñɔ-nɔɔ taa nɛ tɩwɛɛ ña-taa.» Ŋgʋ́, ńdʋ́ lɛ lidaʋ tɔm ndʋ́ ɖisusuu yɔ. 9Ńdʋ́ lɛ se: yee ŋyɔɔdɩnɩ ñɔ-nɔɔ ɛyáa tɩŋa ɛsɩndaa se Yesu lɛ Kɩpaɣlʋ nɛ ña-taa lɛ, ŋwɛnɩ lidaʋ se Ɛsɔ fezi-i nɛ ɛlɩɩnɩ sɩɖaa taa yɔ, Ɛsɔ yakɩ ña-ñʋʋ. 10Yee ḿbʋ́ ɛyʋ wɛɣnɩ lidaʋ ɛ-taa nɛ Ɛsɔ pɩsɩ-ɩ kʋtʋʋzʋ, nɛ ɛyɔɔdɩnɩ ɛ-nɔɔ nɛ ɛ́lɛ́ ya ɛ-ñʋʋ. 11Ḿbʋ́ pama Ɛsɔtɔm Takayaɣ taa se: «Paa weyi ɛwɛnɩ lidaʋ ɛ-yɔɔ yɔ, ɛɛkaɣ fɛyɛ tɔɔʋ.» 12Pʋ-yɔɔ lɛ, tayʋʋ nabʋyʋ fɛyɩ Yuda ñɩma nɛ mbá pɛtɛkɛ Yuda ñɩma yɔ pɛ-hɛkʋ taa: patɩŋa pa-Kɩpaɣlʋ kʋɖʋm, ɛhaɣ ɛ-ñɩm mbá payaɣ-ɩ se ɛsɩnɩ-wɛ yɔ patɩŋa. 13Ḿbʋ́ pama Ɛsɔtɔm Takayaɣ taa se: «Weyi ɛyaɣ Kɩpaɣlʋ se ɛsɩnɩ-ɩ yɔ, ɛyakɩ ɛ-ñʋʋ.»
Laŋhɛzɩyɛ Tɔm susuu
14Ɛlɛ́, ɛzɩma papɩzɩɣ payaa-ɩ se ɛsɩnɩ-wɛ nɛ pɛfɛyɩnɩ lidaʋ ɛ-yɔɔ? Ɛzɩma papɩzɩɣ pɛwɛnɩ lidaʋ ɛ-yɔɔ nɛ patanɩɩ ɛ-tɔm nɔɔyʋ cɔlɔ? Ɛzɩma papɩzɩɣ panɩɩ ɛ-tɔm nɛ nɔɔyʋ tosusi-tʋ? 15Ɛzɩma tɔm susiyaa wɛɣ nɛ petetiyi nabɛyɛ se posusi-tʋ? Ḿbʋ́ pama Ɛsɔtɔm Takayaɣ taa se: «Tɔm susiyaa wokuuni ɛyʋ tɔm kɩbandʋ yɔ, pɩlabɩ ɖeu lɛ yee!» 16Ɛlɛ́, pɩtɛkɛ patɩŋa paatisini Laŋhɛzɩyɛ Tɔm. Toovenim lɛ, Ezaayii ma ɛ-takayaɣ taa se: «Kɩpaɣlʋ, atisi tɔm ndʋ́ ɖisusaa yɔ?» 17Pʋ-yɔɔ lɛ, lidaʋ lɩɣnɩ tɔm ndʋ́ ɛyʋ welesiɣ yɔ tɩ-cɔlɔ. Tɔm ndʋ́ ewelesiɣ yɔ lɛ Krɩstʋ tɔm ndʋ́ posusuu yɔ.
18Ḿbʋ́ mɔnpɔzʋʋ se: Yuda ñɩma tanɩɩ tɔm ńdʋ́ yaa we? Panɩ-tʋ. Ḿbʋ́ pama Ɛsɔtɔm Takayaɣ taa se:
«Ɛyáa nɩ pa-taŋ
paa le kedeŋa yɔɔ,
nɛ halɩ ndʋ́ pɔyɔɔdaa yɔ,
tɩtalɩ ɖooo kedeŋa tɩnaɣ yɔɔ.»
19Mantasɩɣ pɔzʋʋ se: Izrɛɛlɩ ñɩma tanɩɩ tɔm ńdʋ́ tɩ-taa yaa we? Mooyiizi layɩ cosuu se: «Ɛsɔ yɔɔdaa se:
‹Meyeki nɛ ɩla sʋsɩ
ɛjaɖɛ nɖɩ́ patakpaɣ payaa pʋyʋ yɔ ɖɩ-taa ñɩma.
Mansazɩɣ-mɩ nɛ mɩ-pana kpanɩ
ɛjaɖɛ nɖɩ́ ɖɩ-taa ñɩma fɛyɩ lɛɣtʋ yɔ.› »
20Pʋwayɩ lɛ, Ezaayii ñakatɩ nɛ esusuu se:
«Ɛsɔ yɔɔdaa se: ‹Mbá pataañɩnɩɣ-m yɔ,
pana-m.
Mawɩlɩ man-tɩ mbá
pataasʋlʋmʋʋ-m pʋyʋ yɔ.› »
21Ɛlɛ́, Izrɛɛlɩ ñɩma ñɩndʋ lɛ, ɛyɔɔdaa se: «Mañɩnɩ kɩyakʋ nɛ kɩ-tɛɛ pilim se mɔñɔɔzɩ ma nɛ mbá paañaŋ-m nɛ pɛkɛlɛsɩɣ-m yɔ ɖɛ-hɛkʋ taa.»
Currently Selected:
Room 10: KABI
Highlight
Share
Compare
Copy
Want to have your highlights saved across all your devices? Sign up or sign in
