Galaatɩ KAJALAƔ TƆM
KAJALAƔ TƆM
Takayaɣ ŋgá Pɔɔlɩ ma Galaatɩ ñɩma yɔ, Krɩstʋ aŋgba wena awɛ sɔnɔ Turkii ɛjaɖɛ hayo kiŋ hɔɔlʋʋ taa yɔ, ana etiyini-kɛ. Krɩstʋ aŋgba ana, Pɔɔlɩ ɖʋ a-taa naayɛ alɩwaatʋ ndʋ́ ɛɖɔŋaɣ ɛ-tʋmɩyɛ nɩmaŋ naalɛ nɛ naadozo ñɩŋ yɔ. Ɛlɛ́ ɛɖɛwa lɛ, ɛyáa nabɛyɛ kɔɔ pɔyɔɔdɩ tɔm kɩfatʋ. Ɛzɩ pʋwɛʋ Krɩstʋ aŋgba lɛɛna taa yɔ, Galaatɩ Krɩstʋ aŋgba taa ɖɩnaɣ Krɩstʋ ñɩma mbá pɛkɛ Yuda ñɩma nɛ mbá paba tɩŋaɣ Ɛsɔ nɩmaŋ lɛɛŋ yɔ. Krɩstʋ ñɩma mbá pɛkɛ Yuda ñɩma yɔ, pɔɖɔŋ ɖɔm Yuda ñɩma Ɛsɔ nʋmɔʋ paɣtʋ natʋyʋ yɔɔ. Paɣtʋ ńdʋ́, tikiziɣnɩ-wɛ se pa nɛ Ɛsɔ nɩmaŋ lɛɛŋ aŋgba taa ɛyáa pataatɔɔ ñanaɣ kʋɖʋmaɣ taa. Paɣtʋ ńdʋ́, tɩyɔɔdʋʋ ɖɔɖɔ se pʋwɛɛ se pɛpɛlɩ abalɩbiya. Pɔɔlɩ koyindinaa maɣzɩɣ se pʋwɛɛ se Krɩstʋ ñɩma tɩŋa ɛɖɔ paɣtʋ tʋnɛ tɩ-yɔɔ. Pi-ɖeke pɩlakɩna nɛ pɛwɛnɩ lidaʋ Yesu Krɩstʋ yɔɔ. Kɛlɛ Yesu laŋhɛzɩyɛ tɔm nɛ tɔm tʋnɛ pɩtata. Pʋyɔɔ Pɔɔlɩ ma Galaatɩ ñɩma takayaɣ kanɛ.
Pɔɔlɩ caɣ eheyi Galaatɩ ñɩma se Yesu Krɩstʋ yɔɔ lidaʋ ɖeke koŋ pɩzɩɣnɩ kɩha-wɛ nʋmɔʋ nɛ pa nɛ Ɛsɔ pɛkɛ kʋɖʋm. Ɛlɩzɩɣ tɔm tʋnɛ tɩ-taa hɔɔlɩŋ naadozo taa:
Ñʋʋ 1 ñɩŋgʋ nɛ 2 ñɩŋgʋ taa lɛ, ɛkɛdɩɣ ɛ-maɣmaɣ e-wezuu caɣʋ tɔm. Ɛnʋ Yuda tʋ pɩsɩnɩ Yesu Krɩstʋ tiyiyu mbá pɛtɛkɛ Yuda ñɩma yɔ pɔ-cɔlɔ. Yeruusalɛm Krɩstʋ aŋgba ñʋndɩnaa tisi ɛ-tɔm: Krɩstʋ ñɩma mbá pɛtɛkɛ Yuda ñɩma yɔ, pɩtɛkɛnɩ-wɛ kɩjɛyʋʋ se pɔɖɔ Yuda ñɩma Ɛsɔ nʋmɔʋ paɣtʋ yɔɔ. Pɔɔlɩ nɛ tiyiyu Pɩyɛ pɔhɔm tɔm tʋnɛ (2.11-21). Pɔɔlɩ ɖaɣnɩ-ɩ tɔzʋʋ se: Ɛsɔ mʋ́ʋ ɛyáa ɛ-cɔlɔ mbʋ́ pʋyɔɔ yɔ pɛwɛnɩ lidaʋ Yesu Krɩstʋ yɔɔ. Ɛɛmʋʋ-wɛ mbʋ́ pʋyɔɔ yɔ pɔɖɔŋ Ɛsɔ nɩmaŋ paɣtʋ natʋyʋ yɔɔ.
Ñʋŋ 3 nɛ 4 ñɩŋ taa lɛ, Pɔɔlɩ kpakɩɣ Nɔɔ Haʋ Kɩbɩm Takayaɣ taa tɔm nɛ ɛlɩzɩɣnɩ ɛ-tɔm tɔbʋʋ. Ɛsɔ nʋmɔʋ paɣtʋ sɩɣnɩ ɛyáa nɛ powobina ɛsɩndaa pe-wezuu caɣʋ taa. Ɛlɛ́, tamaɣ ŋgá Ɛsɔ laba ɖɔ-yɔɔ yɔ, kaawɛɛ nɛ pʋcɔ paɣtʋ ńdʋ́ tɩkɔŋ. Ɛsɔ tamaɣ ŋ́gá, ɖɩnaɣ-kɛ Yesu Krɩstʋ kɔm taa. Ɛsɔ ɛsɩndaa lɛ, ɛyáa tɩŋa wɛ kɩmaŋ. Pɩtɩŋnɩ Yesu Krɩstʋ yɔɔ nɛ papɩsɩ kʋɖʋm nɛ pa nɛ Ɛsɔ papɩsɩ kʋɖʋm ɖɔɖɔ (ɩkalɩ 3.28). Tɔm tʋnɛ, ɛyáa tɩŋa peheyiɣ-tʋ: mbá patɩŋɩɣ Ɛsɔ nɩmaŋ ndɩ ndɩ yɔ (Yuda ñɩma nɛ mbá pɛtɛkɛ Yuda ñɩma yɔ), kpaɖɩŋ ndɩ ndɩ taa ɛyáa (yomaa nɛ mbá pɛwɛ pa-tɩ yɔɔ yɔ), halaa nɛ abalaa.
Ñʋŋ 5 nɛ 6 ñɩŋ taa lɛ, Pɔɔlɩ lɩzɩɣ Krɩstʋ ñɩma tɩ-yɔɔ wɛʋ tɔbʋʋ. Weyi ɛwɛnɩ lidaʋ Ɛsɔ yɔɔ yɔ, pɩfɛyɩ se ɛɖaɣnɩ ɛ-tɩ kʋʋ se ɛɖɔŋ paɣtʋ natʋyʋ yɔɔ nɛ ɛwɛɛ siɣsiɣ Ɛsɔ ɛsɩndaa (ɩkalɩ 3.11). Ɛwɛ ɛ-tɩ yɔɔ se pʋwazɩ ɛyáa lɛlaa. Pʋ-tɔbʋʋ lɛ se, Krɩstʋ paɣtʋ taa lɛ, sɔmtʋ natʋyʋ fɛyɩ. Mbʋ́ paɣtʋ ńdʋ́ tɩpɔzʋʋ-ɖʋ yɔ lɛ se ɖɩsɩnɩ ɖama (6.2). Tɩ-yɔɔ wɛʋ tɔbʋʋ lɛ se ɖɩkpaɣ Ɛsɔ lɩmaɣza nɛ ɖɩlabɩna lɛlaa kɩbandʋ.
Currently Selected:
Galaatɩ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in