2 Kɔrɛntɩ 13
13
Pɔɔlɩ kɛtɛzaɣ lɛɣtʋ
1Mowokuu mɩ-tɛ yɔ, tozo manɖʋʋ yɔ. Pama Ɛsɔtɔm Takayaɣ taa se: «Pʋcɔ pakʋ nɔɔyʋ tɔm lɛ, pʋwɛɛ se ɛyáa naalɛ yaa naadozo ɩlɩzɩ aseɣɖe kʋɖʋmɖɩyɛ tɩ-yɔɔ.» 2Alɩwaatʋ ndʋ́ maakɔm mɩ-tɛ nabʋlɛ ɖeɖe yɔ, maatɛm paɣ́ʋ mbá paalabɩ kɩwɛɛkɩm yɔ nɛ ɛyáa lɛlaa tɩŋa payɩ. Lɛɛlɛɛyɔ mantatasɩ mɩ-cɔlɔ wɛʋ, paa ḿbʋ́ mantasɩɣ-wɛ paɣ́ʋ. Yee mantasɩ pɩsʋʋ mɩ-tɛ yɔ, maakpeɣu mɩ-taa nɔɔyʋ. 3Ɩcaɣ se mawɩlɩ-mɩ ɛzɩma mbʋ́ mɔyɔɔdʋʋnɩ Krɩstʋ nɔɔ yɔ yaa we? Mawɩlɩɣ-mɩ ɖɔɖɔ. Krɩstʋ tɛkɛ ɛjam mɩ-hɛkʋ taa: ɛwɩlɩɣ-mɩ e-ɖoŋ. 4Mbʋ́ pʋyɔɔ yɔ, ɛ-ɛjandʋ yɔɔ pakam-ɩ kaamaŋkaɣ yɔɔ. Ɛlɛ́, pɩtɩŋnɩ Ɛsɔ ɖoŋ yɔɔ nɛ ɛwɛɛ wezuu. Đa nɛ ɩ ɖɛ-kpɛndʋʋ taa lɛ, ɖɩwɛ ɛjandʋ ɖɔɖɔ. Ɛlɛ́, alɩwaatʋ ndʋ́ ɖɩkɔŋ mɩ-tɛ yɔ, Ɛsɔ ɖoŋ ɖɩñɔɔzʋʋnɩ tɔm mɩ-hɛkʋ taa.
5Mɩ-maɣmaɣ ɩtakɩ mɩ-taa nɛ ɩna se ɩwɛ lidaʋ nʋmɔʋ taa yaa we? Ɩtatɩlɩ se mɩ nɛ Yesu Krɩstʋ ɩkpɛndaa yaa we? Yee ɩnawa se ɩfɛyɩnɩ lidaʋ ɛ-yɔɔ lɛ, ḿbʋ́ lɛ. 6Ɩkɔŋ naʋ se ɖa ɖatakɩ ɖa-taa nɛ ɖɩna se ɖɩmʋnaa. 7Đɔɖɔ lɛ, ɖɩsɛɣ Ɛsɔ se mɩ-taa nɔɔyʋ ɛtaatasɩ kɩwɛɛkɩm nabʋyʋ labʋ. Đɩɩcaɣ se ɖɩtɩŋnɩ pʋ-yɔɔ nɛ ɖɩwɩlɩ se ɖɩmʋnaa. Ɛlɛ́, paa pɩlakɩ-mɩ ɛzɩ ɖɩtamʋna yɔ yɔ, mɩ mɩla mbʋ́ pʋwɛ ɖeu yɔ. 8Mbʋ́ pʋyɔɔ yɔ, ɖɩfɛyɩnɩ ɖoŋ nɩɩyɩ se ɖɩɩɖɩɣnɩ toovenim nʋmɔʋ. Toovenim ḿbʋ́ pʋ-tɔm taa ɖɩwɛ ɖoŋ. 9Paa ɖɩwɛ ɛjandʋ nɛ mɩ mɩwɛɛ ɖoŋ yɔ, pɩlakɩ-ɖʋ leleŋ. Ḿbʋ́ ɖɩsɛɣ Ɛsɔ se eyele nɛ ɩtɛzɩ kpaʋ ɖoŋ ɛ-nʋmɔʋ taa. 10Pʋ-yɔɔ mamaɣ-mɩ takayaɣ alɩwaatʋ ndʋ́ mɛwɛ poliŋ yɔ se mɔnkɔm mantalɩ mɩ-hɛkʋ taa lɛ, mantaañazɩ-mɩ. Toovenim lɛ, Kɩpaɣlʋ ha-m ɖoŋ se mañazɩnɩ-mɩ nɛ mɔñɔɔzɩnɩ mɩ-ŋgbɛyɛ. Ɛlɛ́, ɛtaha-m-ɩ se mɔyɔkɩnɩ-ɖɩ.
11Taabalaa, pɩlabɩ wiɖiyi! Ɩñaɣ pana nɛ ɩtɛzɩ pɩʋ Ɛsɔ nʋmɔʋ taa. Ɩhɛzɩ ɖama laŋa. Ɩla nɔɔ kʋɖʋmaɣ. Ɩwɛɛ laŋhɛzɩyɛ taa nɛ Ɛsɔ weyi ɛsɔɔlɩ ɛyáa nɛ ɛhɛzɩɣ pa-laŋa yɔ, ɛwɛɛ mɩ-cɔlɔ.
12Ɩsɛɛ ɖama camɩyɛ ɛzɩ pʋmʋnaʋ yɔ.
Ɛsɔ ñɩma tɩŋa payɩ sɛ-mɩ.
13Kɩpaɣlʋ Yesu Krɩstʋ ɛla mɩtɩŋa payɩ lootiye nɛ Ɛsɔ sɔɔlɩ-mɩ nɛ e-Fezuu Kiɖeɖeu wɛɛ mɩtɩŋa payɩ mɩ-cɔlɔ nɛ kɩkpɛndɩ-mɩ.
Currently Selected:
2 Kɔrɛntɩ 13: KABI
Highlight
Share
Copy
Want to have your highlights saved across all your devices? Sign up or sign in