Galaatɩ 1
1
Sɛtʋ
1-2Ma Yesu tiyiyu Pɔɔlɩ nɛ man-taabalaa tɩŋa mbá pɛwɛ cɩnɛ yɔ, ɖɩmaɣnɩ Krɩstʋ aŋgba wena awɛ Galaatɩ egeetiye taa yɔ a-taa ñɩma takayaɣ kanɛ. Pɩtɛkɛ ɛyáa nabɛyɛ yaa ɛyʋ nɔɔyʋ lɩzɩnɩ-m se mɛnkɛ Yesu tiyiyu. Ɛlɛ́, Yesu Krɩstʋ weyi ɛsɩba nɛ Caa Ɛsɔ fezi-i yɔ, ɛ nɛ Caa Ɛsɔ ɛnʋ, palɩzɩnɩ-m. 3Mɛnsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa. 4Krɩstʋ ɛnʋ ɛhanɩ ɛ-maɣmaɣ ɛ-tɩ ɖa-kɩwɛɛkɩm yɔɔ se ɛlɩzɩ-ɖʋ lɛɛlɛɛyɔ kedeŋa kɩdɛkɛdɩm nesi taa. Ɛlabɩ ḿbʋ́ ɛzɩ ɖa-Caa Ɛsɔ liu wɛʋ yɔ. 5Ɛsɔ ɛnʋ, ɛwɛɛ koboyaɣ taa tam! Pɩla ḿbʋ́!
Laŋhɛzɩyɛ Tɔm kʋɖʋmtʋ wɛna
6Pɩɖɩɣzɩ-m pɩŋŋ nɛ mɩ-tɔm. Mbʋ́ pʋyɔɔ yɔ, ɩha Ɛsɔ weyi ɛtɩŋnɩ Krɩstʋ lootiye yɔɔ nɛ ɛ́yáa-mɩ se ɩkɛ ɛ-ñɩma yɔ siɣ́ye yem kɛlɛʋ nɛ ɩnɩɣnɩ Laŋhɛzɩyɛ Tɔm lɛɛtʋ. 7Ŋgʋ́, tɩtɛkɛ Laŋhɛzɩyɛ Tɔm siŋŋ. Ɛlɛ́, nabɛyɛ wɛɛ peliɣtiɣ-mɩ nɛ pacaɣ se pɛlɛɣzɩ Krɩstʋ Laŋhɛzɩyɛ Tɔm. 8Pʋ-yɔɔ lɛ, paa ɖa-maɣmaɣ ɖa-taa nɔɔyʋ yaa tiyiyu nɔɔyʋ ɛlɩnɩnɩ ɛsɔdaa nɛ ɛkɔɔ esusuu-mɩ Laŋhɛzɩyɛ Tɔm ndʋ́ tɩwɛ ndɩ nɛ ndʋ́ ɖisusi-mɩ yɔ yɔ, Ɛsɔ ɛwɩlɩ-ɩ kpalʋʋ! 9Đɩtɛm-mɩ-tʋ heyuu nɛ lɛɛlɛɛyɔ mantasɩɣ-mɩ-tʋ heyuu se: yee nɔɔyʋ eheyi-mɩ Laŋhɛzɩyɛ Tɔm natʋyʋ yem nɛ pɩtɛkɛnɩ ndʋ́ ɖiiheyi-mɩ nɛ itisi yɔ yɔ, Ɛsɔ ɛwɩlɩ-ɩ kpalʋʋ!
10Ɩmaɣzɩɣ se mɔyɔɔdʋʋ ḿbʋ́ yɔ, mancaɣ se ɛyáa ɩyɩɣyɩ-m yaa Ɛsɔ ɛyɩɣyɩnɩ-m? Ɩmaɣzɩɣ se malakɩ se pɩwɛɛ pɩkɛdɩɣnɩ ɛyáa naa we? Yee me-liu ɛɛwɛ ḿbʋ́ yɔ, mantaakɛnɩ Krɩstʋ tʋmlaɖʋ.
Ɛsɔ lɩzɩ Pɔɔlɩ se ɛpɩsɩ Yesu tiyiyu
11Taabalaa! Mankaɖɩɣ-mɩ se Laŋhɛzɩyɛ Tɔm ndʋ́ monsusuu yɔ, tɩtalɩɩnɩ ɛyáa cɔlɔ. 12Pɩtɛkɛ ɛyʋ nɔɔyʋ kɛdɩnɩ-m-tʋ yaa nɔɔyʋ kpɛlɩkɩnɩ-m-tʋ, ɛlɛ́, Yesu Krɩstʋ maɣmaɣ wɩlɩnɩ-m-tʋ.
13Pɔyɔɔdaa nɛ ɩnɩɩ mbʋ́ malakaɣ alɩwaatʋ ndʋ́ malakaɣ Yuda ñɩma sɔnzɩ yɔ. Tɩ-taa lɛ, maawɛ Ɛsɔ ŋgbɛyɛ taa ñɩma wayɩ kaŋ kaŋ nɛ mañɩnɩɣ se mankʋ patɩŋa. 14Đɔ-ɖɔndɩyɛ taa lɛ, malakaɣ ɖɔ-cɔzɔnaa Yuda ñɩma sɔnzɩ nɛ pɩkɩlɩ ɛyáa sakɩyɛ. Mbʋ́ pʋyɔɔ yɔ, maaɖɔkɩ-sɩ nesi naalɛ kpam. 15Ɛlɛ́, Ɛsɔ ya-m. Pʋcɔ palʋlɩ-m lɛ, ɛɛtɛm-m lɩzʋʋ nɛ ɛlabɩ-m lootiye nɛ ɛya-m se mala ɛ-tʋmɩyɛ. Alɩwaatʋ ndʋ́ pɩmaɣ-ɩ 16se ɛlɩzɩɣ ɛ-Pɩyalʋ ɛwɩlɩ-m nɛ meheyi mbá pɛtɛkɛ Yuda ñɩma yɔ ɛ-Pɩyalʋ ɛnʋ ɛ-tɔm lɛ, mɔntɔpɔzɩ nɔɔyʋ se ɛtasɩ-m tɔm natʋyʋ. 17Montowolo ɖɔɖɔ Yeruusalɛm se mana mbá pɛkɛ Yesu tiyiyaa nɛ pʋcɔ pɩtalɩnɩ-m yɔ. Ɛlɛ́, mɛnɖɛ kpaagbaa mowolo Araabii ɛjaɖɛ taa nɛ pʋcɔ manpɩsɩ Damaasɩ tɛtʋ taa. 18Pɩnzɩ naadozo ɖɛwa lɛ, mowolo Yeruusalɛm nɛ mansɩ Pɩyɛ nɛ ma nɛ ɩ ɖɩcaɣ kɩyakɩŋ hiu nɛ kagbaanzɩ. 19Ɛlɛ́, mantana Yesu tiyiyu nɔɔyʋ nɛ pɩtasɩnɩ ɛ nɛ Yakubu weyi ɛkɛ Kɩpaɣlʋ Yesu neu yɔ. 20Ɛsɔ maɣmaɣ nawa se tɔm ndʋ́ meheyiɣ-mɩ yɔ tɩkɛ toovenim, maacɛtɩɣ-mɩ.
21Mankʋyɩ Yeruusalɛm lɛ, mowolo Siirii nɛ Siliisii pa-ageeta taa. 22Alɩwaatʋ ńdʋ́ tɩ-taa lɛ, Krɩstʋ aŋgba wena awɛ Yudee egeetiye taa yɔ, a-taa ñɩma tasɩmdɩ-m. 23Ɛlɛ́, tɔm kʋɖʋmtʋ ndʋ́ paanɩwa yɔ lɛ se: «Đooo weyi ɛɛwɛ ɖa-wayɩ kaŋ kaŋ yɔ, lɛɛlɛɛyɔ, ɛnʋ susuuni Laŋhɛzɩyɛ Tɔm ndʋ́ ɛñɩnaɣ se eɖezi yɔ.» 24Panɩ mɔn-tɔm ńdʋ́ ḿbʋ́ lɛ, pɛwɛɛ pasaŋ Ɛsɔ mɔ-yɔɔ.
Currently Selected:
Galaatɩ 1: KABI
Highlight
Share
Copy
Want to have your highlights saved across all your devices? Sign up or sign in