Tʋma Labʋ 28
28
Pɔɔlɩ woba Maltɩ lɩm hɛkʋ ɛjaɖɛ taa
1Đɩlɩ cɩŋɩlɩm ḿbʋ́ lɛ, ɖiɖiɣzini se ɛjaɖɛ nɖɩ́ lɩm cɔ-ɖɩ pɩta nɛ payaɣ-ɖɩ se Maltɩ yɔ, ɖɩ-taa ɖɩwɛɛ. 2Đɩ-taa ñɩma kamʋ-ɖʋ ɖeu siŋŋ: paɖʋ miŋ sɔsɔŋ nɩɩyɩ nɛ ɖikpeɣli ɛ-cɔlɔ ɖatɩŋa nɛ ɖihoyuu. Mbʋ́ pʋyɔɔ yɔ, tɛʋ nakʋyʋ kapazɩ nɩʋ nɛ niŋkaɣ wɛɛ. 3Pɩkɛdaa lɛ, Pɔɔlɩ kpaɣ ɖasɩ ñʋʋ nakʋyʋ se ɛɖʋʋ miŋ taa, naze lɛ, pazɩyɛ naɖɩyɛ kɛwɛ kɩ-taa. Miŋ hohou kpa-ɖɩ lɛ, ɖɩlɩɩ nɛ ɖɩñasɩ-ɩ nɛ ɖisusini e-nesi. 4Peeɖe ñɩma na ɖisusini e-nesi ḿbʋ́ lɛ, pɔyɔɔdʋʋ pa-taa pe-ɖeke se: «Abalʋ ɛnɛ, paa pɩɩla ɛzɩma ɛkɛ ɛyáa kʋyʋ, mbʋ́ pʋyɔɔ yɔ, paa pɩlɩzɩ-ɩ teŋgu taa yɔ, Ɛsɔ taɖʋ se ɛtasɩ caɣʋ wezuu.»
5Peeɖe ɛmɩsɩ e-nesi nɛ ɖʋm ɛnʋ ɛlɩɩ ɛtɔlɩ miŋ taa. Ɛlɛ́, pɩtala Pɔɔlɩ nabʋyʋ. 6Ɛyáa ḿbá, paaɖaŋaa se Pɔɔlɩ nesi húú yaa pɩkɛdɩɣ ɛtɔlɩ yem nɛ ɛsɩ. Pʋkɔma pileɖi nɛ paanɩɣ natʋyʋ lɛ, peyele pɔtɔŋ se abalʋ ɛnʋ ɛkɛ ɛsɔ nɔɔyʋ kpem.
7Ɛjaɖɛ nɖɩ́ ɖɩ-taa paawɛ ḿbʋ́ yɔ, ɖɩ-taa wiyaʋ weyi payaɣ se Publiyuusi yɔ, ɛɛwɛnɩ ɖɩɣa nakɛyɛ pʋ-cɔlɔ peeɖe nɛ ɛmʋ-ɖʋ nɛ laŋhʋlʋmɩyɛ nɛ ɖɩsʋʋ ɛ-tɛ kɩyakɩŋ naadozo. 8Alɩwaatʋ ńdʋ́ lɛ, kɩnamɩyɛ nɛ anɩza paakpa wiyaʋ Publiyuusi caa nɛ ɛhɛnɩ. Pɔɔlɩ nɩ ḿbʋ́ lɛ, ɛsʋʋ ɛ-cɔlɔ nɛ ɛtɩnɩ ɛ-yɔɔ nesi nɛ ɛsɛɛ Ɛsɔ nɛ ɛ-yɔɔ cɛ. 9Pɩlabɩ ḿbʋ́ lɛ, Maltɩ ɛjaɖɛ ńɖɩ́ ɖɩ-taa kʋdɔndɩnaa lɛlaa wolo ɖɔɖɔ Pɔɔlɩ cɔlɔ nɛ pɔ-yɔɔ cɛ. 10Pʋ-yɔɔ ɛyáa ɖʋ-ɖʋ hɩɖɛ siŋŋ, ɖɩcaɣaɣ se ɖɩsʋʋ mɛlɛ lɛɛkʋ nɛ ɖɩɖɛɛ lɛ, paha-ɖʋ mbʋ́ pɩtɩŋa pʋpɔzʋʋ-ɖʋ ɖa-nʋmɔʋ ɖɔm taa yɔ.
Pɔɔlɩ talɩ Room
11Fenasɩ naadozo ɖɛwa lɛ, ɖɩsʋʋ Alɛksandrii tɛtʋ taa mɛlɛ ŋgʋ́ payaɣ se Đomaa Ñʋŋ yɔ nɛ ɖɩɖɛɛ. Kɩɩsɩŋ Maltɩ ɛjaɖɛ taa niŋkaɣ alɩwaatʋ taa. 12Đɩtalɩ Siraakuusi lɛ, ɖɩcaɣ kɩyakɩŋ naadozo. 13Đɩkʋyɩ peeɖe lɛ, ɖɩmalɩ kidiiliŋ kpɛɛɛ nɛ ɖiwolo Rejiyoo. Tɛʋ fema lɛ, hadɛ kiŋ heɣlim pazɩ mabʋ nɛ ɖɩɖʋ kɩyakɩŋ naalɛ nɛ pʋcɔ ɖɩtalɩ Puuzɔɔlɩ. 14Peeɖe ɖɩmaɣnɩ taabalaa nabɛyɛ nɛ paba tendi-ɖʋ se ɖa nɛ wɛ ɖɩcaɣ kɩyakɩŋ lʋbɛ. Pʋwayɩ ɖɩkpaɣ nʋmɔʋ nɛ ɖɩɖɛɣ Room. 15Peeɖe taabalaa nɩwa se ɖiwoki lɛ, pa-taa lɛlaa katɩ-ɖʋ Apiyuusi kɩyakʋ taa nɛ lɛlaa ñakatɩ-ɖʋ ɖenɖe payaɣ se Agɔmaa Đɩsɩ Naadozo yɔ. Pɔɔlɩ na-wɛ ḿbʋ́ lɛ, ɛsa Ɛsɔ nɛ ɛkpa ɖoŋ. 16Đɩtalɩ Room lɛ, paha Pɔɔlɩ nʋmɔʋ se ɛ nɛ sɔɔja weyi ɛɖaŋɩɣ ɛ-yɔɔ yɔ, pacaɣnɩ nɖeke.
Pɔɔlɩ susuu Ɛsɔ kewiyaɣ tɔm
17Patalɩ Room nɛ pɩla kɩyakɩŋ naadozo lɛ, Pɔɔlɩ yaa Yuda ñɩma ñʋndɩnaa mbá pɛwɛ peeɖe yɔ ɛ-tɛ. Pekpeɣlaa lɛ, eheyi-wɛ se: «Man-taabalaa! Mantayʋsɩnɩ ɖɛ-ɛjaɖɛ taa ñɩma yaa ɖɔ-cɔzɔnaa sɔnzɩ. Ɛlɛ́, pakpa-m ɖulum Yeruusalɛm nɛ paɖʋzɩ-m Room ñɩma nesi taa. 18Peeɖe pɔpɔzɩ-m tɔm nɛ pɔtɔ se peyeki-m, mbʋ́ pʋyɔɔ yɔ, patana mbʋ́ mayʋsaa nɛ pʋpɔzʋʋ se pakʋ-m yɔ. 19Ɛlɛ́, Yuda ñɩma kizi se pataayebi-m. Ḿbʋ́ labɩna nɛ mɔnpɔzɩ se patanɩ-m Room wiyaʋ sɔsɔ cɔlɔ. Ɛlɛ́, pɩtɛkɛ se mancaɣ mankʋyɩ mɛ-ɛjaɖɛ taa ñɩma yɔɔ. 20Pʋ-yɔɔ maya-mɩ se mɔyɔɔdɩnɩ-mɩ, mbʋ́ pʋyɔɔ yɔ, mbʋ́ Izrɛɛlɩ ñɩma taɣ liu yɔ, pʋ-yɔɔ paɖɩ-m yoŋgbasɩ sɩnɛ.» 21Peeɖe pekitini-i se: «Yudee egeetiye taa tʋ nɔɔyʋ tetiyini-ɖʋ takayaɣ nakɛyɛ ñɔ-tɔm taa. Đa-taabalaa mbá pɛwɛ peeɖe yɔ, wiɖiyi pa-taa nɔɔyʋ tɔkɔɔ ɛkɛdɩ-ɖʋ natʋyʋ yaa eheyi-ɖʋ se ŋlabɩ kɩwɛɛkɩm nabʋyʋ. 22Ɛlɛ́, ɖe-liu wɛɛ se ɖɩnɩɩ ndʋ́ ña-maɣmaɣ ŋmaɣzɩɣ yɔ. Mbʋ́ pʋyɔɔ yɔ, ɖɩnawa se ɛyáa kizi ŋgbɛyɛ nɖɩ́ ŋwɛ ɖɩ-taa yɔ ɖɩ-tɔm paa le.»
23Peeɖe Pɔɔlɩ nɛ ɛyáa ḿbá paɖʋ kɩyakʋ se pakatɩ ɖama. Pɩtalɩ ki-wiye lɛ, powolo sakɩyɛ ɛ-tɛ nɛ ɛkɛdɩ-wɛ Ɛsɔ Kewiyaɣ tɔm wɩsɩ nɛ sikpem: ɛtɩŋaɣnɩ Mooyiizi paɣtʋ nɛ náyaa takayɩsɩ taa tɔm pɔ-yɔɔ nɛ ɛñɩnɩɣ se petisi Yesu tɔm. 24Lɛlaa tisi-tʋ nɛ lɛlaa ñekizi-tʋ. 25Pacaɣaɣ kpem nɛ patanɩɩnɩ ɖama lɛ, Pɔɔlɩ heyi-wɛ tɔm tobi se: «Fezuu Kiɖeɖeu kɛwɛnɩ toovenim alɩwaatʋ ndʋ́ kɩtɩŋnɩ náyʋ Ezaayii yɔɔ nɛ kɩyɔɔdɩnɩ mɩ-cɔzɔnaa yɔ! Kɩyɔɔdɩnɩ-wɛ se:
26‹Wolo ŋheyi ɛjaɖɛ ńɖɩ́ ɖɩ-taa ñɩma se:
pɔkɔŋ welesuu camɩyɛ,
ɛlɛ́, paanɩɣ pʋ-tɔbʋʋ.
Pɔkɔŋ cɔnaʋ camɩyɛ,
ɛlɛ́, paanaɣ.
27Mbʋ́ pʋyɔɔ yɔ, ɛjaɖɛ ńɖɩ́ ɖɩ-taa ñɩma laŋa wɛ kpɩzɩŋ nɛ
pɔtɔ pa-nɩŋgbaaŋ se pataanɩɩ, nɛ
pohuuzi pɛ-ɛsɛ yɔɔ se pataana.
Pataasɔɔlɩ se pana nɛ pɛ-ɛsɛ,
panɩɩ nɛ pa-nɩŋgbaaŋ,
nɛ paɖʋ sɔɔlɩm nɛ panɩɩ pɩ-taa.
Pataasɔɔlɩ se papɩsɩnɩ ma Ɛsɔ mɔ-yɔɔ.
Ḿbʋ́ labɩna mantapɩzɩ mala nɛ pɔ-yɔɔ cɛ.› »
28Pɔɔlɩ tasɩ-wɛ heyuu se pʋwɛɛ se patɩlɩ se mbá pɛtɛkɛ Yuda ñɩma yɔ, ḿbá Ɛsɔ tiyini ñʋʋ yabʋ tɔm tʋnɛ. Paba kɔŋnɩ-tʋ welesuu!
29[Ɛyɔɔdɩ ḿbʋ́ lɛ, Yuda ñɩma kpaɣ nʋmɔʋ ɖɛʋ yɔɔ nɛ pɔhɔŋnɩ ɖama tɔm siŋŋ.] 30Pɔɔlɩ kacaɣ ɖɩɣa ŋgá ɛɛlaba haya yɔ ka-taa pɩnzɩ naalɛ pilim. Ɛmʋwaɣ mbá patɩŋa payɩ powokaɣ ɛ-cɔlɔ yɔ. 31Esusaɣ Ɛsɔ Kewiyaɣ tɔm nɛ ɛwɩlɩɣ ɛyáa Kɩpaɣlʋ Yesu Krɩstʋ tɔm kaalɛyɩtʋ yem fɛɛɛ.
Currently Selected:
Tʋma Labʋ 28: KABI
Highlight
Share
Compare
Copy
Want to have your highlights saved across all your devices? Sign up or sign in
