Room KAJALAƔ TƆM
KAJALAƔ TƆM
Pɔɔlɩ mawaɣ Room Krɩstʋ ñɩma takayaɣ lɛ, ɛtɛzaɣ ɛ-tʋmɩyɛ nʋmɔʋ tozo ñɩŋgʋ. Ɛcaɣaɣ se ɛɖɔ ɛ-nʋmɔʋ nɛ ɛtalɩ Room, ɖenɖe ɛtatɩɩwobida yɔ, nɛ pʋwayɩ lɛ ɛɖɛɛnɩ wɩsɩ ɖɩɖʋyɛ, halɩ ɛtalɩ Ɛspaañɩ ɛjaɖɛ taa nɛ eheyi ɛyáa Ɛsɔtɔm (15.22-24). Pʋyɔɔ ɛma ɛ-takayaɣ Room ñɩma se eheyi-wɛ se ɛkɔŋ nɛ ɛwɩlɩ peeɖe Krɩstʋ ñɩma tɔm kɩbandʋ.
Takayaɣ ŋgá Pɔɔlɩ ma Room ñɩma yɔ, kɔyɔɔdʋʋ ɛ-Laŋhɛzɩyɛ Tɔm kpayɩ kpayɩ. Laŋhɛzɩyɛ Tɔm ńdʋ́, ekpeɣli-tʋ tɔm looyaɣ kanɛ ka-taa: «Ɛyáa mbá pɛwɛnɩ lidaʋ Ɛsɔ yɔɔ yɔ, ḿbá Ɛsɔ ɛnʋ ɛmaɣzɩɣ se pɛkɛ kʋtʋʋzaa, nɛ pe-lidaʋ ŋ́gʋ́ ki-ɖeke kʋɖɔ-ɩ» (1.17).
Pɔɔlɩ yɔɔdʋʋ tɔm tʋnɛ hɔɔlɩŋ naadozo taa:
Kpaɣnɩ ñʋʋ 1 ñɩŋgʋ nɛ pɩsɩɩnɩ 8 ñɩŋgʋ taa, ɛyɔɔdʋʋ taabalɩyɛ nɖɩ́ ɖɩwɛ cooci paɣtʋ yɔɔ ɖɔm nɛ Ɛsɔ yɔɔ lidaʋ wɛnaʋ pɛ-hɛkʋ taa yɔ ɖɩ-tɔm. Ɛsɔ yɔɔ lidaʋ ŋ́gʋ́, Krɩstʋ Yesu haɣnɩ-ɖʋ-kʋ. Room Krɩstʋ ñɩma taa lɛ, mbá pɛtɛkɛ Yuda ñɩma yɔ, ḿbá kɩlɩnɩ ɖɔʋ. Yuda ñɩma ɖɔ Room tɛtʋ taa, ɛlɛ́ pa-taa nabɛyɛ ɖeke pɩsɩnɩ Krɩstʋ ñɩma. Ɛlɛ́, pɔɖɔŋ ɖɔm Yuda ñɩma lɛlaa Ɛsɔ nʋmɔʋ paɣtʋ yɔɔ. Mbá pɛtɛkɛ Yuda ñɩma nɛ papɩsɩ Krɩstʋ ñɩma yɔ, pʋwɛɛ se pɔɖɔ paɣtʋ tʋnɛ tɩ-yɔɔ ɖɔɖɔ yaa we? Tɔm tʋnɛ tɩcɛyɩɣ Krɩstʋ ñɩma aŋgba kɩfana sakɩyɛ. Pɔɔlɩ yɔɔdʋʋ se kedeŋa yɔɔ ɛyáa tɩŋa kɛ kɩwɛɛkɩm laɖaa: Yuda ñɩma nɛ mbá pɛtɛkɛ Yuda ñɩma yɔ. Ŋgʋ́, Ɛsɔ nʋmɔʋ paɣtʋ natʋyʋ fɛyɩ se tɩlɩzɩɣ-ɖʋ kɩwɛɛkɩm taa kpaagbaa kpidi kpidi. Ɛlɛ́ Fezuu Kiɖeɖeu ɖoŋ taa lɛ, Yesu Krɩstʋ pɩzɩɣ ewoni ɛyáa Ɛsɔ cɔlɔ nɛ pehiɣ ñʋʋ yabʋ.
Kpaɣnɩ ñʋʋ 9 ñɩŋgʋ nɛ pɩsɩɩnɩ 11 ñɩŋgʋ yɔɔdʋʋ taabalɩyɛ nɖɩ́ ɖɩwɛ Ɛsɔ samaɣ, Izrɛɛlɩ samaɣ nɛ Krɩstʋ ñɩma pɛ-hɛkʋ taa yɔ ɖɩ-tɔm. Krɩstʋ ñɩma lidaʋ ŋgʋ́ pɛwɛnɩ Ɛsɔ yɔɔ yɔ, kɩwɛnɩ lila Yuda ñɩma tɛtɛɛ ɛzɩ tɩʋ yɔ. Ɛlɛ́, pɩtɛkɛ Yuda ñɩma tɩŋa pɩsɩnɩ Krɩstʋ ñɩma. Pɔɔlɩ yɔɔdʋʋ se Ɛsɔ sɔɔlʋʋ nɛ ɛyaɣ ɛ-samaɣ paa ɖooye. Wiɖiyi samaɣ ŋ́gá, ka nɛ kedeŋa yɔɔ ɛyáa lɛlaa petisiɣ Ɛsɔ camɩyɛ lakasɩ nzɩ́ ɛtɩŋnɩ Yesu Krɩstʋ yɔɔ nɛ ɛwɩlɩ-ɖʋ yɔ sɩ-yɔɔ.
Kpaɣnɩ ñʋʋ 12 ñɩŋgʋ nɛ pɩsɩɩnɩ 15 ñɩŋgʋ yɔɔdʋʋ ɛzɩma pʋwɛɛ se ɛyáa ɩcaɣ camɩyɛ Krɩstʋ ñɩma ŋgbɛyɛ taa yɔ pʋ-tɔm. Pɔɔlɩ kɛdɩɣ ɛzɩma pʋwɛɛ se ɖɩsɛɛ Ɛsɔ nɛ ɖa nɛ lɛlaa ɖɩwɛɛ leleŋ yɔ pʋ-tɔm. Eheyiɣ mbá pe-lidaʋ Ɛsɔ yɔɔ paɣlaa yɔ se panɩɩnɩ mbá paba ñɩŋgʋ tapaɣlɩ yɔ. Ɛsɔ kaɣ ɛyáa tɩŋa lɩzʋʋ kɩdɛkɛdɩm nɛ sɩm taa. Peeɖe lɛ, papɩzɩɣ pɛkpɛndɩ nɛ pɛwɛɛ, nɛ Fezuu Kiɖeɖeu ɖoŋ taa lɛ, pa nɛ Krɩstʋ papɩsɩ kʋɖʋm.
Takayaɣ ŋgá Pɔɔlɩ ma Room ñɩma yɔ, kɛtɛzɩɣnɩ sɛtʋ sakɩyɛ (ñʋʋ 16 ñɩŋgʋ). Pɔyɔɔdʋʋ ka-taa abalaa nɛ halaa tɔm sakɩyɛ. Ḿbʋ́ wɩlɩɣna se ɖooo kiɖe tɛɛ Krɩstʋ ñɩma nɛ sɔnɔ ñɩma papɩsɩ ɛyáa kʋɖʋmaa.
Currently Selected:
Room KAJALAƔ TƆM: KABI
Highlight
Share
Compare
Copy
Want to have your highlights saved across all your devices? Sign up or sign in