Tʋma Labʋ 27

Powoni Pɔɔlɩ Room

1Pɩkɛdaa lɛ, paɖʋ se ɖɩsʋʋ mɛlɛ Sezaaree nɛ ɖiwolo Itaalii. Peeɖe pakpaɣ Pɔɔlɩ nɛ salaka tɩnaa lɛlaa nabɛyɛ nɛ paɖʋzɩ sɔɔja sɔsɔ weyi payaɣ se Yuliyuusi yɔ e-nesi taa. Ɛkɛ sɔɔjanaa tikaɣ ŋgá payaɣ se: Ogustɩ sɔɔjanaa yɔ, pa-ñʋndɩnaa taa lɛlʋ. 2Ɛlɛ́, ɖa nɛ wɛ ɖɩsʋʋ Adramiiti tɛtʋ taa mɛlɛ nɛ ɖɩɖɛɛ, kuwokaɣ Aazii egeetiye taa mɛlɛnaa ɖɩsɩŋɩyɛ ndɩ ndɩ taa. Đa nɛ Masedonii tʋ Aristaarkɩ weyi ɛ-tɛ Tesalooniki tɛtʋ taa yɔ ɖɩɩsʋnɩ-kʋ. 3Kifema lɛ, ɖɩtalɩ Sidɔɔ nɛ Yuliyuusi liu wɛɛ se ɛla Pɔɔlɩ camɩyɛ. Pʋ-yɔɔ ɛha-ɩ nʋmɔʋ se ewolo ɛna ɛ-ɛgbaɣdɩnaa nɛ paha-ɩ mbʋ́ pʋpɔzʋʋ-ɩ yɔ. 4Đɩkʋyɩ peeɖe lɛ, heɣlim makaɣ tuliŋa nɛ pɩcɛyɩɣ-ɖʋ. Pʋyɔɔ ɖɩtɩŋnɩ Ciiprɩ ɛjaɖɛ teŋgu hɔɔlʋʋ ŋgʋ́ kɩ-taa pɩsaŋaɣ ɖɔm yɔ nɛ ɖɩɖɛɛ. 5Đɩkɔm ɖɩɖɛɛ Siliisii nɛ Pamfilii pa-ageeta yɔɔ lɛ, ɖɩtalɩ Miiraa tɛtʋ ndʋ́ tɩwɛ Liisii ñɩnɖɛ taa yɔ tɩ-taa. 6Peeɖe sɔɔja sɔsɔ ɛnʋ ɛna mɛlɛ ŋgʋ́ kɩlɩnɩ Alɛksandrii nɛ kuwoki Itaalii yɔ nɛ ɛsʋzɩ-ɖʋ-kʋ.

7Heɣlim cɛyaɣ-ɖʋ pɩtɩɩfɛyɩ nɛ ɖɩla hɛɛɛ hɛɛɛ kɩyakɩŋ sakɩyɛ ɖa-nʋmɔʋ ɖɔm taa teŋgu yɔɔ nɛ ɖɩtɔɔ kʋñɔŋ siŋŋ nɛ pʋcɔ ɖɩkɔɔ ɖɩtalɩ Kiniidi. Pɩcɛyaɣ-ɖʋ ḿbʋ́ lɛ, ɖiyele ɖɩtɩŋnɩ Salmonee nɛ ɖɩmalɩ Krɛɛtɩ ɛjaɖɛ nɛ hadɛ kiŋ. 8Đɩlabɩ kʋñɔŋ ḿbʋ́ nɛ pʋcɔ ɖɩtalɩ ɖɩsɩŋ ɖenɖe payaɣ se Mɛlɛnaa Đɩsɩŋɩyɛ Kɩbanɖɛ yɔ Laasee tɛtʋ cɔlɔ.

9Điilesi alɩwaatʋ sakɩyɛ ɖa-nʋmɔʋ ɖɔm ḿbʋ́ pɩ-taa nɛ teŋgu yɔɔ ɖɔm ñɛwɛɛ sɔɔndʋ. Mbʋ́ pʋyɔɔ yɔ, pɩɩkɛ yolim taa: nɔɔ hɔkʋʋ kɛtɛm ɖɛʋ. Pʋ-yɔɔ Pɔɔlɩ paɣ́ mɛlɛ taa ñɩma se: 10«Taabalaa! Manaɣ se ɖa-nʋmɔʋ ŋ́gʋ́ kʋwɛɣ kaɖɛ, yee ɖɩtakpa ɖa-tɩ yɔ, mɛlɛ kʋnɛ nɛ kɩ-taa wondu sakɩyɛ pɔkɔŋ wɛɛkʋʋ, halɩ ɖa-maɣmaɣ ɖɩpɩzɩɣ ɖifeti wezuu.» 11Ɛlɛ́, Room sɔɔja sɔsɔ ɛnʋ, ɛɛwɛnɩ lidaʋ mɛlɛ sayʋ nɛ kʋ-tʋ pɔ-yɔɔ nɛ pɩkɩlɩ ndʋ́ Pɔɔlɩ yɔɔdaa yɔ. 12Đɔɖɔ lɛ, mɛlɛnaa ɖɩsɩŋɩyɛ taawɛɛ ɖeu se ɛyáa ɛcaɣ niŋkaɣ alɩwaatʋ. Pʋ-yɔɔ mbá paawɛ kɩ-taa yɔ, pa-taa sakɩyɛ tisaa se pakʋyɩ peeɖe nɛ pɛɖɛɛ. Mbʋ́ pʋyɔɔ yɔ, pacaɣaɣ se pʋwɛ ɛzɩma yɔ, paatalɩ Krɛɛtɩ mɛlɛnaa ɖɩsɩŋɩyɛ nɖɩ́ payaɣ se Feniksɩ yɔ ɖɩ-taa. Đɩha ɛsɛ nɛ hadɛ kiŋ wɩsɩ ɖɩɖʋyɛ nɛ hayo kiŋ wɩsɩ ɖɩɖʋyɛ pɔ-hɔɔlʋʋ taa. Peeɖe ɛyáa pɩzɩɣ pacaɣ niŋkaɣ alɩwaatʋ.

Teŋgu yɔɔ heɣlim sɔsɔm tɔm

13Mɛlɛ sɩŋ ḿbʋ́ nɛ pɩkɛdɩ lɛ, heɣlim nabʋyʋ lɩɩnɩ hadɛ kiŋ nɛ pɩmakɩ fɛlɛ fɛlɛ nɛ kɩ-taa ñɩma maɣzɩ se pɩpɩzɩɣ pɩsɩnɩ-wɛ nɛ pala mbʋ́ paaɖʋwa yɔ. Peeɖe pɛkpɛzɩ ñɩ́ɣ́yʋ́ʋ ŋgʋ́ paakamnɩ-kʋ yɔ nɛ pamalɩ Krɛɛtɩ kidiiliŋ kpɛɛɛ nɛ pɛɖɛɣ. 14Pɩtala pʋyʋ lɛ, heɣlim sɔsɔm mbʋ́ payaɣ se Eraakɩlɔɔ yɔ, pɩlɩɩnɩ hayo kiŋ nɛ pɩmakɩ ɖoŋ 15nɛ pɩkpɛndɩnɩ ɖa nɛ mɛlɛ ŋ́gʋ́ nɛ pɩɖɛɣna. Nabʋyʋ taapɩzɩɣ se pɩkpa-kʋ kpem nɛ ɖɩtɛzɩ ɖa-tɩ yebu nɛ pɩɖɛnɩ-ɖʋ. 16Peeɖe ɖɩtɩŋnɩ ɛjaɖɛ cikpeɖe nɖɩ́ lɩm cɔ-ɖɩ pɩta nɛ payaɣ-ɖɩ se Koodaa yɔ ɖɩ-hadɛ kiŋ nɛ ɖɩhɛzɩnɩ heɣlim pazɩ. Halɩ ɖɩɩlaba kʋñɔŋ siŋŋ nɛ pʋcɔ ɖɩlɩzɩ kpɩyʋʋ cikpeluu ŋgʋ́ palɩzɩɣnɩ ɛyáa yɔ. 17Peeɖe mɛlɛ taa tʋmlaɖaa pɩsɩnɩ-kʋ mɛlɛ taa. Pʋwayɩ lɛ, pɔhɔkɩ mɛlɛ ŋ́gʋ́ nimee kpam. Sɔɔndʋ kpaɣaɣ-wɛ se pataawolo pakpa Liibii kidiiliŋ kañɩŋa huwa yɔɔ. Pʋ-yɔɔ petisi pɩsaʋ sɔsɔʋ ŋgʋ́ popuzuu se heɣlim ɛsʋʋ yɔ. Ḿbʋ́ piyebi mɛlɛ nɛ kɩɖɛɣ. 18Heɣlim kɛwɛ mabʋ yɔɔ nɛ pʋcɔzʋʋ-ɖʋ pɩŋŋ. Ḿbʋ́ labɩna nɛ tɛʋ fema lɛ, papazɩ mɛlɛ taa wondu lɩzʋʋ nɛ pɔlɔʋ teŋgu taa. 19Tozo wiye lɛ, pa-maɣmaɣ pɛyɛɖɩ mɛlɛ yɔɔ wondu nɛ pɔlɔʋ. 20Pɩɩlabɩ kɩyakɩŋ sakɩyɛ, wɩsɩ nɛ tɩɩnzɩ patalɩɩ. Ɛlɛ́, heɣlim ḿbʋ́ pʋwɛnɩ pɩmakɩ ɖoŋ ḿbʋ́ nɛ ɖɩtɛzɩ lɔʋ liu se ɖɔ-tɔm tɛma.

21Pileɖaa yɔ, pa-taa nɔɔyʋ takpazɩ pʋyʋ nɛ ɛ-nɔɔ. Alɩwaatʋ ńdʋ́ʋ́ Pɔɔlɩ kʋyaa ɛsɩŋ pɛ-ɛsɩndaa nɛ eheyi-wɛ se: «Taabalaa! Yee ɩɩnɩnɩ-m nɛ ɖɩcaɣ Krɛɛtɩ yɔ, ɖɩtaasʋʋ asayʋʋ kʋnɛ kɩ-taa nɛ ɖilesi wondu ɛzʋnɔ. 22Lɛɛlɛɛyɔ, mansazɩɣ-mɩ se ɩɖɔkɩ mɩ-tɩ kpam. Mbʋ́ pʋyɔɔ yɔ, mɩ-taa nɔɔyʋ eelesiɣ e-wezuu. Ɛlɛ́, mɛlɛ ɖeke kɔŋnɩ labʋ asayʋʋ. 23Ɛsɔ weyi ɛtɩnɩ-m nɛ moluŋuu ɛ-tɛɛ yɔ, etiyi e-tiyiyu mɔn-cɔlɔ ɖoó ana a-taa 24nɛ eheyi-m se: ‹Pɔɔlɩ! Sɔɔndʋ ɛtaakpa-ŋ. Pʋwɛɛ se ŋwolo Room wiyaʋ sɔsɔ cɔlɔ. Ɛsɔ lakɩ-ŋ lootiye nɛ pɩtɩŋnɩ ñɔ-yɔɔ nɛ pʋyʋ ɛɛlakɩ ña nɛ mbá ɩɖɔŋ yɔ pa-taa nɔɔyʋ.› 25Taabalaa! Pʋ-yɔɔ meheyiɣ-mɩ se ɩɖɔkɩ mɩ-tɩ kpam, mbʋ́ pʋyɔɔ yɔ, mantaɣ Ɛsɔ liu se ndʋ́ ɛyɔɔdaa yɔ, tɩlakɩ ḿbʋ́. 26Ɛlɛ́, pʋkɔŋ-ɖʋ lɩzʋʋ nɛ pʋlɔ ajɛya cikpena wena lɩm cɔ-yɛ pɩta yɔ a-taa naɖɩyɛ kidiiliŋ yɔɔ.»

27Pɩlabɩ ɖoó hiu nɛ naanza yɔ, ɖɩwɛʋ Mediteraanee teŋgu yɔɔ nɛ heɣlim cɔzʋʋ-ɖʋ ḿbʋ́ yɔ. Pʋkɔma ɛzɩ ɖoó hɛkʋ yɔ lɛ, pɩla mɛlɛ taa tʋmlaɖaa ɛzɩ ɖɩñɔtɩnɩ tɛtʋ natʋyʋ yɔ. 28Ɛlɛ́, pakpaɣ nimaɣ ŋgá pamaɣzɩɣnɩ lɩm yɔ nɛ pɛpɛɖɩ pɩ-taa se pamaɣzɩ-pʋ. Peeɖe peɖiɣzinaa se pu-cukaŋ taa wɛ ɛzɩ haŋ nɩɩlɛ yɔ. Patasɩ wobu ɛsɩndaa pazɩ lɛ, patasɩ maɣzʋʋ ḿbʋ́ nɛ pana haŋ hiu nɛ kagbaanzɩ. 29Sɔɔndʋ kpaɣaɣ-wɛ se mɛlɛ ɛtaakɔɔ kuyoni ɛwasɩ nasɩyɩ. Pʋ-yɔɔ petisi ñɩɣtʋ ndʋ́ pasɩzɩɣnɩ mɛlɛnaa yɔ naanza mɛlɛ wayɩ nɛ pacaɣnɩ pɛ-ɛsɛ nɛ paɖaŋ kpam se tɛʋ efe. 30Mɛlɛ taa tʋmlaɖaa ñɩnaɣ se pese. Pʋ-yɔɔ petisi kpɩyʋʋ ŋgʋ́ palɩzɩɣnɩ ɛyáa yɔ nɛ pɛcɛtɩ se powoki petisi ndʋ́ tʋtʋ wɛ ɛsɩndaa yɔ. 31Peeɖe Pɔɔlɩ heyi Room sɔɔja sɔsɔ nɛ sɔɔjanaa lɛlaa se: «Yee ɛyáa ḿbá patacaɣ mɛlɛ taa cɩnɛ yɔ, ɩɩpɩzɩɣ ihiɣ ñʋʋ yabʋ.»

32Ɛyɔɔdɩ ḿbʋ́ lɛ, sɔɔjanaa wolo pɛsɛtɩ kpɩyʋʋ nimee nɛ peyebi-kʋ kɩɖɛɛ.

33Paawɛ peeɖe ḿbʋ́ nɛ tɛʋ wɩzɩ fem lɛ, Pɔɔlɩ sazɩ patɩŋa se pɔtɔɔ tɔɔnaɣ, eheyaɣ-wɛ se: «Pɩlabɩ kɩyakɩŋ hiu nɛ naanza yɔ, ɩwɛ ɖaŋʋʋ yɔɔ nɛ ɩtɔtɔɔ pʋyʋ. 34Pʋ-yɔɔ lɛ, meheyiɣ-mɩ se ɩtɔɔ tɔɔnaɣ. Mbʋ́ pʋyɔɔ yɔ, pʋwɛɛ se ɩtɔɔ nɛ ihiɣ wezuu, mɩ-taa nɔɔyʋ ɛɛkaɣ lesuu ɛ-ñʋʋ taa ñɔyaɣ maɣmaɣ.»

35Pɔɔlɩ tɛm yɔɔdʋʋ ḿbʋ́ lɛ, ɛkpaɣ tindine nɛ ɛsɛɛ ɖɩ-yɔɔ Ɛsɔ patɩŋa pɛ-ɛsɩndaa nɛ ɛcɩyɩ-ɖɩ nɛ ɛpazɩ tɔɔʋ. 36Peeɖe pɩlabɩ mɛlɛ taa ɛyáa tɩŋa hʋnʋm nɛ pɔtɔɔ ɖɔɖɔ. 37Mbá ɖa ɖɩɩwɛ mɛlɛ ŋ́gʋ́ kɩ-taa yɔ, ɖɩɩkpɛndɩ ɛyáa nasɩlɛ nɛ nɩɩnʋwa nɛ nɩɩlɛ nɛ loɖo. 38Pɛtɛm tɔɔʋ nɛ pahaɣ lɛ, papazɩ lɩzʋʋ mɩla nɛ pɔlɔʋ teŋgu taa se mɛlɛ ɛtaakɩlɩ yuŋ.

Mɛlɛ taa ɛyáa tɩŋa hiɣ ñʋʋ yabʋ

39Tɛʋ fema lɛ, mɛlɛ taa ñɩma ɛɛsɩŋ ɛjaɖɛ nɖɩ́ pɔñɔtɩnaa yɔ. Ɛlɛ́, polosuu kidiiliŋ sɔsɔʋ nakʋyʋ kotaaa, kʋ-yɔɔ nɛ kañɩŋa nɛ paɖʋ se yee papɩzɩɣ yɔ, powoni mɛlɛ peeɖe nɛ kɩkaɖɩnɩ-kɛ. 40Pʋ-yɔɔ pɛyɛɖɩ ñɩɣtʋ nɛ peyebi-tʋ teŋgu taa nɛ pɛyɛɖɩ ɖɔɖɔ nimee wena paahɔkɩnɩ ɖaŋ weyi pasaɣnɩ mɛlɛ yɔ. Pʋwayɩ lɛ, pata pɩsaʋ cikpeluu ŋgʋ́ kɩwɛɣ mɛlɛ ɛsɩndaa yɔ nɛ pakpazɩ se heɣlim eketi-kʋ nɛ puwoni kidiiliŋ cɔlɔ. 41Ɛlɛ́, puwoni-kʋ nɛ puyoni kañɩŋa huuye naɖɩyɛ nɛ kʋ-nɔɔ sʋʋ ka-taa nɛ pɩfɛyɩ ciɣduu nɛ lɩm hola sɔsɔna ñɛpɛlɩ-kʋ nɛ wayɩ.

42Peeɖe sɔɔjanaa nɩnɩ ɖama se pakʋ salaka tɩnaa nɛ pa-taa nɔɔyʋ ɛtaaya lɩm nɛ ɛtʋlɩ. 43Ɛlɛ́, Room sɔɔja sɔsɔ kizini-wɛ, mbʋ́ pʋyɔɔ yɔ, e-liu wɛɛ se ɛya Pɔɔlɩ ñʋʋ. Peeɖe ɛha nɔɔ se mbá pasɩm lɩm yaʋ yɔ, pacalɩ falʋʋ pɩ-taa nɛ paya nɛ palɩɩ kidiiliŋ yɔɔ 44nɛ piyele lɛlaa ñɔñɔkɔyɩnɩ kpoŋgbolonaa yaa mɛlɛ hɔɔlasɩ nɛ patɩŋ pa-wayɩ. Ḿbʋ́ ɖɔɖɔ palaba nɛ patɩŋa payɩ palɩɩ kidiiliŋ yɔɔ, pɩtacɩdɩlɩ nɔɔyʋ.

Currently Selected:

Tʋma Labʋ 27: KABI

Highlight

Compare

Copy