Tʋma Labʋ 26

Pɔɔlɩ hʋ ɛ-tɔm wiyaʋ Agriipaa ɛsɩndaa

1Fɛstuusi tɛm yɔɔdʋʋ ḿbʋ́ lɛ, Agriipaa heyi Pɔɔlɩ se: «Lɛɛlɛɛyɔ, paha-ŋ nʋmɔʋ, yɔɔdɩ ñɔ-tɔm lɛ.» Peeɖe ɛ́lɛ́ kpazɩ nesi nɛ ɛpazɩ yɔɔdʋʋ se: 2«Wiyaʋ Agriipaa! Sɔnɔ pɩlabɩ-m leleŋ pɩŋŋ se mɔyɔɔdʋʋ kʋyʋʋ mbʋ́ pɩtɩŋa payɩ Yuda ñɩma kʋyʋʋ mɔ-yɔɔ yɔ pʋ-tɔm ñɛ-ɛsɩndaa. 3Mbʋ́ pʋyɔɔ yɔ, ŋsɩm Yuda ñɩma sɔnzɩ tɩŋa siŋŋ nɛ mbʋ́ pʋ-tɔm pɔyɔɔdʋʋ yɔ. Pʋ-yɔɔ lɛ, monkuluu-ŋ hulaɣ se ŋɖɔkɩ ñɔ-hɔyɛ nɛ ŋwelesi mɔn-tɔm.

4Yuda ñɩma tɩŋa sɩm mbʋ́ mɛnkɛ ɖooo me-evebutu taa yɔ. Pasɩm ɖɔɖɔ ɛzɩma mbʋ́ maacaɣ wezuu Yeruusalɛm mɛ-ɛjaɖɛ taa ñɩma hɛkʋ taa yɔ. 5Pasɩm-m ɖooo lɔŋ, yee petisiɣ yɔ, papɩzɩɣ palɩzɩ aseɣɖe se maakɛ Farɩsɩ ñɩma ŋgbɛyɛ taa tʋ. Maaɖɔm ɖɩ-taa sɔnzɩ yɔɔ. Ńzɩ́ kɩlɩnɩ kaɖɛ ɖɛ-Ɛsɔ sam taa. 6Lɛɛlɛɛyɔ, pahʋʋnɩ-m tɔm. Mbʋ́ pʋyɔɔ yɔ, mantaɣ liu mbʋ́ Ɛsɔ heyi ɖɔ-cɔzɔnaa se ɛlakɩ yɔ. 7Đɛ-ɛjaɖɛ taa cejewee hiu nɛ naalɛ taa ñɩma taɣ liu se panaɣ mbʋ́ Ɛsɔ heyi ɖɔ-cɔzɔnaa se ɛlakɩ yɔ. Pʋ-yɔɔ pɛwɛɛ poluŋuu Ɛsɔ tɛɛ wɩsɩ nɛ ɖoó. Wiyaʋ! Liu taʋ ḿbʋ́, pʋ-yɔɔ Yuda ñɩma kʋyʋʋ mɔ-yɔɔ. 8Pɩlabɩ ɛzɩma ɩmaɣzɩɣ se Ɛsɔ ɛɛpɩzɩɣ efezi sɩɖaa yɔ?

9Ma lɛ, maamaɣzaa se manɖɩkɩ nʋmɔŋ tɩŋa payɩ nɛ nɔɔyʋ ɛtaatasɩ yaʋ Nazarɛɛtɩ tʋ Yesu hɩɖɛ. 10Ḿbʋ́ malabɩ Yeruusalɛm nɛ cɔjɔnaa sɔsaa ha-m nʋmɔʋ nɛ ma-maɣmaɣ mankpa Yesu ñɩma sakɩyɛ nɛ manɖʋ-wɛ salaka. Pɔtɔm se pakʋʋ-wɛ lɛ, mentisi. 11Maawɛɛ mɔhɔŋ pa-nɩŋgbaaŋ Yuda ñɩma Ɛsɔ ɖɩsɛyɛ tɩŋa payɩ taa paa ɖooye. Malakaɣ-wɛ ḿbʋ́ se pɔyɔɔdɩ ɛzaɣ́tʋ tɔm pe-lidaʋ wɛnaʋ yɔɔ. Man-pana kakpanɩ-wɛ pɩtɩɩfɛyɩ nɛ mɛwɛɛ pa-wayɩ kaŋ kaŋ ḿbʋ́ nɛ halɩ pɩkpɛndɩnɩ ajɛya lɛɛna tɛtʋ taa.»

Pɔɔlɩ kɛdɩɣ wiyaʋ Agriipaa ɛzɩma Kɩpaɣlʋ ya-ɩ yɔ

(Tʋma 9.1-19; 22.6-16)

12Pɔɔlɩ tasɩ yɔɔdʋʋ se: «Pʋ-yɔɔ cɔjɔnaa sɔsaa kɛcɛlɩ-m takayaɣ nɛ paha-m nʋmɔʋ nakʋyʋ wiye se mowolo Damaasɩ. 13Wiyaʋ! Mɛwɛ nʋmɔʋ ŋ́gʋ́ kɩ-taa nɛ pʋkɔɔ ɛzɩ wɩsɩ siɣu yɔ lɛ, mana ñalɩmɩyɛ naɖɩyɛ lɩnɩ ɛsɔdaa yem nɛ ɖɩñalɩ ma nɛ man-taabalaa ɖɔ-yɔɔ ñammm. Ñalɩmɩyɛ ńɖɩ́, ɖɩɩkɩlɩ wɩsɩ ñalɩmɩyɛ ɖoŋ. 14Peeɖe ɖatɩŋa payɩ ɖɩtɔlɩ tataa nɛ manɩɣ pʋyɔɔdʋʋnɩ-m nɛ ɖɛ-tɛ Ebree taa se: ‹Sɔɔlɩ! Sɔɔlɩ! Pɩlabɩ ɛzɩma nɛ ŋwɛɛ ma-wayɩ kaŋ kaŋ nɛ ŋɖʋʋ ña-tɩ kʋñɔŋ nɛ ña-nɩŋgbaaŋ ɖoŋ ḿbʋ́?› 15Peeɖe mɔnpɔzaa se: ‹Kɩpaɣlʋ! Ña anɩ?› Ɛlɛ́, ecosi-m se: ‹Ma Yesu weyi ŋwɛ ɛ-wayɩ kaŋ kaŋ yɔ. 16Lɛɛlɛɛyɔ, kʋyɩ ŋsɩŋ. Mbʋ́ pʋyɔɔ yɔ, malɩzɩ man-tɩ mawɩlɩ-ŋ se ŋpɩsɩ man-tʋmlaɖʋ nɛ ŋcɔɔ ŋheyi lɛlaa ɛzɩma mbʋ́ ŋna-m sɔnɔ yɔ nɛ ŋkɛdɩ-wɛ mbʋ́ mbʋ́ mantasɩɣ-ŋ wɩlʋʋ yɔ. 17Ñɛ-tɛ Yuda ñɩma nɛ mbá pɛtɛkɛ Yuda ñɩma yɔ pa-taa malɩzɩ-ŋ nɛ mentiyi-ŋ mbá pɛtɛkɛ Yuda ñɩma yɔ pɔ-cɔlɔ. 18Mentiyiɣ-ŋ se ŋwolo ŋkuli pɛ-ɛsɛ nɛ ŋlɩzɩ-wɛ cɩkpɛndʋʋ taa nɛ ŋwoni-wɛ ñalɩmɩyɛ taa. Lɩzɩ-wɛ ɖɔɖɔ Satanɩ nesi taa nɛ ŋwoni-wɛ Ɛsɔ cɔlɔ. Yee pɛwɛnɩ lidaʋ mɔ-yɔɔ lɛ, Ɛsɔ kpeɣ-wɛ pa-kɩwɛɛkɩm nɛ ɛha-wɛ ñɩm mbʋ́ ɛsɩwa se ɛhaɣ ɛ-ñɩma yɔ.› »

Pɔɔlɩ kɛdɩɣ tʋmɩyɛ nɖɩ́ ɛlaba kpaɣnɩ Damaasɩ yɔ

19«Pʋ-yɔɔ lɛ, wiyaʋ Agriipaa! Mentekizi mbʋ́ Kɩpaɣlʋ wɩlɩ-m nɛ ɛsɔdaa yɔ. 20Ɛlɛ́, Damaasɩ ñɩma manpazɩnɩ Ɛsɔtɔm susuu. Pʋwayɩ lɛ, monsusi-tʋ ɖɔɖɔ Yeruusalɛm ñɩma nɛ Yudee egeetiye taa ñɩma tɩŋa nɛ ajɛya lɛɛna taa ñɩma. Meheyi-wɛ se pɛlɛɣzɩ wɛtʋ nɛ papɩsɩnɩ Ɛsɔ yɔɔ nɛ pala mbʋ́ pɩwɩlɩɣ se toovenim pɛlɛɣzɩ wɛtʋ yɔ. 21Tɔm tʋnɛ tɩ-yɔɔ Yuda ñɩma kpa-m Ɛsɔ ɖɩɣa taa se pakʋʋ-m. 22Ɛlɛ́, Ɛsɔ huuzi mɔ-yɔɔ nɛ pʋkɔɔ pɩtalɩnɩ sɔnɔ nɛ mɛwɛɛ malɩzɩɣ sɔsaa nɛ piya patɩŋa payɩ tɔm ndʋ́ náyaa nɛ Mooyiizi pɔyɔɔdaa se tɩkɔŋ labʋ kpem yɔ tɩ-aseɣɖe. Maayɔɔdʋʋ natʋyʋ nɛ pɩtasɩnɩ-tʋ. 23Ńdʋ́ lɛ se: ‹Weyi Ɛsɔ Lɩzaa Yɔ, ɛkɔŋ siziŋ nɩʋ nɛ ɛsɩ. Ɛnʋ calɩɣnɩ fem nɛ ɛlɩɩnɩ sɩɖaa taa nɛ ɛkɛdɩ Yuda ñɩma nɛ mbá pɛtɛkɛ Yuda ñɩma yɔ ñalɩmɩyɛ tɔm.› »

Pɔɔlɩ heyiɣ ɛyáa se pɛwɛnɩ lidaʋ Yesu yɔɔ ɛzɩ ɛnʋ yɔ

24Pɔɔlɩ yɔɔdaɣ ḿbʋ́ lɛ, wiyaʋ sɔsɔ Fɛstuusi holini-i se: «Pɔɔlɩ ŋsʋ kpaaŋ! Ŋkɩlɩ kpɛlɩkʋʋ pʋɖɔɔ nɛ pʋsʋzɩ-ŋ kpaaŋ!» 25Peeɖe ɛ́lɛ́ cosi-i se: «Đajaa! Mantasʋʋ kpaaŋ nakʋyʋ, ɛlɛ́, tɔm ndʋ́ mɔyɔɔdʋʋ yɔ, tɩkɛ tɔm kɩbandʋ nɛ toovenim tɔm siŋŋ. 26Wiyaʋ Agriipaa kɛtɛm nɩʋ mbʋ́ pɩtɩŋa pɩlaba yɔ. Pʋ-yɔɔ lɛ, manpɩzɩɣ mɔyɔɔdɩ ɛ-ɛsɩndaa yem faaa. Manawa se ɛnɩ tɔm ńdʋ́ tɩtɩŋa payɩ. Mbʋ́ pʋyɔɔ yɔ, tɩtala mɛsaɣ tɛɛ kʋlɔmʋʋ nakʋyʋ taa. 27Wiyaʋ Agriipaa! Ŋtisiɣ tɔm ndʋ́ náyaa yɔɔdaa yɔ yaa we? Manawa se ŋtisaa!» 28Peeɖe Agriipaa pɩsɩnɩ-ɩ se: «Ŋcaɣ se manpɩsɩ Krɩstʋ tʋ lɛɛlɛɛyɔ lɛɛlɛɛyɔ yaa we?» 29Pɔɔlɩ cosi-i se: «Paa lɛɛlɛɛyɔ lɛɛlɛɛyɔ yaa ɛzɩmtaa yɔ, mentendiɣ Ɛsɔ se ña nɛ mbá ɩwɛ cɩnɛ nɛ iwelesiɣ mɔn-tɔm sɔnɔ yɔ, mɩtɩŋa payɩ ɩpɩsɩ ɖɔɖɔ ɛzɩ ma yɔ nɛ pɩsɛɣ yoŋgbasɩ sɩnɛ si-ɖeke!» 30Peeɖe wiyaʋ Agriipaa nɛ ɛ-halʋ Bereniisi nɛ wiyaʋ sɔsɔ Fɛstuusi nɛ mbá paawɛ peeɖe yɔ, pakʋyaa 31pɛkɛzɩ pa-tɩ kɩjaʋ nɛ pɔyɔɔdʋʋ pa-taa pe-ɖeke se: «Abalʋ ɛnɛ, ɛtala kɩwɛɛkɩm mbʋ́ pʋpɔzʋʋ se pakʋ-ɩ yaa paɖʋ-ɩ salaka yɔ.» 32Peeɖe Agriipaa heyi Fɛstuusi se: «Yee abalʋ ɛnɛ ɛtaapɔzɩ se patanɩ-ɩ Room wiyaʋ sɔsɔ cɔlɔ yɔ, paayebi-i!»

Currently Selected:

Tʋma Labʋ 26: KABI

Highlight

Compare

Copy