Tʋma Labʋ 25
25
Powoni Pɔɔlɩ wiyaʋ sɔsɔ Fɛstuusi cɔlɔ
1Fɛstuusi kɔm Sezaaree egeetiye taa nɛ pɩla kɩyakɩŋ naadozo lɛ, ɛkʋyɩ nɛ ewolo Yeruusalɛm. 2Peeɖe cɔjɔnaa sɔsaa nɛ ɛjaɖɛ ñʋndɩnaa pakʋyaa nɛ powoni Pɔɔlɩ tɔm ɛ-cɔlɔ nɛ pɔpɔzɩ-ɩ se 3ɛlabɩ-wɛ lootiye nɛ ɛha-wɛ nʋmɔʋ nɛ pakpaɣ-ɩ nɛ powoni Yeruusalɛm peeɖe. Paatam nɔɔ se yee pɩlabɩ ḿbʋ́ yɔ, pakʋ-ɩ nʋmɔʋ taa. 4Fɛstuusi cosi-wɛ se Pɔɔlɩ wɛ salaka taa Sezaaree. Ɛlɛ́, ɛ-maɣmaɣ ɛpɩsɩɣ peeɖe alɩwaatʋ tʋnɛ tɩ-taa. 5Ɛtasɩ-wɛ heyuu se yee Pɔɔlɩ ɛlabɩ kɩwɛɛkɩm nabʋyʋ yɔ, ɛ nɛ pa-taa sɔsaa powolo Sezaaree nɛ pakʋyɩ ɛ-yɔɔ.
6Fɛstuusi caɣ Yeruusalɛm peeɖe ɛzɩ kɩyakɩŋ lutozo yaa hiu yɔ lɛ, ɛpɩsɩ Sezaaree. Tɛʋ fema lɛ, ewolo ɛcaɣ tɔm ɖɩhʋyɛ nɛ etiyi se powoni Pɔɔlɩ. 7Pɔkɔnɩ-ɩ lɛ, Yuda ñɩma mbá paalɩnɩ Yeruusalɛm nɛ powolo yɔ, pɔcɔɔ-ɩ pata nɛ pakʋyɩ ɛ-yɔɔ siŋŋ nɛ tɔm sɔsɔtʋ. Ŋgʋ́, pa-maɣmaɣ pataapɩzɩɣ se pɔyɔɔdɩ nɛ pawɩlɩ se ndʋ́ pɔyɔɔdʋʋ yɔ tɩkɛ toovenim. 8Ɛlɛ́, Pɔɔlɩ tetisi tɔm ńdʋ́ nɛ ɛyɔɔdɩ se: «Mantayʋsɩnɩ Yuda ñɩma paɣtʋ yaa Ɛsɔ ɖɩɣa yaa Room wiyaʋ sɔsɔ.» 9Fɛstuusi ñɩnaɣ se ɛla nɛ pɩkɛdɩnɩ Yuda ñɩma ḿbá. Pʋ-yɔɔ ɛpɔzɩ Pɔɔlɩ se: «Ŋtisiɣ se powoni-ŋ Yeruusalɛm nɛ pahʋʋnɩ-ŋ tɔm ńdʋ́ mɛ-ɛsɩndaa yaa we?» 10Ecosi se: «Room wiyaʋ sɔsɔ tɔm ɖɩhʋyɛ mɛwɛ cɩnɛ. Ɛnʋ pʋwɛɛ se ɛhʋʋ mɔn-tɔm. Mantala Yuda ñɩma kɩwɛɛkɩm nabʋyʋ ɛzɩ ña-maɣmaɣ ŋtɛm sɩm siŋŋ yɔ. 11Yee malabɩ kɩwɛɛkɩm nabʋyʋ nɛ pʋwɛɛ se pakʋ-m yɔ, maaseɣ sɩm. Ɛlɛ́, yee toovenim ɛfɛyɩ mbʋ́ pɔtɔŋ se malaba yɔ pɩ-taa yɔ, pɩtaha nɔɔyʋ nʋmɔʋ se ɛ́ɖʋzɩ-m pe-nesi taa. Pʋ-yɔɔ lɛ, mɔnpɔzʋʋ se powoni-m Room wiyaʋ sɔsɔ cɔlɔ.» 12Peeɖe Fɛstuusi nɛ ɛ-tɔm tasɩyaa pacaɣaɣ nɛ pala lɩmaɣza. Pɛtɛma lɛ, ecosi Pɔɔlɩ se: «Ŋtɔm se patanɩ-ŋ Room wiyaʋ sɔsɔ cɔlɔ yɔ, peeɖe ŋwoki ɖɔɖɔ.»
Powoni Pɔɔlɩ wiyaʋ Agriipaa naalɛ ñɩnʋ cɔlɔ
13Pɩlabɩ kɩyakɩŋ cabɩ lɛ, wiyaʋ Agriipaa nɛ ɛ-kɔɔ Bereniisi powolo Sezaaree se pɛsɛɛ wiyaʋ sɔsɔ Fɛstuusi. 14Pacaɣ kɩyakɩŋ cabɩ lɛ, ɛ́lɛ́ kpaɣ Pɔɔlɩ tɔm nɛ ɛkɛdɩ Agriipaa se: «Wiyaʋ sɔsɔ Feliksɩ weyi mɛlɛɣzaa yɔ, ɛɖʋ abalʋ nɔɔyʋ salaka halɩ nɛ sɔnɔ. 15Mowobi Yeruusalɛm lɛ, cɔjɔnaa sɔsaa nɛ ɛjaɖɛ taa sɔsaa pɔkɔnɩ ɛ-tɔm mɔn-cɔlɔ se mahʋʋnɩ-ɩ nɛ mankʋ-tʋ. 16Peeɖe moncosi-wɛ se Room ñɩma tɛ lɛ, pɩtaha nʋmɔʋ se nɔɔyʋ ɛlabɩ pʋyʋ yɔ, pakʋ-ɩ yem nɛ ɛ nɛ mbá pɛwɛ tɔm yɔ potosuli ɖama nɛ ekuli ɛ-nɔɔ se tɔm yɔ, tɩ-ɖaɣʋ yɔ. 17Pʋ-yɔɔ patɩŋ-m nɛ pɔkɔɔ cɩnɛ. Tɔm ndʋ́ peheyi-m yɔ, montoɖoo tɩ-yɔɔ: kifema lɛ, mowolo mancaɣ tɔm ɖɩhʋyɛ nɛ mentiyi se pɔkɔnɩ abalʋ ɛnʋ. 18Ɛ-tɔm tɩnaa kɔma lɛ, patatɩɩyɔɔdɩ se ɛlabɩ kɩwɛɛkɩm mbʋ́ mamaɣzaɣ yɔ pɩ-taa nabʋyʋ kaʋ. 19Ɛlɛ́, pa-maɣmaɣ pɔ-sɔnzɩ nɛ abalʋ weyi payaɣ se Yesu, ɛsɩba nɛ Pɔɔlɩ ñɔtɔŋ se ɛ nɛ ɛ-ɛsɛ yɔ, pʋ-yɔɔ pɔhɔŋaɣnɩ ɖama tɔm. 20Ma-maɣmaɣ lɛ, menteɖiɣzini ɛzɩma mbʋ́ maahʋʋ tɔm ńdʋ́ yɔ. Pʋ-yɔɔ mɔnpɔzɩ Pɔɔlɩ se e-liu wɛɛ se ewolo Yeruusalɛm nɛ pahʋʋ ɛ-tɔm ńdʋ́ peeɖe naa we? 21Ɛlɛ́, ecosi se peyebi-i salaka taa ḿbʋ́ nɛ Room wiyaʋ sɔsɔ hʋʋ ɛ-tɔm. Pʋ-yɔɔ mɔntɔm se: yee ḿbʋ́, peyebi-i ka-taa nɛ pʋkɔɔ pɩsɩɩnɩ alɩwaatʋ ndʋ́ mowoni-i Room wiyaʋ sɔsɔ cɔlɔ yɔ.» 22Peeɖe Agriipaa heyi Fɛstuusi se: «Me-liu wɛɛ se pɩcaɣ ɛzɩma yɔ, manɩɩ abalʋ ɛnʋ ɛ-maɣmaɣ ɛ-nɔɔ taa.» Fɛstuusi cosi se: «Yee ḿbʋ́ cee lɛ ɛɛyɔɔdɩ nɛ ŋnɩɩ.»
23Kifema lɛ, Agriipaa nɛ ɛ-halʋ Bereniisi nɛ sɔɔjanaa ñʋndɩnaa nɛ tɛtʋ ñʋndɩnaa patɩŋa payɩ powolo wiii nɛ pasʋʋ tɔm ɖɩhʋyɛ sɔsɔɖɛ taa. Peeɖe Fɛstuusi tiyaa se powoni Pɔɔlɩ. 24Powonɩ-ɩ lɛ, Fɛstuusi yɔɔdɩ se: «Wiyaʋ Agriipaa nɛ mbá mɩ mɩtɩŋa payɩ ɖa nɛ mɩ ɖɩwɛ cɩnɛ yɔ, ɩnaɣ abalʋ ɛnɛ, ɛ-yɔɔ Yuda ñɩma samaɣ kɔm mɔn-cɔlɔ Yeruusalɛm cɩnɛ nɛ pamakɩ kubusi se pɩtamʋnɩ se ɛtasɩ wezuu caɣʋ. 25Mɔncɔnɩ tɔm ńdʋ́ tɩ-taa lɛ, ɛtala kɩwɛɛkɩm mbʋ́ pʋpɔzʋʋ se pakʋ-ɩ yɔ. Ɛlɛ́, ɛzɩma mbʋ́ ɛ-maɣmaɣ ɛpɔzaa se powoni-i Room wiyaʋ sɔsɔ cɔlɔ yɔ, mentisaa ɖɔɖɔ se powoni-i. 26Mɛnfɛyɩnɩ natʋyʋ siŋŋ se mamaɣ me-wiyaʋ sɔsɔ nɛ meheyi-i abalʋ ɛnʋ ɛ-tɔm. Pʋ-yɔɔ mɔnkɔnɩ-ɩ mɩ-ɛsɩndaa. Ɛlɛ́, ña wiyaʋ Agriipaa, ña-maɣmaɣ ñɛ-ɛsɩndaa mɔnkɔnɩ-ɩ se yee ŋtɛm-ɩ tɔm pɔzʋʋ lɛ, mana ndʋ́ maama takayaɣ taa yɔ. 27Mbʋ́ pʋyɔɔ yɔ, pɩtamʋnɩ se mowoni salaka tʋ nɔɔyʋ yem Room wiyaʋ sɔsɔ tɛ nɛ mantawɩlɩ mbʋ́ ɛlaba nɛ pakʋyʋʋ ɛ-yɔɔ yɔ.»
Currently Selected:
Tʋma Labʋ 25: KABI
Highlight
Share
Compare
Copy
Want to have your highlights saved across all your devices? Sign up or sign in
