Tʋma Labʋ 24

Tɛrtuluusi kʋyɩ Pɔɔlɩ yɔɔ

1Pɩlabɩ kɩyakɩŋ kagbaanzɩ lɛ, cɔjɔnaa ñʋʋdʋ Anaanɩyaasɩ nɛ ɛjaɖɛ taa sɔsaa nabɛyɛ nɛ tɔm loluyu Tɛrtuluusi patalɩ Sezaaree wiyaʋ sɔsɔ Feliksɩ tɛ se pakʋyɩ Pɔɔlɩ yɔɔ. 2Peeɖe wiyaʋ tiyaa nɛ payaa Pɔɔlɩ. Ɛkɔma lɛ, Tɛrtuluusi kʋyɩ ɛ-yɔɔ: eheyi wiyaʋ se: «Đajaa wiyaʋ sɔsɔ! Ñɔ-yɔɔ ɖɩwɛ laŋhɛzɩyɛ taa siŋŋ. Ñɔ-lɔŋsɩnɖɛ yɔɔ pɩtɩŋnaa nɛ pɛlɛɣzɩ wɛtʋ sakɩyɛ ɛjaɖɛ ɖɩnɛ ɖɩ-taa se piɖeni-ɖɩ. 3Đɩsɛɣ-ŋ siŋŋ mbʋ́ pɩtɩŋa ŋwɛɛ ŋlakɩ alɩwaatʋ tɩŋa paa le yɔ pʋ-yɔɔ. 4Ɛlɛ́, maakɩlɩɣ-ŋ lesuu alɩwaatʋ. Pʋ-yɔɔ monkuluu-ŋ hulaɣ se ña-camɩyɛ lakasɩ yɔɔ lɛ, ŋwelesini-ɖʋ pazɩ yem nɛ ŋnɩɩ ndʋ́ ɖɩkɔmnaa yɔ. 5Abalʋ ɛnɛ, ɛkɛ kɩdɛkɛdʋʋ: ɛwɛɛ eyozuu Yuda ñɩma tɩŋa kedeŋa kpeekpe yɔɔ. Ɛkɛ Nazarɛɛtɩ ñɩma ŋgbɛyɛ ɛzaɣ́ʋ ñʋʋdʋ. 6Halɩ ɛcaɣaɣ se episi Ɛsɔ ɖɩɣa, ɛlɛ́ ɖɩkpa-ɩ. [Đɩcaɣaɣ se ɖɩhʋʋnɩ-ɩ tɔm ɛzɩ paɖʋʋ ɖa-paɣtʋ taa yɔ. 7Ɛlɛ́, Sɔɔjanaa ñʋʋdʋ Lisiyaasɩ tɩkɔm ɛlɛɣ-ɩ nɛ ɖoŋ ɖe-nesi taa 8nɛ eheyi-ɖʋ se ɖɩkɔɔ ñɔ-cɔlɔ.] Đajaa, ña-maɣmaɣ ŋpɔzʋʋ-ɩ lɛ, eheyiɣ-ŋ mbʋ́ pɩlaba nɛ ɖɩkʋyʋʋ ɛ-yɔɔ yɔ pɩtɩŋa.» 9Tɛrtuluusi yɔɔdɩ ḿbʋ́ lɛ, Yuda ñɩma ḿbá patɩnɩ ɛ-yɔɔ se toovenim ḿbʋ́ ɖeyi ɖeyi pɩlaba.

Pɔɔlɩ hʋʋ ɛ-tɔm

10Pʋwayɩ lɛ, wiyaʋ sɔsɔ wɩlɩ Pɔɔlɩ nesi se ɛyɔɔdɩ nɛ ɛ́lɛ́ kaɖɩ se: «Đajaa, manawa se pɩlaba pɩnzɩ sakɩyɛ yɔ ŋhʋʋ tɔm ɛjaɖɛ ɖɩnɛ ɖɩ-taa yɔ. Ḿbʋ́ yebina nɛ mɔyɔɔdʋʋ mɔn-tɔm nɛ laŋhʋlʋmɩyɛ. 11Ña-maɣmaɣ ŋpɩzɩɣ ŋpɔzɩ nɛ ŋna, maawobu Ɛsɔ tɛɛ luŋuu Yeruusalɛm yɔ, pɩlaba kɩyakɩŋ hiu nɛ naalɛ yɔ ɖeyi ɖeyi. 12Wiɖiyi nɔɔyʋ takatɩ-m Ɛsɔ ɖɩɣa taa yaa Yuda ñɩma Ɛsɔ ɖɩsɛyɛ naɖɩyɛ taa yaa tɛtʋ taa se ma nɛ nɔɔyʋ ɖiɖiɣni tɔm hɔm yaa mansazaɣ samaɣ se kalɩɩ ɛyáa wayɩ. 13Lɛɛlɛɛyɔ, paa ŋpɔzɩ ɛyáa mbá yɔ, paapɩzɩɣ pɔyɔɔdɩ nɛ pawɩlɩ-ŋ mbʋ́ malaba nɛ pakʋyʋʋ mɔ-yɔɔ yɔ. 14Đajaa, ndʋ́ mankaɖɩɣ ñɛ-ɛsɩndaa yɔ lɛ se: ɖɔ-cɔzɔnaa Ɛsɔ tɛɛ moluŋuu, mentisiɣ tɔm ndʋ́ tɩtɩŋa payɩ pama Mooyiizi paɣtʋ nɛ náyaa pa-takayɩsɩ taa yɔ. Moluŋuu ɛ-tɛɛ ɛzɩ mbá payaɣ se ŋgbɛyɛ ɛzaɣ́ʋ taa ñɩma yɔ palakʋʋ yɔ. 15Pa-maɣmaɣ liu ŋgʋ́ pataɣ yɔ, ŋ́gʋ́ mantaɣ ɖɔɖɔ. Ŋ́gʋ́ lɛ se: ɛyáa kʋtʋʋzaa nɛ kɩwɛɛkɩm laɖaa pasɩba, ɛlɛ́, Ɛsɔ kɔŋ-wɛ fezuu. 16Pʋ-yɔɔ mañakɩ pana se man-taa ɛwɛɛ ɖeu Ɛsɔ nɛ ɛyáa pɛ-ɛsɩndaa tam.

17Pɩlabɩ pɩnzɩ cabɩ yɔ, mɛnfɛyɩ Yeruusalɛm. Pʋ-yɔɔ manpɩsaa mɔnkɔɔ se maha mɛn-tɛ ñɩma haɖɛ nɛ malaa kɩlaʋ. 18Alɩwaatʋ ndʋ́ malakaɣ ḿbʋ́ yɔ, pana-m Ɛsɔ ɖɩɣa taa, ɛlɛ́, maatɛm cɩɖɩcɩɖɩ wɛtʋ sɔnzɩ labʋ. Ñaɖʋʋ yaa you nakʋyʋ taawɛɛ. 19Ɛlɛ́, Yuda ñɩma nabɛyɛ lɩnɩnɩ Aazii egeetiye taa nɛ pɔkɔɔ pamaɣnɩ-m. Yee ḿbá ɛɛwɛnɩnɩ natʋyʋ se pakʋyʋʋ mɔ-yɔɔ yɔ, ḿbá pɩɩmʋnaa se pɔkɔɔ ñɔ-cɔlɔ. 20Yaa mbá pɛwɛ cɩnɛ yɔ, pa-maɣmaɣ pɔyɔɔdɩ nɛ ɖɩnɩɩ se pahʋnɩ-m tɔm hʋyaa sɔsaa cɔlɔ lɛ, kɩwɛɛkɩm mbʋ́ pana mɔ-yɔɔ? 21Mantala nabʋyʋ nɛ pɩfɛyɩ ɖeu nɛ pɩtasɩnɩ tɔm kʋɖʋmtʋ kɔŋ ndʋ́ mansɩŋ pɛ-ɛsɩndaa nɛ moholi yɔ. Ńdʋ́ lɛ se: ‹Mantaɣ liu se sɩɖaa kɔŋ fem. Pʋ-yɔɔ sɔnɔ pahʋʋnɩ-m mɩ-ɛsɩndaa ɛzʋnɔ.› »

22Feliksɩ kɛtɛm sɩm Yesu wayɩ tɩŋʋʋ tɔm camɩyɛ. Pʋ-yɔɔ eheyi ɛyáa ḿbá se pekpe nɛ kɩyakʋ ŋgʋ́ sɔɔjanaa ñʋʋdʋ Lisiyaasɩ ɛkɔma lɛ, ɛɛtazɩ pɔ-tɔm taa nɛ ɛna. 23Ɛlɛ́, eheyi sɔɔjanaa ñʋʋdʋ weyi ɛɖaŋaɣ Pɔɔlɩ yɔɔ yɔ se ɛcɔnɩ ɛ-yɔɔ, ɛlɛ́, ɛha-ɩ waɖɛ. Đɔɖɔ lɛ, eyele ɛ-taabalaa nɛ pasɩnɩ-ɩ.

Paɖʋ Pɔɔlɩ salaka

24Pɔɔlɩ wɛ peeɖe ḿbʋ́ nɛ pɩla kɩyakɩŋ cabɩ lɛ, Feliksɩ nɛ ɛ-halʋ Druusiili pɔkɔɔ nɛ etiyi se payaa Pɔɔlɩ. Halʋ ɛnʋ ɛkɛ Yuda tʋ. Ɛ́lɛ́ kɔma lɛ, Feliksɩ heyi-i se ɛkɛdɩ-ɩ Krɩstʋ Yesu yɔɔ lidaʋ wɛnaʋ tɔm. Peeɖe ɛpazɩ-ɩ-tʋ kɛdʋʋ. 25Ɛkɛdaɣ-wɛ ɛzɩma mbʋ́ pʋwɛɛ se ɛyʋ ɛcaɣ wezuu kʋtʋʋzʋʋ Ɛsɔ ɛsɩndaa yɔ nɛ tɩ ɖɔkʋʋ nɛ ɛzɩma mbʋ́ Ɛsɔ kɔŋ ɛyáa tɔm hʋnaʋ yɔ pɩtɩŋa pʋ-tɔm. Peeɖe sɔɔndʋ kpa wiyaʋ sɔsɔ Feliksɩ ɛnʋ nɛ eheyi-i se: «Lɛɛlɛɛyɔ, ŋpɩzɩɣ ŋɖɛɛ nɛ kɩyakʋ ŋgʋ́ mehiɣ alɩwaatʋ lɛ, maaɖaɣnɩ-ŋ yaʋ.» 26Đɔɖɔ lɛ, Feliksɩ maɣzaɣ se pʋtɔmaɣ yɔ, pɩkɛdɩɣ Pɔɔlɩ ha-ɩ liidiye. Ḿbʋ́ labɩna nɛ ɛpaŋ-ɩ yaʋ se ewolo nɛ ɛ nɛ ɩ pala faawɩyɛ.

27Pɩnzɩ naalɛ kɔm sɩɖɛɛ lɛ, abalʋ weyi payaɣ se Pɔɔrsiyuusi Fɛstuusi yɔ, ɛlɛɣzɩ Feliksɩ lone taa nɛ ɛkɛ wiyaʋ sɔsɔ. Feliksɩ caɣaɣ se pɩla Yuda ñɩma leleŋ lɛ, eyele Pɔɔlɩ salaka taa ḿbʋ́.

Currently Selected:

Tʋma Labʋ 24: KABI

Highlight

Compare

Copy