Tʋma Labʋ 23
23
1Peeɖe Pɔɔlɩ kʋsɩ ɛsɛ nɛ ɛcɔnɩ tɔm hʋyaa ḿbá pɩŋŋ nɛ ɛtɔ se: «Man-taabalaa mɩ! Me-wezuu caɣʋ taa lɛ, man-taa wɛ ɖeu Ɛsɔ ɛsɩndaa halɩ nɛ sɔnɔ.» 2Ɛyɔɔdaɣ ḿbʋ́ lɛ, cɔjɔnaa ñʋʋdʋ Anaanɩyaasɩ heyi mbá paawɛ ɛ-cɔlɔ yɔ se pɛcɛ ɛ-nɔɔ kadaŋa. 3Ɛlɛ́, Pɔɔlɩ kitini-i se: «Ŋwɛ ɛzɩ koloŋa ɛzaɣ́ʋ ŋgá pata akalʋʋ yɔ, Ɛsɔ kɔŋnɩ-ŋ mabʋ! Ŋcaɣ cɩnɛ se ŋhʋʋnɩ-m tɔm ɛzɩ paɖʋʋ paɣtʋ taa yɔ nɛ ŋkiti ŋtɔŋ se pamabɩ-m!» 4Mbá paawɛ peeɖe yɔ, panɩ ḿbʋ́ lɛ, pekitini-i se: «Ɛsɔ cɔjɔnaa ñʋʋdʋ ŋtʋʋ ḿbʋ́?» 5Pɔɔlɩ cosi-wɛ se: «Taabalaa! Mantaana se cɔjɔnaa ñʋʋdʋ. Pɩtɛkɛ ḿbʋ́, mantaatʋʋ-ɩ. Mbʋ́ pʋyɔɔ yɔ, pama Ɛsɔtɔm Takayaɣ taa se: ‹Pɩtaha nʋmɔʋ se ɛyʋ ɛtʋʋ ɛ-ɛjaɖɛ taa wiyaʋ.› »
6Pɔɔlɩ kɛtɛm sɩm ḿbʋ́ se tɔm hʋyaa ḿbá, pa-taa lɛlaa kɛ Saduki ŋgbɛyɛ taa ñɩma nɛ lɛlaa ñɛkɛ Farɩsɩ ñɩnɖɛ taa ñɩma. Pʋ-yɔɔ ɛyɔɔdɩ ɖoŋ pɛ-ɛsɩndaa se: «Man-taabalaa mɩ! Ma ɖɔɖɔ mɛnkɛ Farɩsɩ ŋgbɛyɛ taa tʋ, Farɩsɩ tʋ lʋlɩnɩ-m. Lidaʋ ŋgʋ́ mɛwɛnɩ Ɛsɔ yɔɔ se efeziɣ sɩɖaa yɔ, kʋ-yɔɔ ɩhʋʋnɩ-m tɔm ɛzʋnɔ.» 7Ɛyɔɔdɩ ḿbʋ́ lɛ, Farɩsɩ nɛ Saduki pa-aŋgba taa ñɩma pazɩ you pa-taa pe-ɖeke nɛ patayɩ ɖama nabʋlɛ taa. 8Mbʋ́ pʋyɔɔ yɔ, Saduki ñɩma eetisiɣ se sɩɖaa feŋ. Paatisiɣ ɖɔɖɔ se Ɛsɔ tiyiyaa yaa feziŋ nɩɩyɩ pɛwɛɛ. Ŋgʋ́, Farɩsɩ ñɩma ñetisiɣ ḿbʋ́. 9Peeɖe pasʋ you yɔɔ. Pɩkɛdaa lɛ, Farɩsɩ ñɩma hɔɔlʋʋ taa paɣtʋ wɩlɩyaa nabɛyɛ kʋyɩ nɛ pa nɛ wɛ pɔhɔŋnɩ ɖama tɔm nɛ pɔtɔ se: «Abalʋ ɛnɛ, ɖɩtana ɛ-kɩwɛɛkɩm nabʋyʋ kaʋ. Pʋtɔmaɣ yɔ, fezuu nakʋyʋ yaa Ɛsɔ tiyiyu nɔɔyʋ yɔɔdɩnɩnɩ-ɩ.»
10Ɛlɛ́, you wɛɛ kɩtɛzɩɣ saʋ miŋ nɛ sɔɔndʋ kpa sɔɔjanaa ñʋʋdʋ ɛnʋ se pɩtaakɛdɩ patayɩ Pɔɔlɩ ɛnʋ nanʋʋ nanʋʋ. Pʋ-yɔɔ eheyi ɛ-sɔɔjanaa se powolo lɔŋ nɛ pakpaɣ-ɩ ɛyáa samaɣ hɛkʋ taa nɛ papɩsɩnɩ-ɩ pa-pɩlʋʋ taa.
11Papɩsɩnɩ-ɩ nɛ ɖoó yu lɛ, Kɩpaɣlʋ wolo ɛ-cɔlɔ nɛ eheyi-i se: «Đɔkɩ ña-tɩ kpam! Ɛzɩma mbʋ́ ŋlɩzɩ ma-aseɣɖe Yeruusalɛm yɔ, ḿbʋ́ ɖɔɖɔ pʋwɛɛ se ŋlɩzɩ-ɖɩ Room.»
Pañɩba Pɔɔlɩ kpaca
12Kifema lɛ, Yuda ñɩma nabɛyɛ ta nɔɔ nɛ poɖuuni Ɛsɔ se yee patakʋ Pɔɔlɩ ɛnʋ yɔ, pʋyʋ nɔɔyʋ ɛɛkpaɣ pɔ-nɔɔ taa kaʋ. 13Mbá poɖuu ḿbʋ́ yɔ, paaɖɛ ɛyáa nɩɩnaza yɔɔ. 14Paakʋyaa powolo peheyi cɔjɔnaa sɔsaa nɛ ɛjaɖɛ taa sɔsaa se: «Đa lɛ, ɖiɖuuni Ɛsɔ se yee ɖɩtakʋ Pɔɔlɩ yɔ, pʋyʋ nɔɔyʋ ɛɛkpaɣ ɖɔ-nɔɔ taa kaʋ. 15Pʋ-yɔɔ lɛ, mɩ nɛ tɔm hʋyaa sɔsaa iwolo iheyi sɔɔjanaa ñʋʋdʋ se ɛkɔnɩ-mɩ Pɔɔlɩ nɛ mɩ-maɣmaɣ ɩtazɩ ɛ-tɔm taa siŋŋ nɛ ɩna. Piyele ɖa lɛ, ɖɩñɔɔzɩ ɖa-tɩ se ɖɩkʋʋ-ɩ nʋmɔʋ taa.»
16Pɔyɔɔdaɣ ḿbʋ́ lɛ, Pɔɔlɩ koou nɩɩ. Peeɖe ɛ́lɛ́ woba ɛsʋʋ sɔɔjanaa pɩlʋʋ taa nɛ eheyi-i-tʋ. 17Ḿbʋ́ labɩna nɛ Pɔɔlɩ yaa sɔɔjanaa taa sɔsɔ lɛlʋ nɛ eheyi-i se: «Kpaɣ evebu ɛnɛ nɛ ŋwoni-i mɩ-ñʋʋdʋ cɔlɔ, ɛwɛnɩ natʋyʋ se eheyiɣ-i.» 18Ɛlɛ́, sɔɔja ɛnʋ, ɛkpaɣ evebu ɛnʋ nɛ ewoni-i ɛ́lɛ́ cɔlɔ nɛ eheyi-i se: «Salaka tʋ Pɔɔlɩ yanɩ-m nɛ eheyi-m se mɔnkɔnɩ evebu ɛnɛ ñɔ-cɔlɔ se ɛwɛnɩ natʋyʋ se eheyiɣ-ŋ.» 19Peeɖe sɔɔjanaa ñʋʋdʋ ɛnʋ, ɛɖɔkɩ evebu ɛnʋ e-nesi taa nɛ ɛ nɛ ɩ pɛkɛɛ hɔɔlʋʋ nɛ ɛpɔzɩ-ɩ se: «Ndʋ́ ŋwɛnɩ se ŋheyiɣ-m yee?» 20Ɛ́lɛ́ cosi-i se: «Yuda ñɩma tam nɔɔ kʋɖʋmaɣ se pɔkɔŋ pɛcɛtɩ petendi-ŋ nɛ cee ŋwoni Pɔɔlɩ tɔm hʋyaa sɔsaa ɛsɩndaa nɛ paɖaɣnɩ ɛ-tɔm taa tazʋʋ siŋŋ nɛ pana. 21Pɔkɔma lɛ, taanɩɩnɩ-wɛ, mbʋ́ pʋyɔɔ yɔ, pa-taa nabɛyɛ mɛlɩɣ nʋmɔʋ taa se pakʋ-ɩ. Pɛɖɛ ɛyáa nɩɩnaza yɔɔ. Poɖuuni Ɛsɔ se yee patakʋ-ɩ yɔ, pʋyʋ nɔɔyʋ ɛɛkpaɣ pɔ-nɔɔ taa kaʋ. Đajaa, lɛɛlɛɛyɔ ñɔ-nɔɔ taa tɔm ɖeke paɖaŋaa. Pɛtɛm pa-tɩ ñɔɔzʋʋ nɛ paɖaŋ kpam.» 22Peeɖe sɔɔjanaa ñʋʋdʋ ɛnʋ eheyi-i se: «Đɛɛ! Manɩwa. Ɛlɛ́, pɩtaacɩbɩ-ŋ nɛ ŋla nɛ nɔɔyʋ nɩɩ se ŋheyi-m-tʋ.»
Powoni Pɔɔlɩ wiyaʋ sɔsɔ Feliksɩ tɛ
23Pʋwayɩ lɛ, sɔɔjanaa ñʋʋdʋ ɛnʋ, ɛ́yáa ɛ-sɔɔjanaa sɔsaa taa ɛyáa naalɛ nɛ eheyi-wɛ se: «Ikpeɣli sɔɔjanaa nasɩlɛ nɛ sɔɔjanaa mbá pacakɩ kpaŋnaŋ yɔ nɩɩnʋwa nɛ nɩɩlɛ nɛ mbá paba youni kɩkpɛzɛmɩŋ yɔ nasɩlɛ nɛ mɩtɩŋa ɩñɔɔzɩ mɩ-tɩ nɛ iwolo Sezaaree tɛtʋ taa ɖoó taa ñɩɣtʋ nakʋ yɔɔ. 24Ɩɖɛɣ lɛ, ɩlɩzɩ ɖɔɖɔ kpaŋnaŋ nɩɩyɩ. Ɩ-yɔɔ Pɔɔlɩ cakɩ nɛ ɛkɔɔ ɛtalɩ wiyaʋ sɔsɔ Feliksɩ tɛ nɛ ɛ-alaafɩya.» 25Pɛɖɛɣaɣ lɛ, ɛma Feliksɩ takayaɣ se: 26«Đajaa wiyaʋ sɔsɔ Feliksɩ! Ma Kloodi Lisiyaasɩ mamaɣnɩ-ŋ takayaɣ kanɛ, mɛnsɛ-ŋ! 27Mancaɣ meheyi-ŋ se ɛyʋ weyi pɔkɔŋnɩ-ŋ yɔ, Yuda ñɩma kakpa-ɩ se pakʋʋ-ɩ nɛ ma nɛ mɔn-sɔɔjanaa ɖɩlɛɣ-ɩ pe-nesi taa. Mbʋ́ pʋyɔɔ yɔ, ɖɩnɩwa se ɛkɛ Room tʋ. 28Mancaɣaɣ se mana mbʋ́ pʋ-yɔɔ Yuda ñɩma kʋyʋʋ ɛ-yɔɔ yɔ lɛ, mankpaɣ-ɩ nɛ mowoni pɔ-tɔm hʋyaa sɔsaa cɔlɔ. 29Pɔpɔzɩ-ɩ lɛ, mana se ɛtala kɩwɛɛkɩm nabʋyʋ nɛ pʋpɔzʋʋ se pakʋ-ɩ yaa paɖʋ-ɩ salaka. Ɛlɛ́, pa-maɣmaɣ pa-paɣtʋ yɔɔ pakpa-ɩ. 30Manɩwa se Yuda ñɩma ḿbá pa-taa nabɛyɛ tam ɛ-yɔɔ nɔɔ se pakʋʋ-ɩ. Pʋ-yɔɔ mankpaɣ-ɩ nɛ mentiyini-ŋ kpaagbaa nɛ meheyi ɛ-tɔm tɩnaa ḿbá se pɔkɔɔ pɔpɔzɩ-ɩ tɔm ñɛ-ɛsɩndaa!»
31Sɔɔjanaa mʋ takayaɣ ŋ́gá lɛ, pala mbʋ́ pa-ñʋʋdʋ heyi-wɛ yɔ: pa nɛ Pɔɔlɩ pakpaɣ nʋmɔʋ ɖoó ana a-taa ɖeke nɛ pɔkɔɔ patalɩ Antipatrii tɛtʋ taa. 32Tɛʋ fema lɛ, sɔɔjanaa mbá pɔɖɔŋaɣ naŋgbanzɩ yɔ, papɩsɩ pa-pɩlʋʋ taa nɛ pɩsɛɣ kpaŋnaŋ tɩnaa nɛ pa nɛ Pɔɔlɩ pɛɖɛɛ. 33Patalɩ Sezaaree wiyaʋ sɔsɔ Feliksɩ ɛnʋ ɛ-tɛ lɛ, pakpaɣ takayaɣ ŋ́gá nɛ Pɔɔlɩ nɛ paɖʋzɩ e-nesi taa. 34Ɛtɛm-kɛ kalʋʋ lɛ, ɛpɔzɩ Pɔɔlɩ se: «Ñɛ-tɛ egeetiye nɖɩ́ ɖɩ-taa?» Ɛ́lɛ́ cosi-i se: «Mɛn-tɛ Siliisii egeetiye taa.» 35Peeɖe eheyi-i se: «Ñɔ-tɔm tɩnaa ɛkɔma lɛ, maapɔzɩ-ŋ nɛ manɩɩ ñɔ-nɔɔ taa tɔm.»
Pʋwayɩ lɛ, ɛha nɔɔ se pakpaɣ Pɔɔlɩ ɛnʋ nɛ powoni-i wiyaʋ sɔsɔ Eroodi ɖɩɣa taa nɛ paɖaŋ ɛ-yɔɔ.
Currently Selected:
Tʋma Labʋ 23: KABI
Highlight
Share
Compare
Copy
Want to have your highlights saved across all your devices? Sign up or sign in
